MWAHA WOOSOMIYA 26
Nifento ninnikavihera cani umaliha woova wihu?
“Yehova ri ni mi; akinhala woova.”—ISAA. 118:6.
NCIPO 105 “Nluku nifento”
NINHALA WIITTHUCANI?a
1. Citthuni cinnikhaliha owoova?
OTHEENE cihu pooti unikhumelela citthu cinnikhaliha owoova. Nttwee noone citthu caakhumelenle mayamunneehu. Munna Nestor ni amwaarawe aneehaniya María yampheela cinene ukavihera nipuro nahaarivo anamalalyeera enci.b Wiira akhitiri, ayo yahaana yakhalaka woohimihakhu cinci. Masi ayo yahancera woova uhirwaa utteeliya nrima nlattu woohikhalana nsurukhu mwinci. Mmirawo mmoca neehaniya Isaque ahokhala Saahiti a Yehova ilapo ninkhottihiyeehu uswali wihu. Uyo ukatyuuyo, uyo ahocuwela wiira anhala ulupatthiya naakhulupale ookuvernu ni ahoova nlattu wo iyo itthwiiyo. Masi itthu yaatepaawe woova waari uviruweliya naamucyaawe ukati ayo waahalaaya ucuwela wiira uyo hokhala Saahiti a Yehova. Arokorihu Valérie yahaakela iretta yuulupale ni yahaana yooperariyaka. Ayo wahaarika umphwanya meetiku aahala ukupali uwooperari woohaahelela iphome. Phimaana, arokorihu Valérie yahoova cinene ukhwa.
2. Kontha isiyani khaninlamuliya utepa woova?
2 Nyuuva ihopaca wuukhumelelani itthu yookhalihaleni owoova toko nnyo citthunnyo? Enci ihopaca unikhumelela. Natepaka woova cinene, ninaahala uthanla upanka citthu cinhala utankanya upatthaniihu ni Yehova. Iyo phi itthu impheelaawe Sotwani. Nlattu wo woova wihu, Sotwani ciicammo naamananiha unihiiha ulalyeera ni wiiwelela malamulo makiina a Nluku. Nhina ayo malamulwaayo, nihaavo nimoca ninniruma ulalya ihapari ca Nluku. (Apoka. 12:17) Sotwani khanle ntakhali, nakhirini ni haana ikuru. Vano isiyani inlamuliyeehu upanka wiira uyo hinikhitiri?
3. Isiyani inhala unikavihera uhoova?
3 Nakupaliki wiira Yehova naanifenta ni wiira ri ni hiiva, Sotwani khanhala ukhitiri unoopopiha. (Isaa. 118:6) Wootakihera, nlopwana antikhile Isaalimu 118 yahonkhumelela masakha menci. Yahaavo atthu enci yanlupattha ni akiina yaari akhulupale (iveerusu 9, 10). Ukati nkiina, uyo ahosuphiya (iveerusu 13). Ciicammo, uyo aholakiya ni Yehova (iveerusu 18). Waahookhalaru commo, uyo nasaalimuuyo ahiipa eeraka co: “Akinhala woova.” Isiyani yankavihera uyo nasaalimuuyo uhoova? Uyo ancuwela wiira hataa alakiyaka ni Yehova, nanlelo aanaafentiya venci nuuyo. Uyo nasaalimuuyo ancuwela wiira Nlukwaawe anhala unkavihera waanana khula masakha yaahala unkhumelela.—Isaa. 118:29.
4. Nakupaliki wiira Yehova naanifenta, citthuni cinhaleehu uhiya woova?
4 Nihaana nikupaliki ninrimeehu wotheene wiira Yehova naanifenta otheene cihu. Ukupali iyo itthwiiyo unaahala unikavihera uhiya woova citthu tthaaru: (1) woova uhikhitiri uwaaverya amuciihu iyoolya ni citthu cikiina, (2) umoova pinaatamu ni (3) woova ukhwa. Mayamunna ahimiye wiipaceroni ula mwahoola, yahokhitiri umaliha woova waarinaaya kontha yaanaakupali wiira Yehova nawaafenta.
