IHANTISI 16
Ihantisi ya Jó
Niireke ntthu ooreera nrima khaanonkhumelela masakha? Moone itthu yankhumelenle. Jó aacuweliye ukhala mpwanaawe Nluku, aakhala ilapo yeehaniya Uz. Aari thaciri ni ahaana imuci yuulupale. Jó aari ooreera nrima, anaakavihera atthu oohuva, anankhwele ni asaana ookhweliya asipaapaaya.
Jó khaacuwela wiira Sotwani anoona citthu cotheene apankaawe. Masi Yehova ancuwela wiira Sotwani anoona citthu comaana Jó apankaawe. Phimaana, ahonkoha Sotwani co: “Nlattuni unonwehesesaa nswalyaaka Jó? Watuniyani khaavo nonlikanana. kontha uyo nakiiwelela ni naapanka citthu comaana.” Vano Sotwani ahaakhula eeraka co: “Khweeli, kontha nyuuva nnaakhikicera ni khannohiya citthu cootakhala cinkhumelelaka. nhonvaha citthu cinci cooreera toko imatta ni inama. Nkattehani umwaakha citthu cotheene ni moone wakhala wiira khanhala wuunyanyalani.” Vano Yehova ahaakhula eeraka co: “Aaye unpanke khula itthu umpheela, masi uhimwiive.” Kontha isiyani Yehova anhiilyaawe Sotwani anttehattehaka Jó? Kontha Yehova anonkhuluvela Jó. Yehova ancuwela wiira Jó khaahala uhiya unkhuluvela Yehova hataa avirihaka marikariko.
Vano Sotwani ahopacera unkumihera masakha Jó. Yoopacera, inama cotheene ca Jó, cahennyiya ni cikiina cahopahiya ananteko otheene yaawacera nnyo inamannyo yaahokhwaaca. Yonayeeli, Sotwani ahokumihera itthu yootepa uriipiha nrima, asaana otheene a Jó ahowiivakaca wonkwaha mmoca. Ayoca yaarica nkhayi ni inupa yaamakacilyaaweeyo, yahaaphituwela. Jó ahoriipiya nrima venci ni citthu caamwiirannyeela, masi khaahiile umwiiwelela Yehova.
Sotwani aapheela wiira Jó ahuve venci. Phimaana, aheeriha irutthu yotheene ya Jó ukhalana maphurukutu ni makhwatta. Jó khaacuwela nlattuni yaakhumelelaaya masakha otheene ale. Waahookhalaru commo Jó khaahiile unkhuluvela Yehova. Phimaana, Yehova ahotteeliya cinene.
Nuuwakatyaaya, Sotwani ahowiiriha alopwana araru Jó aacuwelaawe, unhimerya citthu cowoothiya. Ayo alopwanaayo, yaahomwiirela Jó wiira ahontthekela Nluku. Phimaana, vano aaneera uttarusiya, Jó ahaakhula wiira aari hinapaca upanka itthu yootakhala, masi vano ahopacera wuupuwela wiira Nluku hankumihera ale masakhaale. Mpaka Jó aaholumaca eeraka Nluku khanpankela isariya.
Nlopwana mmoca eehaniya Eliwu, ahomaala aviriyanaka mwahooyo, vano aaholakela wuulumaca eeraka co: “citthu cihimilenyunnyo khacinakhala cokhweeli.” Hiiva pooti uhicuwelelela kontha isiyani Yehova hiilyaawe ciirannyaaka nnya citthunnya. Masi uhimya ikhweeli, Yehova khankumihera citthu cootakhala. uyo nawoona citthu cotheene cineerannya ni nawaakavihera atthu otheene anaaphwannya masakha.
Nuuwakatyaaya, Yehova ahomuulumana Jó eeraka co: “Kontha isiyani unoopuwela wiira himi kinookumihera ayo masakhaayo? Weeva khuncuwela mananna kaatanlyaaka irimu ni itthaya, vano unhala ucuwela cani itthu inwiiriha wuukhumelela ala masakhaala?” Jó aahoona wiira ahovonya ni ahaakhula eeraka co: “Yehova uhaana isariya. hiwee urina ikuru ntuniyani motheene. Ni miiva pinaatamu kihincuwela itthu. Sontte, ukilevelele itthu kihimilyaaka.”
Nuuwakatyaaya, Yehova ahonvoniha Jó, ni ahontthuvela citthu cinci uvikana nnye aarinaawe khalayi. Jó ahokhala myaakha cinci ni khaamala utteeliya. Yehova apankile commo, nlattu Jó woohihiya ukhala okhuluvelyaa hataa ukati wo masakha. Nhihiye ukhala mpatthani a Yehova hataa yookhumelelakani masakha.
“Nyuuva nheewa wuulumiyaka uvilela wa Jó ni nhoona mananna caacaalihiyaawe ni Yehova.”—Tiyaku 5:11