Ihukhumu yoomalela

Moceesi ahonhimerya Farawoo wiira khaahala uturuwela-tho. Masi hinaaya ukhuma ahomwiirela Farawoo co: “Uhiyu iriyari wo ileelo, asaana oopacera uyariya otheene o Wiciipitu anaahala ukhwa. Khiivo imuci inhala uhala, ukhumelo weeva mpaka niipottha ca nnyo.”

Vano Yehova ahaaruma asarayeli wiira ule uhiyuule atthenkace iyoolya yomaana cinene awiirelaka co: “Nhite ikhontwaa awula ipuri yonlopwana irina mwaakha mmoca, vano iphomyaayeeyo nttikithele wankhorani winyu ni inameeyo pooti ukhuura ni iphaawu coohiheliya ifermentu. Nkhale owiitthenkaceene wiira nkhume. Ula uhiyu woleeloola kinawuukumihani Wiciipitu.” Unawoonannya wiira asarayeli yaari ootteeliya cinene yuupuwelaka wiira yanhala ukhuma Wiciipitu.

Uhiyu iriyari wo nne nihukunne nlayikha na Yehova nahopacera uvira inupa cotheene ca atthu o Wiciipitu. Inupa nlayikhanno nahoonaaya iphome wankhorani, nankela mmpaanimmo ni nammwiiva mwaana oopacera. Masi ukati woonaaya inupa coottikitheliya iphome, nno nlayikhanno naavira nculu awula khanaakela mpaanimmo. Phimaana, atthu otheene o Wiciipitu ikhumelo atthu oohuva mpaka naale oopuha yahokhweliya asaana yaapacenryaaya waayara. Masi asaana oopaceriya ooyariya ni asarayeli khaakhwile hataa mmoca.

Mpaka mwaana oopacera a Farawoo ahokhwa ni khaakhitiri-tho uvilela. Phimaana, uyo ahomwiirela Moceesi na Arawu co: “Weeva naapovwaayo ukhumiye mu! Nkhumace mwanswaleleke Nluku cinyuuyo. Nkuse inamacinyunyo nkhumace!”

Yoole uhiyoole mweeri upheelaka ukhuma asarayeli yahokhuma Wiciipitu. Vano ayo yeetta ikhurupu ni yahaavo alopwana 600.000 waahela nhina athiyana ni asaana, hataa ale yahaari asarayeli yaahothara wiira yanswalele Yehova. Vano ayo yaahokhala ootaphuwa.

Wiira ahiliyale nihuku Yehova akumihilyaawe Wiciipitu, myaakha cotheene asarayeli yaanoopuwelela iyoolya yaalilyaaya ule uhiyuule, asarayeli yeehana iyo iyoolyeeyo Paasikuwa, maanaaya “uvira waculu”.