WOOVA UHIKHITIRI UWAAVERYA AMUCIIHU IYOOLYA NI CITTHU CIKIINA
Munna mmoca amencaka ihopa ni mwanawe wiira awaaverye amucyaaya iyoolya ni citthu cikhwaawe (Nwehe iparaagarafu 5)
5. Citthuni cimmwiiriha nhooleli itthoko ukhala niisukhuli? (Nwehe ilatarato yo wakaapani.)
5 Nhooleli itthoko naacuwela wiira waawacera amucyaawe unkhala nrintti muulupale. (1 Tim. 5:8) Wakhala wiira nyuuva mwaahooleli itthoko, pooti ukhalaka wiira ukati woretta yo COVID-19, nyuuva mwaahanle vakaani wiireliya untekoni winyu wiira nteko uhoomalelani ni nrweeke monkomeke uwaani. Nyuuva atthunaka mwahoova uhikhitiri uthuma iyoolya ni citthu cikhwaawe wapuwani winyu. Ni wakhala wiira mwaheereliya wiira ntekweenyu uhomala, nyuuva atthunaka mwahoova uhikhitiri uphwanya nteko nkiina. Awula, khampa Nestor ni María, nyuuva atthunaka mwahoova uhikhitiri ukhala saana ninsurukhu vakaani paahi. Nlattu atthu enci wo woova nnyo citthunnyo, Sotwani hokhitiri waahiiha unswalela Yehova.
6. Isiyani Sotwani impheelaawe unikupaliha?
6 Sotwani nopheela unikupaliha wiira Yehova khannifenta ni khanhala unikavihera uphwanya iyoolya ni citthu cikhwaawe cimpheelaaya amuciihu. Nakupaliki iyo itthwiiyo, ninaahala wancera uvaresesa cinene ntekweehu ni mpaka ninaahala waamini uheettela ikano co mbiiblyani wiira nihikumihiye nteko.
7. Isiyani Yesu inikhuluvelihilyaawe?
7 Yesu nawaacuwela ratta Athumwaane uvikana mananna hiiva cinaacuweleehu. Nhina Matewus 6:8, Yesu aheera co: “Athumwaninyu anaacuwela citthu cimpheeleenyu wala nhinaaya waalepela.” Yesu naacuwela wiira Yehova naahala unikavihera uphwanya citthu cinnithwa. Hiiva makristau ninaapanka mphantte wa amuci a Yehova. Yehova khanle nhooleli o iyo itthokweeyo. Phimaana, hiiva ninaakhuluvela wiira uyova naahala weettela itthu irumalyaawe wantikhiya nhina 1 Timotiyu 5:8.
Yehova khanhala uhiya univaha citthu cinnithwa ni uyo pooti waakurumica mayamunneehu wiira anikavihere (Nwehe iparaagarafu 8)g
8. a) Isiyani inhala unikavihera uhiya woova uhikhitiri uwaaverya amuciihu iyoolya ni citthu cikiina? (Nwehe Matewus 6:31-33.) b) Toko cinthoonyeraaya ilatarato, ninhala waatakiha cani amunna ni amwaaraya anaarweehela iyoolya arokorihu?
8 Nakupaliki wiira Yehova naanifenta ni nawaafenta amuciihu, ninaahala ukhuluvela wiira uyo naahala unikavihera uphwanya iyoolya ni citthu cikhwaawe. (Nsome Matewus 6:31-33.c) Yehova naapheela uniwacera saana ni khaavo ntthu nkhwaawe nhala uniwacera saana unvikana Yehova! Wootakihera, ukati wumpilyaawe ituninya, Yehova khapankile paahi citthu caahala unikavihera umumula wiira nihikhwe. Masi uyo hocariha ntuninyani yumpilyaawe citthu cinnitteeliha nrima. (Upha. 2:9) Hiiva pooti uhikhalana mihakhu cinci, masi wakhala wiira nihaana citthu vakaani, toko iyoolya, ikuwo ni nipuro noorupa, nihiliyale wiira nnyo citthu vakaaninnyo Yehova phinnivaha. (Mat. 6:11) Ciicammo, nihaana nuupuwelaka wiira nsurukhu ni mihakhu cinleveehu mahukwaala wiira ninswalele ratta Yehova khacinlikana mena vakaani niiparakha cinhalaawe univaha wahoolo. Iyo phi itthu Nestor ni María yoonelenlyaaya.—Isai. 65:21, 22.
