“Mwiikhikicerace wiira nhipankiye ipottha”!

1. Toko cineeraaya Akolosu 2:4, 8, isiyani Sotwani impankaawe wiira akhalihe ipottha moopuwelelweehu?

SOTWANI mpheela wiira hiiva ninrukunuwele Yehova. Phimaana, Sotwani naamananiha ukhaliha ipottha moopuwelelweehu, awula uniiriha wuupuwela toko uyova cinoopuwelaawe. Sotwani wiira anithepye ni anipankihe ukhala mphanttyaawe, novarelaka nteko citthu cinnicivela hiivano.—Usome Akolosu 2:4, 8.

2-3. a) Kontha isiyani nihaana niiwelelaka itthu inhimeriyeehu nhina Akolosu 2:8? b) Isiyani ninhaleehu usoma nhina ula mwahoola?

² Niireke hiiva pooti uthepiya ni Sotwani? Iyee! Kontha moolumo ari nhina Akolosu 2:8 Paulu khawantikhenle atthu ahinonswalela Yehova—uyo aawantikhenle makristau yaathanliye ni nnepa wootteela. (Akol. 1:2, 5) Wakhala wiira ule ukatyuule waanoopiha makristau uthepiya ni Sotwani, ilelo uhotepa woopiha cinene hiivano uthepiya. (1 Akor. 10:12) Kontha isiyani? Kontha Sotwani hoomoleliya watuninyani, ni uyo naapanka yotheene inkhitiryaawe wiira aahapuse ale ahinhiya unswalela Yehova. (Apoka. 12:9, 12, 17) Uhiya iyo, hiiva ninkhala ukati “atthu ootakhala nrima ni owoothootha” unviraaya ‘yatepaka ukhala oohinamaana.’—2 Tim. 3:1, 13.

³ Nhina ula mwahoola, ninaahala usoma manannani Sotwani nomananihaawe unithepya ni urukunusa moopuwelelweehu. Ninaahala ucuwelela “itapha” tthaaru ca Sotwani. (Efesu 6:11; niwehero) Ni noonaka wiira ntapha na Sotwani nihorukunusa moopuwelelweehu, nhina mwaha nkiina unhaleehu usoma ninaahala woona mananna oorukunusa iyo. Masi woopacera, nttwee noone isiyani Sotwani yaapankalyaawe wiira aathepye asarayeli yaakenle phiyaaru ilapo yaakhuluvelihiyaaya.

YAHOTTEHIYA WIIRA YANCERE WAASWALELA ATTONTTO

4-6. Toko cineeraaya Deuteronomiyu 11:10-15, kontha isiyani asarayeli yahaana yiitthucaka mananna makiina oolima ukati waahalaaya ukela ilapo yaakhuluvelihiyaaya?

⁴ Nuulavilavi, Sotwani ahokhitiri waathepya asarayeli wiira yancere waaswalela attontto. Manannani? Sotwani ahovarela nteko itthu asarayeli yaapheelaaya: iyoolya. Ukati asarayeli waakhalaaya Wiciipitu, icoolya caalimaaya caamiceriya ni maaci yaakhuma mmoolokoni Nilo. Masi ukati waahalaaya ukela ilapo yaakhuluvelihiyaaya, ayo yaahaana yiitthucaka mananna makiina oolima icoolya caya. Ukhala wiira khawaarivo wakhiviru mooloko muulupale toko Nilo, imatta caya caahala umiceriya ni maaci opula ni nuukame. (Usome Deuteronomiyu 11:10-15; Isai. 18:4, 5) Masi wiitthuca mananna makiina oolima waanaahala urika, kontha asarayeli enci yaari anamalima oocuwelaca yahokhwa muuthakoni.

⁵ Yehova ahaahimyera asarayeli wiira makhalelwaaya yahorukunuwa. Vano, uyo ahowiirela: “Mweette ratta wiira nrimeenyu uhuutteheni ni uhuuhapuseni wiira mwaaswalele anluku akiina ni wiira mwaakhoromele.” (Deut. 11:16, 17) Wuupaceroni, unkhala toko ayo moolumwaayo khanaaca nteko woolima. Kontha isiyani Yehova ahaahimyera asarayeli wiira yaalamuliya wiitthuca mananna makiina oolima, ni ukati yooyo ahaahimyera ciicammo wiira khayaalamuliya waaswalela anluku oohikhweeli?

