Ihasara yoopacera mpaka yoneeraru

U Iciipitu, asarayeli yaanaavarihaciya miteko toko ipottha. Phimaana, Yehova ahonruma Moceesi ni Arawu urwaa umuulumana Farawoo ni umwiirela co: “Waahiye apoovwaaka wiira yakiswalele ilapo ikiina.” Masi Farawoo ari owiithenca, phimaana ahaakhula co: “Mi akimpheela wiiwa itthu Yehova yuulumilyaawe. Mi akinhala waahiya asarayeli yakhumaka!” Farawoo ahoviruwa ni ahoncerera miteko caavarihaciyaaya asarayeli. Nlattu wo iyo itthwiiyo, Yehova apankile isiyani? Yehova ahowaana u Iciipitu ihasara 10. Vano Yehova ahomwiirela Moceesi co:“Ukhala wiira khantthuna ukiiwelela, maaci otheene o mmoolokoni Niilu anaahala utathuwa iphome.” Umuulumana wawe Farawoo, Arawu ahaatta maaci o mmoolokoni Niilu ninttonttwaawe ni yahothatuwa iphome. Vano maacyaayo yaahancera unukha ni ihopa cotheene cahokhwa. Vano, maaci o mmoolokoni Niilu khayaalamuliya-tho uwuriya. Unookhalaru commo, Farawoo khaahiyale asarayeli ukhuma u Iciipitu.

Uvira waya isumana imoca, Yehova ahomwiirela Moceesi co: “Wamuulumane-tho Farawoo ni wanhimerye wiira aahaahiyeke apoovwaaka ukhuma, u Iciipitu wotheene anaahala ucara amarapi.” Vano, Arawu aheemesa nttonttwaawe ni u Iciipitu yahocara amarapi. Naayo yaahomwareela mapuro otheene toko mpaani, mmamikorini hataa mmaparathoni. Phimaana, Farawoo ahonlepela Moceesi umalamaliha iyo itthwiiyo. Farawoo aheera wiira aanaahala waahiya asarayeli ukhuma u Iciipitu. Yehova ahaamalamaliha amarapi otheene ni atthu o Iciipitu yaahaattottelaca amarapi otheene nuuwunkelaca mapuro menci ni ayo yannukha venci ilapo yo Iciipitu wotheene. Hataa yiirannyaaka iyo itthwiiyo, Farawoo khaatthuna waahiya asarayeli ukhuma.

Phimaana, Yehova ahomwiirela Moceesi co: “Umwiirele Arawu wiira aatte itthaya ni ntthupinno ninaahala uthatuwa isencema awula iphwilimwithi.” Upanka wawe commo cahokhumelela isencema cinci. Woona waya nnyo isencemannyo, atthu o Iciipitu yaahomwiirela Farawoo co: “Ila itthwiila Nluku phipankile ila!” Waahookhalaru commo, Farawoo khaahiyale asarayeli ukhuma.