Asarayeli khayaapankile itthu yaakhuluvelihilyaaya

Yehova ahomwiirela Moceesi wiira awele waculu mwaako Sinai. Uyo ahomaliha mahuku 40 nari wonwo uthana ni uhiyu. Vano Yehova ahantikha malamulo 10 ofayita cinene wamalukuni oopwataala. Ayo malamulwaayo aneehaniya marumo 10.

Uvira waya ukati mwinci Moceesi hinawa, asarayeli yahopacera wuupuwela wiira uyo khaahala uwa-tho. Ayo yahomwiirela Arawu co: “Ninompheela ntthu nkhwaawe wiira anikumihe nipuronna vaa. Unipankele nluku.”Vano, Arawu ahaalepela asarayeli iwooru. Ukusa wawe nnyo iwoorunnyo, aahopaha ni ahompanka ttontto o mope yankaani. Ukati asarayeli waamonnyaaya uyo ttonttooyo, yahopanka ifesta yuulupale. Ni yahopacera unswalela yiiraka: “Ula phiri Nlukwiihu! Nikumihile Wiciipitu!” niireke asarayeli yaalamuliya upanka iyo itthwiiyo? Mena, khayaalamuliya upanka. Kontha ayo yahonkhuluveliha unswalela Yehova paahi. Masi khayaapankile itthu yaakhuluvelihilyaaya.

Ukati Yehova wonnyaawe nnyo citthunnyo, ahomwiirela Moceesi co: “Ukhuruwe woone asarayeli itthu impankaaya. Ayo ahohiya ukiiwelela.” Ahompanka nlukwaaya ni ananswalela.

Moceesi ahokhuruwa umwaakoni Sinai nacisile maluku meeli oopwataala yantikhiye marumo 10. Ukati waakhuruwaawe, uyo ahowiiwa apoovu yiipacaka, ukati waattamenlyaawe ahowoona apoovu yiinaka ni yanswalelaka ttontto o mope yankaani. Vano Moceesi ahoviruwa cinene ni mpaka ahopwesera vathi maluku oopwataala meeli yaacisilyaawe yantikhiye marumo 10. Uphiya wawe nwo, Moceesi ahonpwesakaca ttonttooyo ni ahonkoha Arawu co: “Waahiyenreni apoovu yuuthepyaka wiira upanke ila itthu yoohiiryeela?” Khawaalamuliya wiiwelela! Arawu ahaakhula eeraka co: “Sontte Moceesi, uhiviruwe. Weeva khunaatikhina ala apoovwaala ciryaaya. Ayo yampheela nluku, phimaana, kahaalepela uwaana iwooru. Mi kaahopaha iyo iwoorwiiyo ni waapankela ttonttwaayooyo!” Vano, Moceesi ahoturuwela-tho umwaakoni Sinai ni ahonlepela Yehova wiira aalevelele asarayeli

Yehova aalevelenle paahi ale yaapheela umwiiwelela. Nhoona? Yehova naavaha ifayita cinene namwiiwelelaka.