MPANTTA 54
“Ipottha yookhuluvelya ni yankhili” isiyani ni ntekoni unvaraaya?
Yesu phiri nhooleli o nloko neekristau. (Efesu 5:23) Nna co, uyo ri wiirimu ni naryeene wonwo, nawaavaha malakihero attharyaawe va watuninyani va avarelaka nteko “ipottha yookhuluvelya ni yankhili.” (Nsome Matewus 24:45.) Yesu phithanlile ipottha ni uyo phivahile ukhulupale urinaaya. Hataa ikhalanaka ukhulupale, iyo ipottheeyo inonvarela nteko Kristu ni mayamunnaawe. Tipani khanle “ipottha yookhuluvelya ni yankhili” ni manannani iyo inniwaceraaya?
1. Tipani khanle “ipottha yookhuluvelya ni yankhili”?
Yehova ikhumelo yo khalayi nanthanlaka nlopwana awula ikhurupu yaalopwana wiira yaavahe malakihero apoovwaawe. (Malakiya 2:7; Maberewu 1:1) Ukhwa wawe Yesu, maapostolu ni mahumu yaakhala u Yerusalemu uyo phi nteko waavaraaya. (Miteko 15:2) Iyo phi itthu ineerannya mahukweehwaala. Yehova naavarela nteko ikhurupu yankaani yo mahumu wiira inivahe iyoolya yoominepani ni wiira iwacere nteko woolalyeera. Iyo ikhurupu yo mahumwiiyo phi Mphwinko wo Mahumu Unhoolela wo Masaahiti a Yehova. Ayo phikhanle “ipottha yookhuluvelya ni yankhili ivahaceriye ni [Yesu], Apwiiyaaya,” wiira iwacere nnyo mitekonnyo. (Matewus 24:45a) Otheene ale ampanka mphantte wo Mphwinko wo Mahumu Unhoolela akhanle makristau oothanliya ninnepa wowaarya. Yakhwaaka ni yonwelelihiyaka, ayo ankoolamulela nkhayi ni Yesu Kristu wiirimu.
2. Manannani ipottha yookhuluvelya inaavahaaya iyoolya yo mminepani apoovu a Yehova?
Yesu enre wiira ipottha yookhuluvelya yanhala “waavaha iyoolya [attharyaawe] ukati umpheelaaya.” (Matewus 24:45b) Khampa iyoolya innikaviheraaya ukhomaala mwiirutthuni ni unikavihera ukhalana ukumi womaana, iyoolya yo mminepani, awula malakihero o nnuulumoni na Nluku, anaanivaha ikuru cimpheeleehu wiira nihihiye wiiwelela malamulo a Yehova ni uvara nteko unihiyenryaawe Yesu. (1 Timotiyu 4:6) Ninaakhela iyo iyoolya yo mminepaniiyo mmikutthaanoni, mmamithukumanoni cosirikwiitu, mmakonkereesuni, mmalivuruni ni mmavidiyuni cinooluma myaha co mbiiblyani. Iyo iyoolya yo mminepaniiyo inaanikavihera ucuwela itthu impheelaawe Nluku ni ulipihaca upatthaniihu nuuyova.
MUNCERERE WIITTHUCA WINYU
Moone kontha isiyani unaareera ukaviheriya ‘niipottha yookhuluvelya ni yankhili’—awula ni Mphwinko wo Mahumu Unhoolela.
Mphwinko wo Mahumu Unhoolela unawaawacera Masaahiti a Yehova amphwanyannya ntuninyani motheene, waavahaka iyoolya yo mminepani, malakihero ni waakaviheraka niinanna cikhwaawe
3. Apoovu a Yehova ahaana yakhalaka oothotokannya
Wattharihaka malakihero a Yesu, Mphwinko wo Mahumu Unhoolela unaathotokaniha nteko woolalyeera unvaraaya Masaahiti a Yehova. Iyo phi itthu yaapankaaya makristau okhalayi. Moone IVIDIYU.
Nsome 1 Akorintu 14:33, 40, ni mwamalihaka usoma, moopele mwaha nna nikohonna:
Nnya iveerusunnya cinthoonyihera cani wiira Yehova nopheela wiira apoovwaawe akhale oothotokannya?
4. Ipottha yookhuluvelya ni yankhili inaathotokaniha nteko woolalyeera unvareehu
Nteko woolalyeera phi itthu yaatepaaya uvaha ifayita makristau oopacera. Nsome Miteko 8:14, 25, ni mwamalihaka usoma, moopele mwaha ala makohwaala:
Phaapani yaawacera nteko woolalyeera waavaraaya makristau okhalayi?
