Ucara wo Maaci Menci—Aamwiwelenle Nluku Tipani?

Ukathi wa Nowe, atthu enci yaapanka citthu coohiloka. Uphattuwaca 6:5

Atamu ni Hawa yaahayara asaana, ni atthu yaahenciva. Malayikha makinaku yahotakanela ni Sotwani aathanlile untapanana Nluku ni yaahowa watuniyani.

Ayo yahetatusa apinaatamu ni yahaathela athiyana. Athiyana yahaayara asaana ootikiniha, yaari okuru ni ananttevo.

Ituniya yahocara atthu yaapanka citthu coohiloka. Ibiiblya inhimya: “Uhiloka waapinatamu wahenciva watuniyani ni wuupuwela woothene wo wanrimani waari woohiloka uwakathi woothene.”

Nowe ahomwiwelela Nluku ni ahoteka ikalawa yuulupale. Uphattuwaca 6:13, 14, 18, 19, 22

Nowe aari nlopwana oorera nrima. Yehova ahomwirela Nowe wiira naarwa waatankanya atthu oohiloka waahalaaya ucara maci menci watuniyani.

Nluku ahomwiirela-tho Nowe wiira ateke ikalawa yuulupale yeehaniya arka, akele uyo naamucyaawe ni enama co khula nkwaratathi.

Nowe aahahimerya atthu wiira unaawa Ucara wo Maci ntuniyani. Masi ayo khayamwiwelenle. Akina yaananthya; akhwaawe yanaarusiya.

Wamalihalyaawe uteka arka, Nowe ahokusa enama ni ahokeliha mommo.