9. Ntakihero na Nestor ni María ninniitthuciha isiyani?
9 Nestor ni María yaakhala u Colombia. Ayo yahaana nsurukhu ni yaanaapuha. Ayo aneera: “Hi naapheela uhiya ukhalana mihakhu cinci ni wiivaherera ulalyeera cinene. Masi hi naanawoova wahoolo uhinitteela nrima ukati waahaleehu uhikhalana mihakhu cinci.” Isiyani yaakavihenre uhiya woova waya? Ayo yaheemela ni yahoopuwela ikwaha Yehova caathoonyihenryaawe nifento nawe ni yahotepa ukhuluvela wiira Yehova anhala waavaha khula itthu yaahala waathwa. Vano, ayo yahaamini uhiya nteko wonsurukhu mwinci, yahotumiha inupaaya ni yahorwaa ukavihera ncoko yahaarivo anamalalyeera enci. Yoonenle cani iyo itthwiiyo? Munna Nestor heera: “Hi nahooneeha wiira moolumo ari nhina Matewus 6:33 akhanle ikhweeli. Khiivo itthu inithwaale ni unaanitteela nrima venci uvikana khalayi.”
UMOOVA PINAATAMU
10. Nlattuni atthu unwoovaaya akhunanaya?
10 Ukhuma ukati Atamu ni Hawa waavanryaaya matampi, apinaatamu khanhiya uhuvihana. (Ekles. 8:9) Wootakihera, atthu enci nlattu wookhala akhulupale anawaatulumu akhunanaya, enci anawaapanka citthu cokhirini akhunanaya, mmacikolani ahaavo anaapaca imweeni akhunanaya ni mpaka mmapuwani cinaakhumelela inttewo ni uhitafitaniya saana. Phimaana, ahaavo atthu anwoova akhunanaya! Manannani Sotwani cinvarelaawe nteko nwo woovanwo wiira anoopopihe?
11-12. Sotwani novarela nteko cani uwoova wihu apinaatamu wiira anihapuse?
11 Sotwani naavarela nteko uwoova wihu apinaatamu wiira anihiihe ulalya ihapari comaana ni wiiwelela malamulo a Nluku. Sotwani naawiiriha ikuvernu cikiina unikhottiha nteko woolalya unvareehu ni unilupattha. (Luka 21:12; Apoka. 2:10) Nhina ila ituninya ya Sotwani inkhaleehwiila, atthu enci anaawootherya Masaahiti a Yehova citthu cinci cootakhala. Nlattu wo nnyo citthu cowoothiyannyo, atthu pooti unitarawaca, unaattakaca awula unikhotta. (Mat. 10:36) Niireke wiira nihaana noovaka nlattu wo nnyo citthunnyo? Mena. Ukhuma ukati wo makristau oopacera, Sotwani naawoopopiha apoovu a Nluku niinanna imocaaru.—Mite. 5:27, 28, 40.
Hataa nilupatthiyaka naamuciihu, hiiva pooti wankhuluveleehu wiira Yehova naanifenta (Nwehe iparaagarafu 12-14)h
12 Wiira anihapuse, Sotwani naavarela nteko woova wihu ulupatthiya, masi ihaavo itthu ikhwaawe uyo ciicammo invarelaawe nteko. Mayamunneehu akiina ihaavo itthu intepaaya woova uvikana inanna cinoovaaya ulupatthiya. Yakhalaka makristau, ayo anawoova uviruweliya naamucyaaya ukati unhalaaya wooniya wiira ahokhala makristau. Ayo mayamunnaayo ananfenta cinene Yehova ni ampheela wiira amucyaaya ancuwele ni anfente. Phimaana, unawaawerya nrima cinene yawiiwaka asimucyaaya yawuulumaka pusya mayamunna ni yamuulumaka pusya Yehova. Masi, ahaavo asimucyaaya mayamunneehu yahaacivela Masaahiti a Yehova arukunusile nrimaaya ni akhanle aswali a Yehova. Vano wakhalaka wiira amuciinyu nyuuva aholakela uhiwuulumanani nlattu nyuuva wookhala Saahiti a Yehova, nnohala upankani?
