Ruti ni Nowemi

Ikwaha imoca yaavonlyaaya itala u Isarayeli, athiyana amoca yeehaniya Nowemi nkhayi naawannyaya yaahothamela u Mowapi wamoca naasaanaaya eeli. Masi uvira waya ukati, awannyaya yahokhwa. Vano asaanaaya yaahaathela asithiyana o Mowapi, nthiyana mmocooyo eehaniya Ruti ni nkhwaawyeeyo Orpa. Wooriipiha nrima, uvira waya ukati, asaana a Nowemi ooyeeli ciicammo yaahokhwaaca.

Ukati waacuwenlyaawe wiira u Sarayeeli yaahomala itala, Nowemi aaholakela uturuwela uwaani. Vano Ruti ni Orpa yaahonttharaca. Weettiyaka mphironi, Nowemi aahowirelaca ayo asithiyanaayo co: “Nyuuvaca khammala waafentaca asaanaaka wamoca ni miiva. Mi kimpheela wiira nthelaciye-tho. phimaana, pooti uturuwela waasipaapeenyu.” Vano asithiyanaayo, yaahakhulaca co: “Hi ninawuufentani nyuuva, phimaana khaninhala wuuhiyani.” Nowemi aahonkhanyereriha Ruti ni Orpa wiira aturuwele uwaani. Orpa aaholakela uturuwela uwaani ni waaswalela anlukwaawe. Vano Nowemi aahomwiirela Ruti ciicammo wiira antthare. Masi ukhala wiira Ruti aanonfenta cinene Nowemi, uyo ahaakhula eeraka co: “Mi akinoohiyani maama. Apoovwiinyu anhala ukhala apoovwaaka ni Nlukwiinyu nohala ukhala Nlukwaaka.”

Wuuluma wawe commo, Nowemi aahonhiya ni yaheettaca nkhayi mpaka uphiya u Sarayeli. Uphiya waya u Sarayeli, nihuku nimoca Ruti aahorwaa ukwakwatta icoro mmattani wa nlopwana eehaniya Powaasi, aari mwaana a Raabi. Powaasi aaheewa wiira Ruti aari mpatthani oofenta a Nowemi. Phimaana, powaasi aahowiirela anantekwaawe wiira anhiye Ruti ahephaka ncoro waahala umphiyera.

Ukati Ruti waaphiyalyaawe uwaani uneenle, Nowemi aahonkoha co: “Wakwakwatta vayini ileelo?” Ruti ahaakhula eeraka: “Mmattani wa nlopwana mmoca neehaniya Powaasi.” Nowemi aahomwiirela co: “Powaasi mmucyaaya awannyaka. Uhihiye ukwakwattaca mmattani wawe. Kontha nwo, khaavo noohala uwiiriha itthu yootakhala.”

Ruti khaahiyale uvara nteko mmattani wa Powaasi mpaka umaala uhephiya ncorooyo. Powaasi ahoona wiira Ruti aari nthiyana ooreera nrima ni oovara nteko cinene. Phimaana, Powaasi aahonthela ni yaahonyaraca mwaana eehaniya Opeti, vano uhoolo waya, aahokhala atataawe mwene Davidi. Asipatthannyaawe Nowemi yaahotteeliya cinene ni mpaka yaahomwiirelaca co: “Wuupaceroni, Yehova hoovaha Ruti oofentile cinene ni vano hoovaha ucuulu. Nttwee ninsukhurweele Yehova nlattu wo wuutthuvela ayo manannaayo.”