“Nna co mi unaakiciva ulalyeera!”

UTTEELIYA WAARINAAKA WAHOMALA

Wooriipiha nrima, uwakati waarinaaka myaakha 13, kahancera uhiya unfenta Yehova. Amirawo yaasomanaaka kaawoona wiitaphula, ni waakhala toko wiira mi ihaavo yaahaleelaaka. Mi kuupuwela wiira citthu caakihimeryaaya apaapa ni amaama, ni malamulo o mbiiblyani, khayaakihiya kiitaphulaka. Ni kooniha wiira miteko coominepani caanakivaha nteko muulupale. Mi akaahiile ukupali wiira Yehova haavo, masi akiicoona-tho utepa umpatthanana.

Hataa ukhalaka commo, mi akaahiile ulalyeera. Masi kaalalyeera vakaani wiira kihiireliye hohiya ulalyeera. Kapheelaka urwaa wuulalyeerani mi akeetthenkacaka, phimaana wankirika mapacapacero umoopana mwaha ntthu. Nlattu wo iyo, nteko woolalyeera khawaakikhumela saana, ni iyo yankiiriha utepa uhikicivela nteko woolalyeera. Mi kaaniikohaka co: ‘Ntthu nokhitiri cani uvara ula ntekoola khula isumana ni khula mweeri woohinnyoonya?’

Uwakati waarinaaka myaakha 17, mi kaapheela ukhala veekha. Phimaana kahotthonkomaniha citthu caka, ni kahothamela u Austrália. Iyo itthwiiyo yahaawerya cinene asipaapaaka. Ayo yahosanka cinene, masi yooniha wiira mi akaahala uhiya unswalela Yehova saana.

U Austrália, upatthannyaaka ni Yehova wahotepa uvololaca. Mi kaanaalova cinene umikutthaanoni. Wankicivela uweettana amirawo yaari toko mi, yaarwaaka umikutthaanoni nihuku nikhwaawe, ni nihuku nikhwaawe yaarwaaka uwurya ni wiina mmadiskoteka. Kuupuwelaka vale makhalelwaaka oottuli, kinawoona wiira mi kaaneettela ikhweeli ni ukati yooyo mi kaahaana meettelo ontuninyani, masi miphantte coomiili akaakhala ootteeliya.

ITTHU YOFAYITA YIITTHUCILYAAKA UKATI WAHAAWEHERERAAKA

Uvira waya myaakha miili, mi kahaacuwela arokorihu amoca. Woohicuwelela, ayo arokorihwaayo yahokikavihera weemela ni wuupuwela makhalelwaaka. Mi kaakhala inupa imoca naasirokorihu o wanlokoni acese yaari athupa. Ni hi nahonlattula mootoli osirikwiitu ni amwaaraawe, Tamara, wiira alukame uwannyihu isumana imoca. Uwakati mootoli osirikwiitu waawaceraawe miteko co wanlokoni, arokorihu Tamara yaakhalaka wamoca ni hiiva yanoopanaka mwaha ni yaniteehacaka. Iyo yaari itthu yaakicivela cinene. Ayo arokorihwaayo, yaari athiyana ankhili ni oorika woopaniya mwaha. Mi wahokicivela venci woona wiira ayo yahaana upatthani woolipa ni Yehova, ni ukati yooyo yaari ntthu oothukaniya.

Arokorihu Tamara yaari athiyana ootteeliya venci. Inanna caacivelaaya ikhweeli ni waacivelaaya nteko woolalyeera, wammwiiriha ntthu upheela waatakiha. Ayo waanaatteela nrima cinene nlattu wo wiikurumica unvarela nteko Yehova, masi miiva wankiriipa nrima nlattu woohiikurumica. Makhalelwaaya omaana ni utteeliya nrima waarinaaya wahokiiriha urukunusa makhalelwaaka. Ntakihero naya nahokuupusera ikhweeli yuulupale: Yehova nopheela wiira otheene cihu ninswalele ‘nitteeliyaka’ ni ‘nitthapaka nlattu wootteeliya.’—Isaa. 100:2.

