Nnohala Ukhitiri Caniukhala Mpatthani A Nluku?

1, 2. Toko cinhimyaaya iparaagrafu, phaapani yaari apatthannyaawe Yehova?

NTTHUNI nyuuva nnonthanleenyu wiira akhale mpatthaniinyu? Unawoonannya wiira nnonthanlaka ntthu noocivelani, nnomwiiwananeenyu awula ntthu rina makhalelo omaana ni anoocivelani.

² Yehova Nluku ciicammo nanthanla tipani nolamuliya ukhala mpatthannyaawe. Wootakihera, Yehova aheera wiira Aparahaamu aari mpatthannyaawe. (Isaiya 41:8; Tiyaku 2:23) Uyo ciicammo aanaaciveliya ni Davidi. (Miteko 13:22) Ni porofeeta Daniele aari ntthu “ofayita cinene” wamiithoni a Yehova.—Daniele 9:23.

3. Isiyani aparahaamu, Davidi ni Daniyele yaapankilyaaya wiira akhale apatthani a Yehova?

³ Waakhitiryeele cani Aparahaamu, Davidi ni Daniele ukhala apatthani a Yehova? Ayo yaari atthu owiiyeviha ni yammwiiwelela Nluku. Ayo phi atthu Yehova anoncivela ukhala apatthannyaawe. Ukati Yehova wonnyaawe wiira Aparahaamu ahomwiiwelela, uyo ahomwiirela: ‘Weeva uheewelela ncu naka.’ (Uphattuwaca 22:18) Ni ciicammo Yehova ahaahimyeera asarayeli isiyani yaalamuliyaaya upanka wiira akhale mpatthannyaaya: “Mwiiwelele ncu naka, ni miiva kinaahala ukhala Nlukwiinyu, ni nyuuva nnaahala ukhala apoovwaaka.” (Jeremiya 7:23) Phimaana, nyuuva mwapheelaka ukhala mpatthannyaawe Yehova, nhaana umwiiwelela.

YEHOVA NAWAAKAVIHERA ASIPATTHANNYAWE

4, 5. Yehova naakavihera cani apatthannyaawe?

⁴ Ibiiblya ineera wiira Yehova naapheela unkavihera ule nonkhuluvela ninrima wotheene. (2 Ikoronika 16:9) Isaalimu 32:8 inawoonihera wiira uyo nawaakavihera apatthannyaawe avaahaka ucuwelaca ni malakihero. Yehova naakhuluveliha eeraka: “Kinaahala wuulaka miithwaaka yuuweheehaka.”

⁵ Kontha isiyani hiiva ninaapheela ukaviheriya? Kontha haavo nwananiihu himpheela wiira hiiva nikhale apatthani a Nluku. Uyo nwanannyuuyo khanle Sotwani. Masi ale anonswalela Yehova ninrima wotheene ni ahinhiya umwiiwelela pooti ukhuluvela wiira Yehova naahala waakavihera. (Nsome Isaalimu 55:22.) Hataa yaananaka marikariko, ayo pooti ukhuluvela khampa Davidi, enre: “Akinhala uwuluwa.” (Isaalimu 16:8; 63:8) Nttwee noone isiyani Sotwani impankaawe wiira ahonone upatthani urineehu ni Nluku.

SOTWANI NAAWOOTHERYA ATTHU

6. Isiyani Sotwani yuulumacilyaawe awaacaka ale ampheela ukhala mpatthani a Nluku?

⁶ Nhina ikapiitulu 11, nihoona wiira Sotwani ahomootherya Yehova ukhala namootha. Uyo enre wiira yaari itthu yoohisariya Atamu ni Hawa uhilakela asineennyaaya yooreera ni yootakhala. Masi Sotwani khaamoothenrye Nluku paahi. Ihantisi ya Jó inawoonihera wiira uyo ciicammo howootherya otheene ale ampheela ukhala mpatthani a Nluku. Sotwani enre wiira atthu anonswalela Nluku kahi nlattu wonfenta, masi wiira avahiye iparakha. Mpaka Sotwani hoolumaca eeraka wiira uyo naakhitiri khula ntthu umwiiriha unrukunuwela Nluku. Nttwee noone isiyani Sotwani yampankilyaawe Jó ni manannani Yehova cankavihenryaawe Jó.

7, 8. a) Yehova aamoonela cani Jó? b) Isiyani Sotwani yoolumacilyaawe amwaacaka Jó?

