IHANTISI 10
Uwuupuwele amwaara a Lo
Aparahaamu aari titiyu a Lo ni ayo yaakhalaca nkhayi ilapo yo u Kanaa. Wahoolo, Aparahaamu ni Lo yahokhalanaca inama cinci. Phimaana, nipuro naakhalaaya khanaatosera para inama cotheene. Vano, Aparahaamu aahomwiirela Lo co: “Ukhala wiira nna nipuronna khanintosera wiira nikhalace nkhayi, nihaana nimwaryaanaka. Uthanleke unoocivela ni mi kinhala urwaa mphantte nkiinooyo?” Aparahaamu phaari muulupale, masi ahonhiya Lo upacera uthanla nipuro nomaana. Iyo inoonihera isiyani? Inoonihera wiira Aparahaamu aari ntthu ooreera nrima, keera?
Lo ahoona isittatti imoca yooreera yeehaniya Sotoma. Iyo isittattiiyo yahaavo maaci omaana ni malasi makithi ooreera. Lo ahothanla iyo isittattiiyo ni ahothamela wonwo nkhayi ni amucyaawe.
Yahaavo isittatti ikhwaawe yeehaniya Komora yaattamenle u Sotoma. Atthu yaakhala isittatti coopiili yaari ootakhala nrima. Phimaana, Yehova aholakela umalamaliha isittatti coopiili. Masi Nluku aapheela umoopola Lo nkhayi ni amucyaawe. Vano Yehova ahoruma malayikha meeli umwiirela Lo co: “Waakuve! Utthawele nipuro nikiina, kontha Yehova nopheela umalamaliha ila isittattiila.”
Masi Lo khaakuvenle ukhuma. Ukhala wiira Lo ampicapica. Malayikhaayo yaahonvarela uyova nkhayi ni amwaarawe ni asaanaawe ni yahancera waakumihera vate isittattiiyo. Uphiya waya vate, malayikhaayo yahokhuwela yiiraka: “Ntthawe wiira nhikhwaace! Ni nhiwehe uttuli. Mwawehaka uttuli, nnaahala ukhwa!”
Ayo yahotthawa ni yahophiya isittatti yeehaniya Zoar. Vano, Yehova ahowaana ipula yo mooro ni ahokwanyulaca isittatti yo Sotoma ni yo Komora. Masi, amwaarawe Lo khayaamwiiwelenle Yehova ni yahoweha uttuli. Unaacuwela isiyani yaakhumelenle? Ayo yahooma ni yahotathuwa nluku no maakha! Vano Lo ni asaanaawe eeli asithiyana yaahoopwa, kontha yahomwiiwelela Yehova. Masi ayo yahoriipiya nrima cinene, ukhala wiira amwaarawe Lo yaahonkhwa nlattu woohimwiiwelela Yehova. Iyo inaaniitthuciha wiira nihaana umwiiwelela Yehova ukati wotheene.
“Nwuupuwele amwaara a Lo.”—Luka 17:32