⁶ Yehova aanaacuwela wiira asarayeli yaanaahala uttehiya wiira yancere wiitthucihiya mananna oolima naatthu ooKanaa—apoovu aattamanannyaaya yaaswalela anluku oohikhweeli. Kontha ayo apoovwaayo yaari anamalima oocuwelaca ni yaanaahala uwiitthuciha asarayeli citthu cofayita. Masi waanoopiha asarayeli uhapusiya. Citthu cotheene caapankaaya atthu ooKanaa, yaanaatakanihera unswalela nlukwaaya Bahaali. Ayo yaanaakupali wiira Bahaali aari mwaneene irimu ni phaavaha ipula. Yehova khaapheela wiira apoovwaawe athepiye ni citthu co woothiya. Unookhalaru commo, asarayeli imaara cinci yahothanla unswalela Bahaali. (Manu. 25:3, 5; Masuw. 2:13; 1 Mam. 18:18) Nttwee noone itapha Sotwani caavarenlyaawe nteko wiira aakhalihe ipottha asarayeli.

ITAPHA TTHAARU SOTWANI CAAVARENLYAAWE NTEKO WIIRA AAKHALIHE IPOTTHA ASARAYELI

7. Waamini wa asarayeli waattehiye cani ukati waakenlyaaya ilapo yaakhuluvelihiyaaya?

⁷ Ntapha noopacera na Sotwani waari uvarela nteko itthu yoohitakhala yaapheelaaya asarayeli. Asarayeli yaanaapheela ipula wiira imicere imatta caya. Ukhuma mweeri wo Abril mpaka Setembro, khayaarupa ipula yinci ilapo yaakhuluvelihiyaaya asarayeli. Wiira akhalane ukumi ni wiira icoolya caalimaaya cuunuwace, asarayeli yaakhuluvela ipula yaapaceraka urupa mweeri wo Outubro. Sotwani ahaakupaliha asarayeli wiira yaalamuliya utthara ilema coohinamaana ca atthu aattamanannyaaya wiira icoolya caalimaaya cuunuwace. Ayo atthwaayo yaakupali wiira anlukwaaya yaahala uwaana ipula yaaswalelaka. Woocukuliha nrima, asarayeli enci khayaamwaamini Yehova. Nlattu wo woova uhirupa ipula mahuku menci, ayo yahancera unswalela nluku oohikhweeli Bahaali.

8. Ntaphani nonayeeli Sotwani naavarenlyaawe nteko? Utaphulele.

⁸ Ntapha nonayeeli na Sotwani waari uvarela nteko citthu coohinamaana caacivela asarayeli. Atthu ooKanaa ukati wo waaswalela anlukwaaya, yaanaapanka citthu coohinamaana ni coohiirya. Ule ukatyuule, athiyana ni alopwana yaanaararuwa. Urupihana alopwanaru awula athiyanaru, ni mananna makiina ooraruwa caari citthu caatthuniheriyaawe khula ntthu upanka ni khacooniya ukhala citthu cootakhala! (Deut. 23:17, 18; 1 Mam. 14:24) Atthu ooKanaa yaanaakupali wiira yapankaka nnyo citthunnyo, yaanawaasovenriha anluku ucaaliha imatta caya wiira aruwerye cinene. Asarayeli enci yahancera waacivela uraruwa ni yahokela waaswalela anluku oohikhweeli. Khweeliini, ayo yahokhala ipottha ca Sotwani.

9. Toko cineeraaya ilivuru ya Oseiya 2:16, 17, isiyani Sotwani yaapankalyaawe wiira asarayeli anliyale Yehova?

⁹ Sotwani ahovarela nteko ntapha noneeraru. Uyo ahaapankiha asarayeli wiira anliyale Yehova. Ukati wa porofeeta Jeremiya, Yehova aheera wiira maporofeeta owootha yaanawaapankiha asarayeli uliyala ncina nawe “nlattu wa Bahaali.” (Jer. 23:27) Atthunaka asarayeli yahohiya uvarela nteko ncina na Yehova ni yahaakakhaniha ni ncina na Bahaali, nintaphuleliya “mweethi” awula “pwiiya.” Iyo yahaakukuvaniha asarayeli. Ayo khayaacuwela-tho unvirikaniha Yehova ni Bahaali, ni yahancera utakanihera uswali woohinamaana ni uswali wokhweeli.—Usome Oseiya 2:16, 17 ni niwehero.