13. Wakhalaka wiira amuciihu ahoninyanyala, ukhuluvela wiira Yehova naanifenta unhala unikavihera cani? (Nwehe Isaalimu 27:10.)
13 Moolumo omaana amphwanyannya nhina Isaalimu 27:10 pooti unimaaliha. (Nsome.d) Hataa amuciihu yaninyanyalaka, wuupuwela mananna Yehova cinnifentaawe phi itthu inhala univaha ikuru wiira nivilele ulupatthiya ni phinhala unikavihera ukhuluvela wiira uyo naahala unicaaliha navilelaka. Khaavo ntthu nkhwaawe nokhitiri uniwacera sana-saana unvikana Yehova. Iyo phi itthu yoonelenlyaawe Isaque romoliye wiipaceroni ula mwahoola.
14. Ntakihero na munna Isaque ninniitthuciha isiyani?
14 Isaque ahokhala Saahiti a Yehova hataa acuwelaka wiira ikuvernu yolapo inkhalaawe inawaalupattha Masaahiti a Yehova. Ucuwela wiira naafentiya venci ni Yehova phi itthu yankavihenre umaliha woova wawe. Uyo enre: “Masaahiti a Yehova yaanaalupatthiya cinene naakhulupale ookuvernu, masi itthu yaatepa ukikhaliha owoova khawaari ulupatthiya niikuvernu; mi kaawoova amucyaaka. Kaanawoova waanyoonyiha apaapa kontha ayo khayaari nkristau ni kaanawoova uwoonihaca ihaaya amucyaaka.” Masi Isaque ankhuluvela wiira Yehova khula ukati nawaawacera atthu anaafentaawe. Isaque neera: “Mi kaheemelela ni wuupuwela mananna Yehova caakavihenryaawe mayamunna yaakhumelenle masakha moolupale toko waathwa nsurukhu, uthanyiya ni upankiya ikhirini. Mi kaanaacuwela wiira kaahinhiyeke Yehova, uyo aanaahala ukicaaliha. Ukati waatthukiyaaka ikwaha cinci ni waattakaciyaaka, mi kahoona wiira khweeli Yehova naanikavihera naahihiyeke umwiiwelela.” Yehova ahokhala Athumwaanawe Isaque ni mayamunna yahokhala asimucyaawe.
WOOVA UKHWA
15. Kontha isiyani khuntakhala woova ukhwa?
15 Ibiiblya ineera wiira ukhwa ukhanle nwananiihu. (1 Akor. 15:25, 26) Phimaana, hiiva pooti woova ukhwa, utepa noonelelaka wiira nihaana iretta yowoopiha awula wakhalaka wiira mmuciihu phirina iyo iretteeyo. Masi nlattuni ninooveehu ukhwa? Kontha Yehova numpile wiira nikhale woohikhwa. (Ekles. 3:11) Ni pooti waneereehu wiira woova ukhwa unaanikhikicera. Wootakihera, woova ukhwa pooti uniiriha wiikhikiceraca ni wiikurumica ulya icoolya comaana, upanka iginástica, urwaa usipiritaali nawerennyaka ni uhipanka citthu cowoopiha caahala uhonona ukumiihu.