⁷ Jó aari tipani? Jó aari nlopwana ookhuluvelya khanle myaakha cookhalaka 3.600 uttuli. Uyo aanonhisimu cinene Nluku ni yaanonrusa itthu yootakhala. Yehova aanonfenta Jó ni aheera wiira khaavo anlikanana Jó. (Jó 1:8) Unawoonannya wiira Jó aari mpatthani muulupale a Yehova.

⁸ Sotwani enre wiira Jó aari ntthu owiifenta mwaneennyaawe ni answalela Nluku nlattu wo iparakha caarinaawe. Sotwani ahomwiirela Yehova: “Khamunkhikicenre, hataa khankhikicenre inupaawe ni cotheene cirinaawe? Nhohela iparakha miteko cotheene cinvaraawe, ni watuniyani wotheene cicanre inama cawe. Masi nkattehani umwaakha citthu cotheene cirinaawe, mwaahimoone khweeli uyova awuulumakani pusya.”—Jó 1:10, 11.

9. Isiyani Yehova yanhilyaawe Sotwani upanka?

⁹ Sotwani enre wiira Jó answalela Yehova kontha ihaavo yaapheelaawe. Uyo ciicammo enre wiira pooti waahalaawe umpankiha Jó uhiya unswalela Yehova. Nluku ancuwela wiira cotheene nnyo caari citthu cowoothiya. Masi uyo ahonhiya imweene Sotwani anttehaka Jó. Kontha commo, phaahalaaya woonannya wakhala wiira Jó aari mpatthani a Nluku nlattu wonfenta awula kontha ihaavo yaapheelaawe.

SOTWANI NANKUMIHERA MASAKHA JÓ

10. Isiyani Sotwani yampankilyaawe Jó? b) Ni isiyani Jó yaapankilyaawe?

¹⁰ Sotwani aapacenre uhonona inama cotheene caarinaawe Jó. Cikinaku cahennyiya ni cikinaku caheevakaciya. Nuuwakatyaaya, Sotwani ahowiivakaca ananteko enci a Jó. Cahomalamala citthu cotheene caarinaawe Jó. Wowaakulela, Sotwani ahowiivakaca asaana 10 yaarinaawe Jó niiphyo yuulupale cinene. Uhookhararu commo, uyo khaahiyerenre umwiiwelela Yehova. “Motheene mmo, Jó khaatthekale ni khaamoothenrye Nluku umpanka itthu yoohiloka.”—Jó 1:12-19, 22.

11. a) Itthuni-tho Sotwani yampankilyaawe Jó? b) Isiyani Jó yaapankilyaawe umwiirannyeela waya iyo?

¹¹ Masi Sotwani kheemelenle vaava. Uyo aakupali wiira Jó awerennyaka anhala uhiya umwiiwelela Nluku. Phimaana uyo ahomwiirela Yehova co: “Nkattehani wunwusa ntataninyu ni mmoonihe yoowerya mmakhuvani wawe ni mwiirutthuni wawe, mwaahimoone khweeli uyova ahiyaka upanka ile inoocivelani.” Vano, Sotwani ahonwaanela iretta yowoopiha ni yoowerya cinene. (Jó 2:5, 7) Masi Jó khaahiile umwiiwelela Yehova. Uyo enre wiira khaahala uhiya umwiiwelala Yehova mpaka waahalaawe ukhwa.—Jó 27:5

12. Jó oonihenre cani wiira Sotwani namootha?

¹² Jó khaacuwela nlattuni waahuvaawe cineene. Uyo ooniha wiira Yehova phaakumihera masakha yankhumelela. (Jó 6:4; 16:11-14) Jó khaacuwela citthu cowoothiya Sotwani canhimyenryaawe Nluku. Uhookhalaru commo, Jó ahoonihera wiira Sotwani khanle namootha. Oonihenre manannani? Yaahonkhumelelaru masakha otheene, Jó khaahiile umwiiwelela Yehova. Vano, wahoonannya wiira Jó answalela Yehova nlattu wonfenta kahi nlattu woopheela itthu.

13. Uhihiya wawe Jó umwiiwelela Yehova, yeerannyeele isiyani?

¹³ Toko ciitthucileehu, hataa ukhalaka wiira Jó khaacuwela itthu yeerannya wiirimu, uyo khaahiile umwiiwelela Nluku. Upanka wawe commo isiyani yeerannyeele? Uyo ahoonihera wiira Sotwani khanle namootha ni khammoonela ikiriri ntthu. Ni Yehova ahonvaha iparakha Jó nlattu woohihiyerera umwiiwelela.—Jó 42:12-17.

