Yaakopi ni Esawu yaheewanana

Yehova ahomwiirela Yaakopi wiira anhala unkavihera khampa cankavihenryaawe Aparahaamu ni Isaaki. Yaakopi aakhala u Haraa. Uyo ahothela wonwo, ahaana asaana enci ni ahothaciri.

Nihuku nimoca, Yehova ahomwiirela Yaakopi co: “Uturuwele ilapo uyariyaa.” Phimaana, Yaakopi ni amucyaawe yahokhuma ile ilapweele ni yahancera weetta yarwaaka ilapo yaayariyaawe. Weettiyaka niiphiro, Yaakopi aahereliya ni anantekwaawe co: “Nnyeennyeennyu Esawu ri ciicammo niiphiro. Uyo nowaa uwoonananani nyuuva ni uyo ri niikhurupu yaalopwana 400!” Yaakopi ahoova cinene, kontha oopuwela wiira anhala upankiya itthu yootakhala nkhayi ni ammucyaawe. Phimaana, ahonlompa Yehova eeraka: “Sontte Yehova, unoopole wiira nnyeennyaaka hikipanke itthu yootakhala.” Waaseele, Yaakopi ahonveleelihera Esawu ikhontwaa, ipuri, imope, ikavalu ni apuuru wiira antteelihe nrima.

Nenne nihukunne uhiyu, Yaakopi nari veekhaawe, ahoona nlayikha! Yaakopi ahokhanyerera wira nno nlayikhanno nincaalihe nihinaaya urwaa. Phimaana, ahattakanana uhiyu wotheene, mpaka Yaakopi wuntyaa mwetto. Waahookhalaru commo, Yaakopi khaahiile waattakanana. Vano nlayikhanno nahomwiirela co: “Uhihiye kirwee.” Yaakopi ahaakhula eeraka: “Akinoohiyani, nhinakicaaliha.”

Yaakopi khoocyeele, mpaka nlayikhanno nahoncaaliha. Vano, Yaakopi ahokupali wiira khayaahala umwiirannyeela itthu yootakhala ni khaalamuliya umoova Esawu.

Nenne nihukunne uwicisu, Yaakopi ahomoona nnyeennyaawe Esawu awaaka nari nkhayi ni alopwana 400. Ukati waamwaattamenlyaawe, ahokhoroma vathi ikwaha 7, ooniheraka wiira nanttitthimiha. Vano Esawu ahorwaa wa Yaakopi, yahokapattana ni yahonlaca. Ukhuma ule ukatyuule, yahopacera wiiwanana. Unoonela cani? Yehova ahotteeliya ukati woonalyaawe itthu Yaakopi yaapankilyaawe ule ukatyuule?

Wahoolo, Esawu ahoturuwela uwannyawe ni Yaakopi ahoturuwela weetta nkwahaawe arwaaka ilapo yaayariyaawe. Yaakopi aarina asaana 12. Macinaaya yaari: Ruupeni, Simeau, Levi, Yuuta, Daa, Nafitali, Kaate, Aser, Isakar, Zebulau, Yusufu ni Benjamii. Mwana mmocooyo, Yusufu, ahocaalihiya ni Yehova wiira awoopole apoovu a Nluku. Manannani? Ninaahala woona.