16. Sotwani nvarela nteko cani woova wihu ukhwa wiira anihapuse?
16 Sotwani naacuwela wiira hi ninaapheela ukhikicera cinene ukumiihu. Masi, uyo neera wiira hiiva ninaahala waamini uleva citthu cotheene ni mpaka uleva upatthaniihu ni Yehova wiira nihikhwe. (Jó 2:4, 5) Masi iyo itthu yowoothiya. Ni ukhala wiira Sotwani haana mananna owiiva, uyo naavarela nteko woova wihu ukhwa wiira anihapuse. (Mabere. 2:14, 15) Ukati nkiina, Sotwani nawaakurumica atthu wiira awoopopihe aswali a Yehova yawiirelaka wiira anaahala uwiiva yaahinhiyeke Yehova. Ukati nkhwaawe, anoonaka wiira nihaana iretta yowoopiha, uyo naavarela nteko iyo itthwiiyo wiira aniirihe uheettela mattharelelo a Yehova. Wootakihera, mameetiku awula amuciihu pooti unikhanyereriha wiira niheleliye iphome. Iyo ikhanle itthu Yehova inkhottihaawe. Awula, ayo pooti umananiha unikhanyereriha wiira nitthune mirette ni utafitiya iretteehu niinanna invirikaniha malamulo a Yehova.
17. Toko cinthoonyeraaya Arooma 8:37-39, kontha isiyani khaninlamuliya woova ukhwa?
17 Hi khanimpheela ukhwa. Masi pooti wankhuluveleehu wiira hataa nikhwaaka, Yehova khanhala uniliyala ni khanhala uhiya unifenta. (Nsome Arooma 8:37-39.e) Akhwaaka ntthu Yehova ampatthananaawe, uyo naamuupuwela sana-saana uyo ntthuuyo khampa wiira nanlelo haavo nkumi. (Luka 20:37, 38) Ni Yehova noona upica uphiya ukati unhalaawe umunweleliha uyo ntthuuyo. (Jó 14:15) Yehova hopanka itthu yuulupale wiira otheene cihu niweherere ukhalana ukumi woohimala. (Joau 3:16) Hi ninnokhitiri woona mananna Yehova cinnifentaawe ni cinniwaceraawe. Phimaana, nawerennyaka cinene awula nahalaka vakaani ukhwa, hi ninantotha Yehova wiira animaalihe ni anivahe ucuwelaca ni ikuru. Iyo phi itthu yaapankilyaaya arokorihu Valérie ni awannyaya.—Isaa. 41:3.
18. Itthu yaakhumelenle arokorihu Valérie inniitthuciha isiyani?
18 Ukati arokorihu Valérie waarinaaya myaakha 35, yahaakela iretta yowoopiha ineehaniya cancro. Masi ukhuluvela wiira anaafentiya ni Yehova wahaakavihera uhiya woova ukhwa. Ayo aneera: “Iyo iretteeyo yahorukunusa makhalelwaaka wowaakuvyaaca. Wiira iyo iretteeyo ihikiive, mi kahaana kooperariyaka. Mi kahowuulumana mameetiku enci, masi khaavo meetiku aatthunale ukooperari woohikihelela iphome. Mi kaanawoova cinene, masi akaalamuliya upanka itthu Yehova inkhottihaawe ni utthuna uheleliya iphome. Muukumini waka motheene, Yehova hokithoonyera ikwaha cinci wiira naakifenta. Vano, wahophiya ukati miiva wonthoonyera wiira ciicammo kinanfenta. Phimaana, khula ukati waahimyeeriyaka itthu yookoopopiha, mi kaanaatepa ulakela untteeliha nrima Yehova ni uhinhiya Sotwani akitthemaka. Nuuwakatyaaya, mi kahooperariya woohiheleliya iphome. Hataa ukhalaka wiira nanlelo kinaaweryaaciya, mi kinnoona wiira Yehova nnoniwacera anivahaka citthu cinnithwa. Wankutthaanoni mmoca waakhalanneehu kihinahimyeeriya wiira kihaana iyo iretteeyo, nahosoma mwaha worevista Ukhalenla weera ‘Nvilele masakha o mahukwaala nlipaka nrima.’f Uyo mwahooyo wahonikavihera venci ni nahosoma ikwaha cinci. Usoma myaha toko uyo ni wiikurumica uhihiya uvara miteko co mminepani, phi itthu inikavihenre mi ni awannyaka ukhalana nnema ni ucuwela ulakela upanka citthu comaana.”