ITAPHA SOTWANI CINVARELAAWE NTEKO ILELO

10. Itaphani Sotwani cinvarelaawe nteko ilelo?

¹⁰ Ilelo, Sotwani nanlelo nvarela nteko itapha cimocaaru. Uyo naamananiha waakhaliha ipottha atthu avarelaka nteko citthu cohitakhala cinaacivela, aasovenrihaka uraruwa ni apankaka yotheene inkhitiryaawe wiira atthu anliyale Yehova. Nttwee nipacere woopela mwaha ntapha noneeraru.

11. Sotwani aapankihale cani atthu unliyala Yehova?

¹¹ Sotwani nawaapankiha atthu unliyala Yehova. Ukati waamanlyaaya ukhwaaca maapostolu a Yesu, atthu akiina yeeciirela makristau yahancera wiitthuciha citthu co woothiya. (Mite. 20:29, 30; 2 Atesal. 2:3) Ayo atthwaayo yahancera waavithela atthu ikhweeli cinhimya Nluku khweeliini tipani. Wootakihera, nhina Ibiiblya caataphulelaaya, ayo ahokumiha ncina na Yehova ni ahaakakhaniha ni moolumo toko “Pwiiya.” Masi iyo yahaakukuvaniha atthu yaasoma Ibiiblya, kontha khayaakhitiri unvirikaniha Yehova ni atthu akiina aneehaniya “pwiiya” mbiiblyani. (1 Akor. 8:5) Ni ukhala wiira ale yancenre wiitthuciha citthu co woothiya yaamwiihana Yehova ni Yesu “Pwiiya,” ntthu aasoma Ibiiblya aanawancera wuupuwela wiira Yehova ni Yesu akhanle ntthu mmoca. (Joau 17:3) Nlattu wo iyo, ihokhumelelihiya itthu ineetthucihiya wiira ari anluku araru—itthu Ibiiblya ihineetthucihaaya. Phimaana, atthu enci ammoona Nluku ukhala oorika uncuwela ni anoopuwela wiira uyo ri uttayi. Iyo ikhanle itthu yo woothiya!—Mite. 17:27.

12. Ittiini co wootha cinsovenriha isiyani? Toko cineeraaya Arooma 1:28-31, isiyani inkhumelela nlattu wo iyo?

¹² Sotwani naavarela nteko citthu coohinamaana cinaacivela atthu. Ukati wa asarayeli, Sotwani ahovarela nteko ittiini yo wootha wiira amwarusele uraruwa. Ilelo, iyo phi itthu Sotwani ciicammo impankaawe. Ittiini co wootha cinawaatthunihera ni mpaka cinawaasovenriha atthu uraruwa. Phimaana, atthu enci aniiciirela wiira ananswalela Nluku ahohiya weettela ikettelo comaana ciri mbiiblyani. Apostolu Paulu nhina iwarakha yaawantikhenlyaawe arooma ahottonka itthu ikhumelenle nlattu ittiini co wootha woosovenriha uraruwa. (Usome Arooma 1:28-31.) Atthu ahanca upanka “citthu cahaalamuliyaaya upanka.” Nhina nnyo citthunnyo, ahaavo mananna menci ooraruwa, ciicammo urupihana alopwanaru awula athiyanaru. (Aroo. 1:24-27, 32; Apoka. 2:20) Iyo inthoonyera wiira ikhanle itthu yofayita cinene hiivano utthara citthu cineetthucihaaya Ibiiblya!

13. Ntaphani-tho nikiina Sotwani ninvarelaawe nteko?

¹³ Sotwani nvarela nteko citthu coohitakhala cimpheeleehu. Otheene cihu ninaapheela ukhalana ipooso wiira niphwanye citthu cimpheeleehu hiivano ni amuciihu. Ni khuntakhala wiikurumica wiitthuca uvara nteko unhala unikavihera uphwanya ipooso. (1 Tim. 5:8) Ni inanna imoca yo wiitthuca nteko woohala univaha ipooso, ukhanle urwaa ucikola ni ukhala namasoma owiikurumica. Masi ratta! Ilapo cinci, icikola khacineetthuciha paasi uvara nteko. Ciicammo cinaamananiha uwiitthuciha anacikola miruku ca apinaatamu ni ucuwelaca wo ntuninyani. Wootakihera, mapurusoore makiina anawaasovenriha anacikola uhaamini wiira Nluku haavo ni ukupali wiira Ibiiblya ihomala ntekwaaya. Ayo ankupali wiira citthu cikumi ciri watuninyani khacumpiye, masi ciphattuwacale veekha. (Aroo. 1:21-23) Ayo moopuwelelwaayo anaavirikana cinene ‘nuucuwelaca wa Nluku.’—1 Akor. 1:19-21; 3:18-20.

