Ihasara cikiina 6

Moceesi ni Arawu yahorwaa-tho umuulumana Farawoo amwiirelaka co: “Nluku enre wiira mwaahaahiyeke asarayeli ikhumaka mu, uyo naahala ucariha u Iciipitu iphempele cuulupale cooluma cineehaniya malimwe.” Vano, inupa cotheene co Wiicipitu yahokela malimwe. Masi ayo khayaakenle inupa ca asarayeli. Ile ihasareele ni ihasara cikhwee cotheene cawiiranyeenle paahi atthu o Iciipitu. Ukati Farawoo wonnyaawe iyo ihasareeyo, ahomwiirela Moceesi co: “Unlepele Yehova wiira amalamalihe ala malimwaala ni kinaahala wuuhiyacani wiira nkhumeke.” Vano Yehova umalamaliha wawe ayo malimwaaho, Farawoo khaahiile asarayeli ukhuma.

Phimaana, Yehova aheera co: “Wakhalaka wiira Farawoo khanaahiya apoovwaaka ukhuma, inama cotheene co Wiicipitu cinaahala uwerennya ni ukhwaaca.” Waasilyaaya iyo itthwiiyo yaheeranyaa. Inama ca asarayeeli paahi pahaakhwile, masi co atthu o Wiicipitu cahokhwaaca. Farawoo ahocuwela iyo itthwiiyo masi ukhala wiira ari ntthu oohunya maaru, ahokhotta waahiya asarayeelyaayo akhumaka.

Vano Yehova ahomwiirela Moceesi wiira ahaana uhawula ittuura ni uvonyera uhoolo wa Farawoo. Upanka wawe commo, nno nipuronno nahocara ntthupi. Ukati ittuureeyo yaapaceraaya umalamala, atthu o Wiicipitu wamoca ni inama caya yahokhalana makhwatta. Cahowiiranyaaru nnyo citthunnyo Farawoo khaahiile asarayeli akhumaka.

Yehova ahonruma Moceesi wiira anhimerye Farawoo co: “Ukhala wiira khunttuna waahiya apoovwaaka akhumaka, meelo uwicisu kinaahala uwaana ipula yo maluku ogeelu.” Usa waya, Yehova ahowaana ipula yo maluku ogeelu, iphyoo, uverunya ni itari. Nnyo citthunnyo, caari cihinapaca wiirannya u Iciipitu. Iyo ipuleeyo yaheevakaca miri cotheene ni citthu caaliye mmamattani. Masi nipuro naakhalaaya asarayeeli khayeerannyeele itthu. Vano Farawoo ahomwiirela Moceesi co: “Unlepele Yehova wiira eemese ila ipuleela, nnaahala ukhumaca.”Yehova aheemesa ipuleeyo, masi woona wawe wiira Yehova heemesa ipuleeyo, Farawoo ahopintta.

Vano Moceesi ahomwiirela Farawoo co: “Meelo, kinaawaana icoroope ni nnyo cinaahala ulya miri cotheene cihanlenle.” Vano usa waya, u Iciipitu cahocara icoroope cinci ni cahokhuura miri caahanle ni hataa miri ceema mihokorokho. Ukati Farawoo wonnyaawe yiirannyaaka iyo, aheera co: “Unlepele Yehova wiira amalamalihe nnya icoropennya.” Vano, Moceesi ahonlepela Yehova ni uyo ahomalamaliha icoroope cotheene, masi nanlelo Farawoo khaahiile uhunya maaru.

Nuuwakatyaaya, Yehova ahonruma Moceesi wiira ookolele ntata nawe wiirimu. Ukati Moceesi wookonlyawe, woohipica wahoripela cinene. Nwo uripelanwo wahoviriha mahuku mararu ni atthu o Iciipitu khayaakhitiri woona hataa itthu. Masi asarayeli yaari nipuro nowoonnya ni yankhala saana.

Vano Farawoo ahomwiihana Moceesi ni ahomwiirela co: “Weeva ni apoovwaayo pooti ukhumaca, masi inama cinyu khannolamuliya ukusa”. Vano Moceesi ahaakhula co: “Inama cihu ciicammo nihaana nikusaka, kontha phiinama cinhaleehu wiiva wiira ninvahe itthuvo Yehova.” Farawoo ahorusiya cinene ni ahokhuwela eeraka: “Ukhume va ni akimpheela uwoona! Kawoonaka, kinaawiiva!”