Mphwinko wo Mahumu Unhoolela unvara cani miteko caya mahukwaala?

Iseekulu yoopacera, ikhurupu yankaani yo ‘maapostolu ni mahumu uYerusalemu’ phaarii mphwinko waahoolela maloko otheene o makristau oothanliya ni waalakela iketteloni cuulupale caahala utthariya. (Miteko 15:2) Ayo yaanaarumelelihana ikettelo caalakelaaya kontha yavarelaka nteko Cowantikhiya Cowaarya ni yakaviheriyaka ni nnepa wootteela wa Nluku. (Miteko 15:25) Mahukwaala nintthariya nenno ntakiheronno.

Uyo mphwinkooyo Nluku phinvarelaawe nteko wiira apanke impheelaawe. Mayamunna oothanliya ampanka mphantte wo Mphwinko wo Mahumu Unhoolela anaawacera cinene Nuulumo na Nluku ni ahaana ucuwelaca nhina wo myaha co mbiiblyani ni cimphwanyiha ifayita . Ayo anaathukumana khula isumana wiira yoopele mwaha citthuni comminepani cinaathwa mayamunna o ilapo yotheene. Toko iseekulu yoopacera, uyo mphwinkooyo unaavaha malakihero ankhuma mbiiblyani, yantikhaka iwarakha, yaarumaka mahooleli o isirikwiitu ni atthu akhwaawe. Ala manannaala anawaakavihera apoovu a Nluku ukhalana inanna imocaaru yowuupuwela ni yoolakela upanka itthu. (Miteko 16:4, 5) Mpwinko wo Mahumu Unhoolela unaatthenkaca iyoolya yomminepani, unaakurumica nteko woolalyeera wo Umwene ni unaahoolela uthanliya wo mayamunna wiira naayo aphwanye ukhuluveliya uhoolela nhina mumphwinkoni wa Yehova.

Uyo mphwinkooyo untthara malakihero o nnepa wootteela wa Nluku. Mphwinko wo Mahumu Unhoolela unaatthara malakihero a Yehova, khanle Nkhulupale ooverihela o Ituninya Yotheene, ni malakihero a Yesu, ule khanle Muru wo nloko weekristau. (1 Akorintu 11:3; Efesu 5:23) Ale ampanka mphantte wo uyo Mphwinkooyo khaniicoona ukhala ahooleli aapoovu a Nluku. Ayo ni makristau akinaku oothanliya, ‘antthara Ikhontwaa khula nipuro inrwaaya.’ (Apokalipise 14:4) Mphwinko wo Mahumu Unhoolela unaalemeliha ni unaasukhuru venci ulompa wihu wiira ukaviheriye.

• Taapani yaapanka mphantte wo mphwinko wo mahumu waahoolela iseekulu yoopacera?

• Inannani Mphwinko wo Mahumu Unhoolela ilelo unttharaaya malakihero a Nluku?