14. Isiyani miruku ca apinaatamu cinaapankaaya atthu?

¹⁴ Miruku ca apinaatamu khacinlemeliha mena vakaani ikettelo cosariya ca Yehova. Miruku ca apinaatamu cineetthuciha citthu coovirikana ni ile inhimyaaya Ibiiblya. Ucuwelaca wo ntuninyani uhiya waakavihera atthu uthoonyera makhalelo o nhokorokho wo nnepa wa Nluku, unaasovenriha “miteko cinciveliha irutthu.” (Akalas. 5:19-23) Phimaana, atthu ahokhala owiicoona, owiittitthihaca ni oohoolelihera cinene ‘wiifenta asineennyaaya.’ (2 Tim. 3:2-4) Ayo makhalelwaayo anaavirikana ni makhalelo Nluku anwehereraawe wiira athoonyere atthu anonswalela. Uyo mpheela wiira hiiva nikhale atthu owaatanannya ni owiiyeviha. (2 Sam. 22:28) Woocukuliha nrima, makristau akiina arwaale usoma wuuniversidade ahotthuna uhapusiya ni moopuwelelo o ntuninyani. Woone ntakihero nimoca ninthoonyera itthu inkhumelela.

15-16. Isiyani weeva yiitthucalyaa ni itthu yankhumelenle nrokorihu novara nteko weepiyoneeru?

¹⁵ Nrokorihu mmoca virihale myaakha 15 avaraka nteko weepiyoneeru neera: “Ukhuma ukati ukhanlyaaka Saahiti a Yehova, mi kaanaasomaka ni kaanawiiwaka venci wiira urwaa usoma wuuniversidade unawoopiha. Masi akeewelenle. Mi koopuwela wiira iyo itthwiiyo yaahimyeriya atthu akiina, akaaciya miiva.” Isiyani yankhumelenle nrokorihu? Uyo neera: “Ikuurusu yaasomaaka khayaakivaha ukati ni ikuru. Mi akaakhalana-tho ukati wiira kinlompe Yehova toko khalayi. Kaakhala owoocyaa cinene, mpaka waanaakinyoonya uwuulumana atthu myaha co mbiiblyani ni utthenkaca mikutthaano. Ukati woonalyaaka wiira usoma icikola yuulupale waanaahonona upatthannyaaka ni Yehova, kahocuwela wiira kahaana kihiyaka usoma wuuniversidade. Ni kihohiya.”

¹⁶ Niireke usoma wuuniversidade wahorukunusa moopuwelelo a nrokorihu? Uyo nawaakhula eeraka: “Kinawoona ihaaya uhimyaca iyo, masi nlattu woorwaa usoma wuuniversidade, kahancera waavaanyiha cinene akhwaaka, venci-venci mayamunnaaka ni asirokoraka o wanlokoni. Kahancera uhaatanaca ni ayo, ni akaapheelaka waakhalana wakhiviru. Wahovira ukati mwinci wiira kihiye ayo moopuwelelo oohinamaanaayo. Vano, kahaamini wiira unawoopiha cinene uhiiwelela ikano Yehova cinnivahaawe avarelaka nteko mphwinkwaawe. Uyo khanle Apaapaaka ni naakicuwela ratta uvikana mananna cineecuwelaka. Mi kahaana kimwiiwelelaka!”

17. a) Citthuni ninlamuliyeehu ulakela upanka? b) Isiyani inhaleehu woona nhina mwaha nkiina unhaleehu usoma?

¹⁷ Ulakele uhihiyerera ituninya ya Sotwani yuukhalihaka ipottha “ni miruku ca apinaatamu ni citthu cowootoothiya.” Uhiitthaale ni uweheehe ratta itapha ca Sotwani. (1 Akor. 3:18; 2 Akor. 2:11) Uhinhiye Sotwani oopankihaka unliyala Yehova. Uhisime ikettelo comaana ca Nluku. Ni uhinhiye Sotwani oopankihaka uhiiwelela ikano ca Yehova. Vano woonelelaka wiira moopuwelelo o ntuninyani ahorukunusa moopuwelelwaa? Nhina mwaha nkiina unhaleehu usoma, ninaahala woona manannani Ibiiblya cinnikaviheraaya umalamaliha moopuwelelo ni meettelo ‘oolipihaciya cinene.’—2 Akor. 10:4, 5, niwehero.