MAKHALELO EEKRISTAU
Yehova naanikavihera uvilela masakha annikhumelela
Ala mahuku ookhiceraala, hi anaanikhumelela masakha menci ni ukati nkiina unkhala toko khaninhala ukhitiri uvilela. Masi naahihiyeke ulipihaca upatthaniihu ni Yehova, uyo naahala unikavihera uvilela masakha moolupale cinene. (Isai. 43:2, 4) Ninhala ulipihaca cani upatthaniihu ni Yehova yaniphwanyaka masakha?
Ulompa. Nanhimyeeraka Yehova citthu cotheene cinniira wanrimani, uyo naanivaha nnema ni ikuru wiira nihoocye.—Afili. 4:6, 7; 1 Atesal. 5:17.
Mikutthaano. Ula ukati unkhaleehuula, ninaatepa upheela cinene iyoolya yo mminepani ni uviriha ukati nimayamunneehu mmamikutthaanoni Yehova cinnitthenkaceraawe. (Mabere. 10:24, 25) Natthenkacaka mikutthaano, naahiloveke ni neekurumicaka ukomentari, nnepa wowaarya wa Yehova unaatepa unikavihera.—Apoka. 2:29.
Ulalyeera. Neekurumicaka ulalyeera, ninaakhitiri uhitepa wuupuwela citthu cinniriipiha nrima. Nteko woolalyeera ciicammo unaanikavihera utepa waapatthanana mayamunna anaalalyeeraneehu ni ninaatepa umpatthanana Yehova.—1 Akor. 3:5-10.
MOONE IVIDIYU YEHOVA NAAHALA UWAAKHELELANI. MWAMALIHAKA, MWAAKHULE ALA MAKOHWAALA:
Isiyani yaakavihenre arokorihu Malu uhihiya umpatthanana Yehova ukati waakhumelenlyaaya masakha?
Toko caakhumelenlyaaya arokorihu Malu, manannani Isaalimu 34:18 cinnimaalihaaya yaniphwanyaka masakha?
Itthu yaakhumelenle arokorihu Malu inthoonyera cani wiira Yehova naanivaha “ikuru” cinci yanikhumelelaka masakha?—2 Akor. 4:7