SOTWANI CIICAMMO HOWOOTHERYANI NYUUVA

14, 15. Isiyani Sotwani iwoothenryaawe atthu otheene?

¹⁴ Kontha isiyani ikhanlyaaya itthu yofayita ucuwela ihantisi ya Jó? Kontha Sotwani khamootenrye Jó paasi. Uyo howootherya atthu otheene wiira anonswalela Yehova kontha ihaavo impheelaaya. Sotwani enre: “Pinaatamu naahala uvaha yotheene irinaawe nlattu wookumyaawe.” (Jó 2:4) Cinavinreene myaakha cinci Jó nakhwile, Sotwani khaahiile unthweela inaasi Yehova ni uwootherya ale yanswalela Uyova. Nhina ilivuru yo Miruku 27:11, Yehova naanilepela otheene cihu: “Ukhalane ankhili, mwanaka, wankitteelihaa nrima, wiira kimwaakhule ule nkiveehaca,” awula, nokirumpulaca.

¹⁵ Wiira nyuuva nthoonyere wiira Sotwani khanle namootha, nhaana nthanlaka umwiiwelela Yehova ni ukhala mpatthannyaawe ookhuluvelya. Ukhala mpatthani a Yehova phi itthu yootepa ukhala yomaana inlamuliyeenyu ulakela upanka, hataa ukhala wiira nyuuva nnaahala upanka marukunuso moolupale muukumini winyu. Sotwani enre wiira nyuuva nnaahala uhiya umwiiwelela Nluku yookhumelelakani marikariko. Isiyani impankaawe wiira amananihe uhonona upatthaniihu ni Nluku?

16. a) Manannani mararu Sotwani novarelaawe nteko wiira ahonone upatthani urineehu ni Yehova? b) Vano nyuuva moonelweenyu, isiyani-tho Sotwani pooti yaahalaawe upanka wiira ahonone upatthani urineenyu ni Yehova?

¹⁶ Sotwani nomananiha uhonona upatthani urineehu ni Nluku avarelaka nteko mananna oovirikanaca. Inanna yoopacera, uyo pooti unituphela “khampa kharamu neepa nrunkulu antothaka ntthu onkhura.”(1 Peturu 5:8) Phimaana, nhituthuwe mwawoonaka asipatthaniinyu, amuciinyu awula atthu akhwaawe yamananihaka wuutheperyani wiira nhiye usoma Ibiiblya ni upanka citthu comaana.a (Joau 15:19, 20) Yonayeeli, uyo “nawiittiyelelaca eekhalihaka nlayikha nowaarya.” Iyo maanaaya wiira uyo nawiiriha citthu coohinamaana ukhala khampa comaana apheelaka unithepwa paasi. (2 Akorintu 11:14) Yoneeraru, Sotwani nopheela nuupuweleke wiira khawankhitirya ukhala mpatthani a Nluku kontha hiiva naatthu oottheka cinene.—Miruku 24:10.

MMWIIWELELE YEHOVA

17. Isiyani inhala unikavihera umwiiwelela Yehova?

¹⁷ Wiira noonihere wiira Sotwani khanle namootha, hiiva nihaana namwiiwelelaka Yehova. Isiyani inhala unikavihera ukhitiri upanka iyo? Nifento. Ibiiblya ineera: ‘Unfente Yehova, Nlukwaa, ni nrimaa wotheene, ni iroohwaa yotheene, ni ikuru caa cotheene.’ (Deuteronomiyu 6:5) Nanfentaka cinene Yehova, unaahala utepa unicivela upanka ile impheelaawe. Apostolu Joau hantikha eeraka: “Unfenta Nluku unkhala wiiwelela citthu cinrumaawe; ni citthu cinrumaawe khacinlemela.”—1 Joau 5:3.

18, 19. a) Citthuni Nluku cihimpheelaawe wiira nipanke? b) Niireke unaakhitirya upanka marukunuso annilepelaawe Yehova?

