MPANTTA 10
Unhala Ucuwelela Cani Uswali Wokhweeli?
1. Ittiini yokhweeli irii imoca paahi?
“Mwaaweheehe maprofeta owootha.”—MATEWUS 7:15.
Yesu aawiitthucihale attharyaawe ittiini imoca paahi. Yokhweeli. Iyo irii khampa iphiro impiiha wuukumini. Yesu ahohimya: “Vakani phanoonelela.” (Matewus 7:14)Nluku nokupali uswali woottharelelihiya Nuulumonawe nokhweeli. Answali wookhweeli oothene anaamini itthu imoca.—Unsome Joau 4:23, 24; 14:6; Efesu 4:4, 5.
2. Yesu aahimyale isiyani yo makristau owootha?
“Ayo anaahimyaca waatthuni wiira anancuwela Nluku, masi anonkhotta ni citthu cinpankacaaya.”—TITU 1:16.
Yesu ahohimya wiira maprofeta owootha yanaahala utthuttuwanihaca ikristau. Vatewaya, ayo ankhala toko answali ikhweeli. Ittiinicaya cineehimya ukhala ceekristau. Masi wanaakhitiryaa woonnyaa wiira ayo khanakhala makristau okhweeli. Kontha isiyani? Kontha ale answali wokhweeli ankhala makristau oocuwannyaa anthoonyera makhalelo ni meettelo omaana, anooniya woohirikarika ni atthu.—Unsome Matewus 7:13-23.
3. Unhala ukhitiri cani waacuwelela answali wokhweeli?
Uwehere mathoonyihero mathanu ottiini yokhweeli:
Anamaswali okhweeli anaahisimu Ibiiblya ukhala Nuulumo na Nluku. Ayoca anawiikurumica uttharelela Ibiiblya. Coo, ittiini yokhweeli ihovirikana ni ittiini inttharelela moolumo aapinaatamu. (Matewus 15:7-9) Anamaswali okhweeli khanlalya itthu imoca nuupanka ikhwaawe.—Unsome Joau 17:17; 2 Timotiyu 3:16, 17.
Atthari okhweeli a Yesu anaattittimiha ncina na Nluku, Yehova. Yesu holemeliha ncina na Nluku mwaha wowaahimerya atthu. Uyo haakavihera atthu uncuwela Nluku ni heetthuciha ulompa wiira ncina na Nluku nitteelihiye. (Matewus 6:9) Nipuro ninkhalaa weeva, ittiini phiivi inhimya ncina na Nluku?—nsome Joau 17:26; Arooma 10:13, 14.
Makristau okhweeli anaalalya Umwene wa Nluku. Yesu aaveleelihiye naapaapaawe wiira alalyee ihapari comaana co Umwene. Umwene wa Nluku ikhanlee itthu imoca inwehereraaya apinaatamu. Yesu aholalya Umwene yooyo mpaka waakhwalyaawe. (Luka 4:43; 8:1; 23:42, 43) Uyo ahohimya wiira attharyaawe yaanaahala ulalyaa Umwene. Awaka ntthu wapuwaniwaa uwuulumana myaha co Umwene wa Nluku, waarwaa wiira rii ittiinini?—Unsome Matewus 24:14.
Atthari a Yesu khankelakela myaha co ila ituniya yoohiloka. Weeva pooti waacuwelela nlattu wiira ayo khankelakela myaha cosiyasa awula uwanihana waatthu. (Joau 17:16; 18:36) Uhiya vaa, khantakiha meettelo aatthu oohiloka otuniya yeela.—Unsome Tiyaku 4:4.
Makristau okhweeli unaacuwaneeha ufentana. Ayoca aheetthuca mmoolumoni a Nluku waahisimu atthu okhula ikhapila. Ittiini cowootha iwora ikhwaawe cinaasovenriha ikhotto conlaponi, masi anamaswali okhweeli khampanka itthu manaka iyo. (Mikeya 4:1-3) Makristau okhweeli anaavarela nteko ihathuwacaya ni citthu cirinaaya yakaviheraka nuwaasovenriha akhwaaya.—Unsome Joau 13:34, 35; 1 Joau 4:20.
4. Unaakhitiri woonelela ittiini yokhweeli?
Ittiinini inlipiherera meetthuciherwaaya mbiiblyani, inttittimiha ncina na Nluku, inkhuwela Umwene wa Nluku wiira phi itthu imoca inwehereraaya apinaatamu? Mphwinkoni wo atthu unthoonyihera nifento ni unsempa ikhotto? Unoonela cani?—Unsome 1 Joau 3:10-12.