NIMALIHE WOOVA WIHU
19. Isiyani inhala wiirannya woohipica?
19 Mayamunneehu ntuninyani motheene ahokaviheriya ni Yehova uvilela marikariko moolupale ni ukhitiri unkhottela Sotwani. (1 Pet. 5:8, 9) Nyuuva ciicammo pooti ukhitiri. Woohipica, Yehova naahala unruma Yesu ni malayikha wiira ‘amalamalihe miteko ca Sotwani.’ (1 Jo. 3:8) Yeerannyaaka iyo itthwiiyo, va watuninyani va apoovu a Yehova ‘khiivo inhalaaya woova ni khiivo itthu inhala uwoopopiha.’ (Isai. 54:14; Mik. 4:4) Masi uhinaphiya uyo ukatyuuyo, nihaana niikurumicaka wiira nimalihe woova wihu.
20. Isiyani inhala unikavihera umaliha woova wihu?
20 Nihaana nilipihacaka ukhuluvela wihu wiira Yehova naanifenta ni khanhala uhiya unikhikicera. Ni wiira nilipihace nwo ukhuluvelanwo, nihaana nuupuwelaka mananna Yehova caakhikicenryaawe attharyaawe khalayi. Ciicammo, nihaana nuupuwelaka mananna cinikavihenryaawe uvilela masakha moolupale muukumini wihu. Napankaka commo, nikaviheriyaka ni Yehova, hiiva ninaahala ukhitiri umaliha woova wihu!—Isaa. 34:4.
NCIPO 129 Eu Vou Perseverar
a Woova pooti unikavihera unyema citthu cowoopiha. Masi utepa woova pooti unipanka pusya. Manannani? Sotwani pooti uvarela nteko woova wihu wiira aniirihe ulakela upanka itthu yoohinamaana. Phimaana, nihaana niivaracaka wiira nihitepe woova. Isiyani inhala unikavihera uhitepa woova? Toko cinhaleehu woona nhina ula mwahoola, nakupaliki wiira Yehova ri ni hi ni naanifenta, ninaahala umaliha woova wihu.
b Macina makiina ahaakakhanihiya.
c Matewus 6:31 “Phimaana, nhikhale niiwasiwaasi, mwiiraka: ‘Ninhala ulyani?’ awula: ‘Ninhala uwuryani?’ awula ‘Ninhala uwarani?’ 32 Kontha citthu cotheenennyo phi citthu atthu o ntuninyani cineekurumicaaya cinene utotha. Athumwaninyu o wiirimu anaacuwela wiira nyuuva nnaapheela citthu cotheenennyo. 33 Phimaana, nhihiye uhoolelihera Umwene wa Nluku ni isariyaawe; ni nnya citthu cikhwaawe cotheenennya nnahala uphwanyihiya.”
d Isaalimu 27:10 Hataa apaapa ni amaama yakinyanyalaka, Yehova naahala ukaakhelela.
e Arooma 8:37 Uhookhalaru commo, nhina wo citthu cotheene nnya ninaakhitiri utthema, nlattu wo ule nifentile. 38 Kontha kinaakupali wiira nanka ukhwa, nanka ukumi, nanka malayikha, nanka makuvernu, nanka citthu cirivo, nanka citthu cinhala uwa, nanka ikuru, 39 nanka irekamelo, nanka yiiserero, ni khiivo nanka itthu ikhwaawe yumpiye inhala ukhitiri unimwalaniha nnifentoni na Nluku, niri iriyari wa Yesu Kristu, Apwiiyeehu.
f Nwehe irevista Ukhalenla 15 yo Outubro yo 2012, ipaagina 7-11.
g ILATARATO: Amunna ni amwaaraya anawaarweehela iyoolya arokorihu aneekurumica uvara miteko co wapuwani.
h ILATARATO: Munneehu mmirawo khantthuniheriya naasithumwaane unswalela Yehova. Masi uyo naakhuluvela wiira Yehova ri nuuyova.