Mavatta oovirikana

Isaaki aarina myaakha 40 ukati wanthenlyaawe Rebeka ni anonfenta cinene. Unavinreene ukati, Rebeka ahaayara mavatta, asaana eeli asilopwana.

Mwaana aapacenre uyariya eehaniya Esawu ni nkinooyo eehaniya Yaakopi. Masi Esawu khaaviriha ukati mwinci nari wapuwani, kontha ntekwaawe waari ulupattha inama. Vano Yaakopi anviriha ukati mwinci nari wapuwani aakaviheraka athumwaane ni anumwaane.

Ule ukatyuule, ntthu akhwaka, mihakhu cawe cinci aahalana mwaana ampacenryaawe unyara. Maanaaya wiira Isaaki akhwaaka, Esawu phaahala ukhalana iyo iparakheeyo. Ni kahi iyo paahi. Uyo aanaahala uhalana iparakha ikiina: iparakha yoomwiirannyeela citthu Yehova caamwiirenlyaawe Aparahaamu wiira cinaahala wiirannya. Masi Esawu khaawacera ni khoona ukhalana ifayita citthu Yehova cankhuluvelihilyaawe Aparahaamu. Vano Yakopi khaari commo. Uyo anwacera ni aanawoona ukhalana ifayita citthu cotheene Yehova caamwiirenlyaawe Aparahaamu wiira cinaahala wiirannya.

Nihuku nimoca, Esawu ahorwaa wuulupatthani ni aaturuwile inanvole itala cinene. Uphiya wawe wapuwani va, ahoona unukhela iyoolya yaapyaawe Yaakopi. Vano Esawu aahomwiirela co: “Ukivola itala, ukimeele iyoolyeeyo.” Yaakopi ahomwaakhula co: “Aaye, mi kinawuumeela, masi ukileveleke tokooni citthu cinhalaa uhiyeriya naapaapa khampa mwaana oopacera.” Esawu ahomwaakhula Yaakopi eeraka: “Nnyo citthunnyo cirina ifayitani? Pooti uhalana, mi akinanaata. Mi kimpheela ulya paahi.” Unoonela cani? Isawu ahopanka itthu yomaana? Mena. Khaapankile. Esawu ahakakhaniha itthu yofayita cinene niiparatho imoca yoyoolya paahi.

Isaaki ahooluvala ni wahophiya ukati wonvaha iparakha mwaana ampacenryaawe unnyara. Masi ukhala wiira Yaakopi ahotumiheriya iyo iparakheeyo niiparatho imoca yoyoolya, Rebeka ahonkavihera Yaakopi wiira acaalihiye. Ukati Esawu waacuwenlyaawe wiira mwaamunnawe phaacaalihiye, ahorusiya cinene ni aholakela umwiiva. Isaaki ni Rebeka yaapheela unkhikicera Yaakopi. Phimaana, yahomwiirela co: “Utthaweleke wa ataataa, Lapau. Wakhale wonwo mpaka Esawu ummaleleke urusiyanwo.” Yaakopi ahowiiwelela athumwaane ni anumwaane. Ahotthawa wiira hiiviye.