Manannani annikaviheraaya mamootoli o isirikwiitu?

Parnape ni apostolu Paulu anaaromoliya imaara cinci nhina Cowantikhiya Ceekristau ni Iluuka Ikereeku. Ayo yaari mamootoli o maloko o iseekulu yoopacera. Kontha isiyani? Ayo yaapheela wiira mayamunnaaya makristau akhale saana. Apostolu Paulu enre wiira aanaapheela “uturuwela ni waathotola mayamunna” wiira awoone ciryaaya. Uyo khuwanheeri weetta ikiloometuru coopwahaka 100 wiira arwee aalipihace mayamunnaawe. (Miteko 15:36) Ilelo, iyo phi itthu mamootoli o isirikwiitu impheelaaya cinene upanka.

Ayo anaanilipihaca nrima. Khula mootoli o isirikwiitu nawootola maloko ookhalaka 20, avirihika isumana imoca khula nloko ni khula mwaakha ootolaka imaara piili khula nloko. Ninaaphwanyera ifayita ucuwelaca wo ala mayamunnaala nkhayi ni asaaraya, yakhalaka oothela. Ayo anawiikurumica wiira yaacuwele mayamunna o wanlokoni, amirawo awula oolupale ni unawaacivela ulalyeera nkhayi ni ciicammo urwaa mmawannyaya ale anaasomaneehu Ibiiblya. Mamootoli o isirikwiitu anaarwaaka nkhayi ni mahumu waathotola mayamunna wiira yaalipihe, ni anaataphulelaka myaha coonivara nrima mmikutthaanoni ni mmithukumanoni cuulupale wiira anilipihace.—Miteko 15:35.

Ayo anawaawacera atthu otheene. Mamootoli o isirikwiitu anaawacera venci maloko nhina wo makhalelo oominepani. Ayo anaathukumana ni mahumu ni aruminya o wanlokoni wiira woopeliye mwaha inanna nineettaaya nloko, ciicammo anawaavaha ikano wiira awacere saana miteko cirinaaya wanlokoni. Ayo anawaakavihera mapiyoneeru ucuwela inanna yoovara ntekwaaya saana, ni hataa unawaacivela waacuwela ale anwaale naanaano wanlokoni no makristau ni ucuwela-tho wakhala wiira aneera yareerihaka makhalelwaaya oominepani. Ayo mayamunnaayo anawiivaherera ‘uvara miteko woohihiyerera’ wiira anikavihere. (2 Akorintu 8:23) Unaareera khweeli utakiha waamini ni wiivaherera waya wa Nluku.—Maberewu 13:7.

• Kontha isiyani mamootoli o isirikwiitu anootolaaya maloko?

• Nnohala uphwanyera cani ifayita wootola waya?