Nluku ahomuulumana Moceesi wamwirini waapharela

Moceesi ahokhala u Midiaa myaakha 40. Ahothela ni ahaayara asaana. Nihuku nimoca, alihaka ikhontwaa, waattamela umwaakoni Sinai, uyo ahoona itthu yootikhiniha venci. Mwiri mwankaani waanaapharela masi khawaavya. Ukati Moocesi aattamenlyaawe mwiryuuyo wiira oone itthu yeerannya, aheewa ncu niiraka: “Moocesi! Weemele vaava uryaa va, urule isantaaliya cannyo wiira uthoonyere uhisima nna nipuronna.” Yehova ahamuulumana Moocesi avarelaka nteko nlayikha.

Moocesi ahoova cinene ni aheettiyelela wiitho. Vano Yehova ahomwiirela co: “Mi kinaacuwela wiira asarayeli anaahuva, mi kimpheela waakumiha ni kaarwaane nipuro nihinhalaaya upankiya ipottha.” Mi kihothanla weeva Moocesi wiira waakumihe apoovwaaka Wiciipitu.

Ukhala wiira Moceesi anoova uyo ahonkoha Yehova co: “Vano apoovwaayo yaakikohaka wiira tipani kirumile waakavihera, kawiireleke cani?” Nluku ahaakhula eeraka co: “Wawiireleke Yehova, Nluku Aparahaamu, Nluku a Isaaki ni Nluku a Yakopi hikirumile.” Moocesi ahaakhula eeraka co: “Vano ayo yaahikaaminiki?” Yehova ahomoonihera wiira anhala unkavihera, amwiirelaka wiira ahiye nttonttwaawe vathi. Vano uyo ttonttooyo waahothatuwa inwaa, ni vano Yehova ahomwiirela Moocesi wiira avare mwiila wo inwooyo. Moocesi ahovara mwiilooyo ni inweeyo yahothatuwa nttontto. Vano Yehova aheera co: “Ukati asarayeli anhalaaya uwoona upankaka nnya citthunnya anaahala uwaamini wiira himi kuurumile.”

Vano Moocesi ahaakhula eeraka: “Mi akinkhitiri wuulumaca waatthuni.” Yehova ahomwaakhula co: “Kinaahala uwiitthuciha itthu yoohala wuuluma ni mwanhimaa Arawu, nohala urwaa nkhayi ni weeva.” Vano Moocesi ahaamini wiira Yehova anhala unkavihera. Phimaana uyova, amwaarawe ni asaanaawe yaahorwaa Wiciipitu.