¹⁸ Citthuni Nluku cihimpheelaawe wiira nipanke? Nnyo citthunyo cikinaku cimphwanyannya nhina ikwaaturu “Nthanye ile Yehova inthanyaawe.” Atthunaka nyuuva pooti wuupuwelaka wiira nnyo citthunnyo khacinakha cootepa utakhala, masi mwasomaka Ibiiblya ni moopuwelaka sana-saana itthu inhimyaaya, nnaahala woona wiira itthu yooreera upanka ukhanle umwiiwelela Yehova. Wiira nyuuva nkhitiri umwiiwelela, atthunaka nhaana nrukunusaka makhalelo omuukumini winyu. Hataa ukhalaka wiira wuupaceroni unaahala wuurikelani upanka ayo marukunuswaayo, nyuuva nnaahala ukhalana nnema ni utteeliya urinaaya apatthannyaawe Yehova. (Isaiya 48:17, 18) Masi niireke wiira unaakhitirya upanka ayo marukunuswaayo?

¹⁹ Iyee, kontha Yehova khannilepela upanka itthu ihinkhitiriihu. (Deuteronomiyu 30:11-14) Uyo khanle mpatthaniihu ni naanicuwela sana-saana uvikana inanna cineecuweleehu. Uyo naacuwela itthu inkhitiriihu ni ihinkhitiriihu. (Isaalimu 103:14) Apostolu Paulu aheera: “Nluku ookhuluvelyaa, ni uyova khanhala wuuhiyererani nttehiyaka wahinhaleenyu ukhitiri, masi mwattehiyaka, uyo ciicammo naahala upanka itthu, wiira nkhitiri uvilela.” (1 Akorintu 10:13) Pooti wankupaliihu wiira Yehova khanhala uhiyerera univaha ikuru cimpheeleehu wiira nikhitiri upanka itthu yomaana. Uyo naahala wuuvahani “ikuru cuulupale” wiira mwaanane marikariko anookhumelelani. (2 Akorintu 4:7) Paulu aanoonaka wiira Yehova anonkaviheraka. Phimaana uyo weerilyaawe: “Citthu cotheene kinkhitiri nlattu wa ule nokivaha ikuru.”—Afilipo 4:13.

NFENTE ILE INFENTAAWE NLUKU

20. Nnahiileene upanka citthu coohinamaana, isiyani-tho inlamuliyeenyu upanka? Kontha isiyani?

²⁰ Uhipanka-tho citthu Nluku cineeraawe wiira cikhanle cootakhala, ikhanle itthu yoopacera paasi. Cihaavo citthu cikinaku cinlamuliyeenyu upanka. (Arooma 12:9) Nyuuva ciicammo nnolamuliya ufenta ile infentaawe Nluku ni utakiha makhalelo arinaawe. Kontha isiyani? Kontha nnyo phi citthu cofayita cinonkavihera ntthu wiira akhale mpatthani a Nluku. Apatthannyaawe Nluku ahaana ‘nifento, utteeliya, nnema, uvilela, maana, unamaana, waamini, umaala ni wiivaraca.’ (Akalasiya 5:22, 23) Wiira mwiitthuce-tho makhalelo arinaaya apatthani a Nluku, nsome Isaalimu 15:1-5.

21. Isiyani inhala wuukaviherani ukhitiri utakiha makhalelo arinaawe Nluku?

²¹ Isiyani inhala wuukaviherani ukhitiri utakiha makhalelo a Nluku? Nyuuva nnolamuliya uleeri ni usoma Ibiiblya wiira ncuwele isiyani Yehova infentaawe. (Isaiya 30:20, 21) Upanka commo, nyuuva nnaahala uncuwela sana-saana ni nifento nirineenyu nuuyo ninaahala wunnuwa. Nno nifentonno ninaahala wuusovenrihani umwiiwelela ni utakiha makhalelo arinaawe.

22. Isiyani inhala wiirannya mwalakelaka umwiiwelela Yehova?

²² Uhiya upanka citthu cootakhala unlikanaca nuurula ikuwo yoomalamala. Iyo ikuweeyo akhanle “meettelo okhalayi.” Ni wancera upanka citthu comaana unlikanaca nuuwara ikuwo yonaanaano, iyo ikuweeyo akhanle “meettelo ophiyaaru.” Ibiiblya ineera wiira nihaana nipankaka iyo. (Akolosu 3:9, 10) Imaara ikhwaawe, unaarika upanka marukunusu. Masi Nluku naakhuluveliha waavaha “itthuvo yuulupale” ale ammwiiwelela. (Isaalimu 19:11) Nlakele umwiiwelela Nluku nlattu wonfenta. Isiyani inhala wiirannya mwapankaka commo? Nyuuva nnaahala ukhala mpatthani muulupale a Yehova ni nnaahala woonihera wiira Sotwani khanle namootha.