WAHANCA UKICIVELA ULALYEERA TOOTHO

Mi kampheela utteeliya khampa anuunu Tamara, masi wiira kikhitiri iyo, mi kahaana kirukunusaka makhalelwaaka. Wahopica, masi mi kahancera wiikurumica vakaani-vakaani. Kahancera wiitthenkaca saana wiira kirwee wuulalyeerani, ni ukati nkiina kaanaavaraka nteko weepiyoneera ookavihera. Iyo yahokikavihera utepa uhoova ulalyeera. Nlattu woovarela nteko Ibiiblya wuulalyeerani, mi kaanaakhala ootteeliya cinene. Woohipica, kahancera uvara nteko weepiyoneeru ookavihera khula mweeri.

Kahancera waapatthanana atthu o khula ilika, yeekurumica ni waacivela unvarela nteko Yehova. Ntakihero nomaana no ayo apatthannyaayo, nahokikavihera wuupuwela citthu caalamuliyaaka uhoolelihera muukumini waka ni uvara ratta miteko coominepani. Wahanca ukicivela cinene ulalyeera ni khahokhala piyoneera owiicaaverya. Vano mi kahokhala ootteeliya ni kahiicoona saana wanlokoni.

KIHOMPHWANYA PIYONEERU NKHUNANAKA OOHALA UNVARANA NTEKO MUUKUMINI WAKA MOTHEENE

Uvira waya mwaakha mmoca, kahoncuwela Alex, nlopwana mmoca ooreera nrima anfenta cinene Yehova ni wancivela ulalyeera. Uyo aari nruminya o wanlokoni ni aahoviriha myaakha 6 avaraka nteko weepiyoneeru owiicaaverya. Alex ciicammo ahopaca urwaa ulalyeera u Malawi, ncoko woothwaa anamalalyeera. Nwo, uyo ahokhala ni mamisiyonaariyu yanvahile ntakihero nomaana, ni yankurumicile wiira hihiye unhoolelihera Yehova muukumini wawe.

Mwaakha wo 2003, mi ni Alex nahothelanaca, ni khanaahiile uvara nteko wo wiivahereriya ukati wotheene. Nahiitthuca citthu cinci, ni Yehova ahonicaaliha ni mananna menci.

YEHOVA AHONICAALIHA VENCI

Mwaakha wo 2009, naholattuliya urwaa uvara nteko weemisiyonaariyu u Timor-Leste, ilapo yankaani yaattamenle u Indonésia. Nahokhala ootikhinihiya, owoova ni wahonitteela nrima—cotheene nnyo weemaara imoca. Uvira waya myeeri mithanu, nahopiya u Dili, isittatti yuulupale yo Timor-Leste.

Makhalelo o Timor-Leste yanvirikana venci ni makhalelo o ncoko waakhumeehu. Citthu cotheene caari citthu cahaalemalenleehu: ilema caatthwaayo, iluukeeyo, iyoolyeeyo ni makhalelwaayaayo. Phimaana nahaana niilemalelihaka nnyo citthunnyo. Wuulalyeerani, nahaana naakhalakhalanaka atthu oothwennya, oohisoma venci ni yahaawaceriya saana. Atthu enci nanlelo yaanaahuva nlattu wokhotto ni ikhirini caakhumelenle ile ilapweele khalayi.a