Niireke apostolu Peturu ni Joau yahotthuna nlakihero naavahiyaaya ni maapostolu akhunanaya?
Nteko wootepa ukhalana ifayita unvaraaya Mphwinko wo Mahumu Unhoolela, ukhanle uhoolela nteko woolalyeera. Moone IVIDIYU.
Yesu hothoonyihera wiira ulalyeera ukhanle nteko wootepa ukhalana ifayita. Nsome Markus 13:10, ni mwamalihaka usoma, moopele mwaha ala makohwaala:
Kontha isiyani Mphwinko wo Mahumu Unhoolela unoonaaya utepa ukhalana ifayita nteko woolalyeera?
Kontha isiyani “ipottha yookhuluvelya ni yankhili” unaareera wanthotokanihaaya nteko woolalyeera unvariya ntuninyani motheene?
5. Ipottha yookhuluvelya inaanivaha malakihero
Mphwinko wo Mahumu Unhoolela unawaavaha malakihero makristau amphwanyannya ntuninyani motheene. Masi manannani cinlakelaaya malakihero anvahaaya? Moone mananna mphwinko wo mahumu waahoolela khalayi caapankaaya iyo itthwiiyo. Nsome Miteko 15:1, 2, ni mwamalihaka usoma, moopele mwaha ala makohwaala:
Isiyani yankhumelelihile nanrokottole iriyari wo makristau okhalayi?
Phaapani apostolu Paulu, Barnabe ni atthu akhwaawe yaarweelyaaya uwoonanana wiira ammalihace nanrokottole aakhumelenle?
Nsome Miteko 15:12-18, 23-29, ni mwamalihaka usoma, moopele mwaha nna nikohonna:
Mphwinko wo mahumu waahoolela uwakati wo maapostolu uhinaaya ulakela itthu, waapaca waavyaavya ucuwela malakihero a Nluku nhina uyo mwahooyo. Manannani waapankaaya iyo itthwiiyo?—Moone iveerusu 12, 15, ni 28.
Nsome Miteko 15:30, 31 ni 16:4, 5. Mwamalihaka usoma, moopele mwaha ala makohwaala:
Niireke makristau okhalayi yaheewelela malakihero yaavahiyaaya nimphwinko wo mahumu waahoolela ule uwakatyuule?
Manannani Yehova caacaalihilyaawe ayo makristawaayo nlattu wo wiiwelela waya?
Nsome 2 Timotiyu 3:16 ni Tiyaku 1:5. Mwamalihaka usoma, moopele mwaha nna nikohonna:
Mphwinko wo Mahumu Unhoolela mahukwaala manannani unlakelaaya citthu?
ATTHU AKIINA ANEERA: “Nyuuva mweewelelaka Mphwinko wo Mahumu Unhoolela, nnohala waatthara apinaatamu.”
Nyuuva nnaakupali wiira Yesu phinhoolela Mphwinko wo Mahumu Unhoolela? Kontha isiyani?
UTHIKILELA
Mphwinko wo Mahumu Unhoolela phikhanle “ipottha yookhuluvelya ni yankhili” ithanliye ni Yesu Kristu. Ayo mayamunnaayo anawaavaha malakihero ni iyoolya yoominepani makristau amphwanyannya ntuninyani motheene.
Wuupuwela
Tipani thanlile “ipottha yookhuluvelya ni yankhili”?
Manannani Mphwinko wo Mahumu Unhoolela cinniwaceraaya mahukwaala?
Nyuuva nnaakupali wiira Mphwinko wo Mahumu unhoolela phikhanle “ipottha yookhuluvelya ni yankhili”?
MWAPHEELAKA UCUWELA CITTHU CIKIINA
Moone mananna Mphwinko wo Mahumu Unhoolela unvaraaya nteko mahukwaala.
Moone citthu cimpankaaya Mphwinko wo Mahumu Unhoolela wiira waavahe apoovu a Yehova iyoolya yoominepani yokhweeli.
Mphwinko wo Mahumu Unhoolela uniicoona cani nlattu wo nteko uvahiyaaya ni Yesu?
Manannani mikutthaano ni ikonkereesu cihu cinthoonyiheraaya wiira Yehova neera eettiheraka Mphwinko wo Mahumu Unhoolela?