Ntekoni anvaraaya aruminya o wanlokoni?

Ibiiblya inaahimya miphwinko miili caalopwana makristau ankavihera miteko wanlokoni: “ahooleli ni aruminya o wanlokoni.” (Afilipo 1:1) Maloko menci ahaavo ayo mayamunnaayo. Aruminya o wanlokoni annikavihera cani?

Ayo anaakaviha mahumu anhoolela nloko. Aruminya o wanlokoni pooti ukhala amirawo awula oolupale, ayo ahaana upatthani woolipa ni Yehova ni ankhala alopwana ookhuluvelya ni owiikurumica. Anaavara miteko co wanlokoni cofayita, masi cintepaaya uvara cinkhale miteko co mmatatani. Coo, inaawiiriha mahumu utepa uwacera paasi miteko cirinaaya cikhanle wiitthuciha ni uhoolela nloko.

Ayo anaavara miteko cofayita wanlokoni. Aruminya o wanlokoni akiina anaathanliya ukhala anamathoonyera mapuro wiira awaakhelele ale anwa mmikutthaanoni. Ahaavo akiina antafiti ikaruma cooruma ni cowoonihera ividiyu co wanlokoni, utafiti micanko co wanlokoni, ukawa ilivuru ni waakawela mayamunna micoko coohala ulalyeera. Ayo ciicammo anaakavihera ulokihaca Isalau yo Umwene. Ni mahumu pooti waalepela waakavihera mapwaapwaawe. Aruminya o wanlokoni anaavara miteko cotheene cinruminyaaya ninrimaaya wotheene ni iyo inawaapankiha uhisimiya naatthu otheene.—1 Timotiyu 3:13.

Ayo anaavaha ntakihero nomaana naalopwana makristau. Aruminya o wanlokoni anthanliya nlattu wo makhalelwaaya omaana oominepani. Yapankaka miphantte mmikutthaanoni, anaalipihaca waamini wihu. Nlattu woovaha ntakihero nomaana wuulalyeerani, ayo anaanikurumica wiira nihihiyerere ulalya. Nlattu woothoonyera ukhala atthu ootthuna uruminya ni ukhuluvelya, aruminya o wanlokoni anaanikavihera utteeliya wihu ni waataana wihu wanlokoni. (Efesu 4:16) Waviraka ukati, aruminya o wanlokoni ookhomaala pooti uthanliya ukhala mahumu.

• Alopwanani anthanliya ukhala aruminya o wanlokoni?

• Aruminya o wanlokoni ankavihera cani nloko wiira neette saana?