Makoho Aanamasoma

Ukati Davidi wantikhilyaawe Isaalimu 61:8 eeraka wiira anhala unttottopela Nluku “mpaka,” niireke wiira uyo oolumile iyo itthwiiyo woohuupuwela ratta ni khaahimya ikhweeli?

Mena. Itthu Davidi yuulumilyaawe ikhanle ikhweeli ni uyo khoolumile woohuupuwela.

Moone itthu yantikhilyaawe nhina iyo iveeruswiiyo ni nhina iveerusu cikhwaawe. “Kinaahala wiipa icipo coottottopela ncina naa mpaka. Khula nihuku, kinaahala uttotopela ukati wowiirannyeeha citthu cikhuluvelihilyaaka.” “Mi kinawuuttottopela ninrimaaka wotheene, oo Yehova, Nlukwaaka, kinaahala uttitthimiha ncina naa mpaka.” “Kinaahala uttottopela ncina naa mpaka.”—Isaa. 61:8; 86:12; 145:1, 2.

Davidi khoolumile iyo itthwiiyo woohuupuwela ni ancuwela wiira wanihukuni anhala ukhwa. Uyo ancuwela wiira apinaatamu otheene anaakhwa nlattu wo matampi. Ni Davidi mwaneene ahooluma eeraka wiira aari namatampi. (Upha. 3:3, 17-19; Isaa. 51:4, 5) Uyo ancuwela wiira hataa alopwana ookhuluvelya toko Aparahamu, Isaaki ni Yakopi yahokhwa. Ni Davidi ancuwela wiira uyova ciicammo anhala ukhwa. (Isaa. 37:25; 39:4) Masi moolumo yantikhilyaawe nhina Isaalimu 61:8 anthoonyera wiira uyova ampheela ni aholakela unttottopela Nluku mpaka, awula muukumini wawe motheene.—2 Sam. 7:12.

Mapuro makhwaawe Davidi hooluma citthu cankhumelenle muukumini wawe. Moolumo ari wiipaceroni Isaalimu 18, 51, ni 52 anawoonihera iyo itthwiiyo. Nhina Isaalimu 23, Davidi heera wiira Yehova nokhala khampa makampuci nowacera, nokhikicera ni nohoolela ikhontwaa cawe. Davidi ciicammo aari makampuci ni aapheela unswalela Nluku ‘mahuku otheene o muukumini wawe.’—Isaa. 23:6.

Ciicammo, nihaana nihiliyalaka wiira citthu cotheene Davidi cantikhalyaawe, aarumiye ni Yehova. Nhina citthu cantikhalyaawe, cahaavo inatiri caahimya citthu caahala wiirannya wahoolo. Wootakihera, nhina Isaalimu 110, Davidi ahooluma uwakati Pwiiyaawe waahalaawe ‘wonkoma moono wonlopwana wa Nluku’ ni uvahiya ikuru. Masi uvahiya ikuru wiira apanke isiyani? Wiira aattheme awanani a Nluku ni wiira ‘ahukhumu ilapo co ntuninyani.’ Davidi aari nhiyataata a Mesiya, ule aahala ulamulela wiirimu ni ukhala “nankuttho mpaka.” (Isaa. 110:1-6) Yesu aheera wiira inatiri yo Isaalimu 110 yaamwaaca uyova ni yanhala wiirannya wahoolo.—Mat. 22:41-45.

Yehova ahonruma Davidi wantikha kahi paasi citthu caahala wiirannya ule ukatyuule, masi ciicammo citthu caahala wiirannya wahoolo, uwakati waahalaawe wunwelelihiya ni waahalaawe utteeliya nrima nlattu wonttottopela Yehova mpaka. Phimaana, Isaalimu 37:10, 11, 29 inaaca ukati wantikhiyaaya ayo moolumwaayo, nlaponi yo Isarayeli, masi ciicammo inaaca ukati Nluku unhalaawe wiirannyeeha inatiri cawe.—Nwehe iparaagarafu 8 yo mwaha uneera “We unhala ukhala Upeephoni wamoca ni miivano” nhina yeela irevisteela.

Isaalimu 61:8 ni iveerusu cikhwaawe coolattanaca niiyo cinawoonihera wiira Davidi aapheela unttottopela Yehova muukumini wawe motheene. Ni ayo moolumwaayo anawoonihera itthu Davidi inhalaawe upanka wahoolo onwelelihiyaka ni Yehova.