Ikalawa ya Nowee

Unavinreene ukati, ituniya yahocara atthu, masi encyaayo yaari ootakhala nrima. Mpaka malayikha makhwaawe yahokela nrima woohinamaana. Ayo malayikhaayo, yahokhuma wiirimu, yahowa watuniyani ni yaheetatusa apinaatamu. Nnaacuwela nlattuni yaapankaaya commo? Kontha ayo yaapheela waathela athiyana.

Ayo malayikha ootakhalaayo yahaayara asaana. Asaanaayo yahonnuwaca, yaari okuru, waanaacivela nkhitto ni yanaahuviha apinaatamu. Masi Yehova aaholakela umaliha citthu cootakhala caavariya ule ukatyuule. vano ahopanka iporokaraama yoocariha maaci ntuniyani motheene wiira aamalamalihe atthu otheene ootakhala nrima. Nnaacuwela iyo inanna yomaciiyo? Yehova ahowaana ipula yinci, yokuru, yaacarihile maaci ntuniyani motheene.

Masi ahaavo nlopwana mmoca ooreera nrima ni anfenta Yehova. Ncina nawe eehaniya Nowee. Uyo ahaana amwaarawe ni ahaana asaana araru, macinaaya phaala: Sem, Kaa ni Jafee, khula mwaana ahothela. Yehova aapheelela umoopola Nowee nkhayi naamucyaawe ukati woowaana ayo maacyaayo ayo maacyaayo. Phimaana Yehova aahomwiirela Nowee wiira ateke ikalawa yuulupale yaahala uphempa mmaacinimmo. Ni Yehova aahomwiire-la tho Nowee wiira ahele inama cinci nkalawanimmo wiira cihikhwe ukati waahalaaya ucara maaci.

Nowee naamucyaawe yahopacera uvara nteko wooteka ikalawa. Ayo yaahoteka iyo ikalaweeyo yattharihaka mananna yaarumiyaaya ni Yehova ni yaamalihile cinaattamenle myaakha 50. Ciicammo, ukati Nowee aatekaawe iyo ikalaweeyo, anlalyaa ihapari comaana caahimya wiira wanhala uphiya ukati ituniya yaahalaaya ucara maaci. Hataa amananihaka ulalyaa, khaavo aamwaamini.

Vano wahophiya ukati wookela nkalawani. Nnaacuwela itthu yeerannyeele ukela waya nkalawani?