Nteko woolalyeera waanaaciva! Wootakihera, ikwaha imoca kahoncuwela mwanthiyana mmoca aarina myaakha 13, neehaniya Maria.b Makhalelwaawe yaari owoonihaca uthunku. Anumwaane yahokhwa, ni uyo khaawoonaka athumwaane. Ni toko caaryaaya amirawo akhwaawe, Maria khaacuwela itthu yootthara muukumini wawe. Mi kinawuupuwela wiira nihuku nimoca, uyo ahonla ukati waakihimeryaawe inanna ciicoonaawe, masi mi akaakhitiri wiiweeha citthu cotheene coolumaawe kontha ule ukatyuule, miiva akaacuwela saana iluukeeyo. Mi kahonlompa Yehova wiira akikavihere unlipiha ule mmirawoole; phimaana kahancera unsomela iveerusu co mbiiblyani coomaaliha. Waaviraaya myaakha, mi kankhitiri woona wiira ikhweeli yanrukunusa meettelo, irutthu ni makhalelo a Maria. Uyo hopattisiya, ni nna co haana atthu anaasomihaawe Ibiiblya. Nna va, Maria haana amuci enci wanlokoni na Yehova ni uyo nawiicoona ufentiya.

Yehova ri moocaaliha nteko woolalyeera ilapo yo Timor-Leste. Anamalalyeera enci o Timor-Leste yiitthucile ikhweeli nhina wo myaakha 10 civinre. Hataa ukhalaka commo, enci akhanle mapiyoneeru, aruminya o wanlokoni awula mahumu. Akhwaawe anvara nteko nipuro nintaphuleliya ilivuru cihu, yakaviheraka utaphulela iyoolya yoominepani niiluuka cinoolumiya iyo ilapweeyo. Wankitteela nrima uwiiwa ayo yiipaka umikutthaanoni, yathyaaka ni uwoona yoonuwaka mminepani.

KHAAVO MAKHALELO MAKHWAAWE AAHALA UKITTEELIHA NRIMA UVIKANA ARINAAKA NNA CO

Makhalelo yaarineehu u Timor-Leste yaanaavirikana venci niinanna caakhaleehu u Austrália, masi khaavo makhalelo makhwaawe yaahala ukitteeliha nrima uvikana ayo. Ukati nkiina, hiiva naakelaka nkarerani mwankaani oophunyererihaniya, oocarihiya ihopa cowuuma ni icoolya cikithi caatumihaciya wapacari yo ule ncokoole. Mahuku makhwaawe, hiiva naasomihaka Ibiiblya inupa yoovihaviha ni yoonaanaca, vathi va yoopapattheliya niitthaya. Ni ukati waasomiheehu, caanaaviraviraka ilakhu nipuro nonkomeehu. Naahookhalanaru marikariko otheene ayo, khula ukati mi koopuwelaka co: ‘Ila ikhanle itthu yomaana!’

Koopuwelaka uttuli, mi kinansukhuru Nluku nlattu asipaapaaka wo wiikurumica ukiitthuciha myaha ca Yehova ni nlattu ayo woohihiyerera ukikavihera ukati woorikarikaca waaryaaka mmirawo. Mi kihoona yiirannyaaka muukumini waka itthu inhimyaaya Miruku 22:6. Amaama ni hataa apaapa unawaatteela nrima nlattu woonoona mi naawannyaka Alex ninvarelaka nteko Yehova. Ukhuma mwaakha wo 2016, hiiva ninvara nteko wo wootola maloko ncoko unwaceriya niipeteli yo Australásia.

Ntthu nokoona nna co, pooti uhikupali wiira khalayi mi khawaakicivela mena vakaani nteko woolalyeera. Masi nna co mi unaakiciva ulalyeera! Mi kihoona wiira hataa yanikhumelelaka marikariko awula nikhalaka ninnema, hi ninhala uphwanya utteeliya weekhweeli nanswalelaka Yehova ninrimeehu wotheene. Myaakha 18 cikhanlyaaka kinswalelaka Yehova wamoca naawannyaka Alex, mi kihotepa ukhala ootteeliya. Nna co, mi kinawoona wiira nasaalimu Davidi ahaana isariya, ukati waamwiirenlyaawe Yehova: “Otheene anootthawelela anaahala ukhala ootteeliya; ukati wotheene anaahala utthapa nlattu wootteeliya. . . . Ni ale anfenta ncina naa, anaahala utteeliya nlattu wawaa.”—Isaa. 5:11.