Ulompa wa Ana

Nlopwana mmoca eehaniya Elkana ahaathela athiyana eeli, Ana ni Penina. Masi uyo nlopwanooyo ancivela cinene Ana. Penina ahaayara asaana enci, masi Ana khaarina hataa mmoca. Penina khaahiya untarawaca Ana nlattu woohiyara. Myaakha cotheene, Elkana aanaacisa amucyaawe otheene wiira yanswalela Yehova u Silo wonwo waaryaaya itapernaakulu. Nkwaha mmoca anaryeene u Silo, Elkana ahomoona Ana neecukulelihile. Uyo ahosanka ni ahorwaa umuulumana Ana, masi waanookhalaru commo, khaakhanle ootaphuwa.

Nuuwakatyaaya, Ana ahorwaa ulompa. onlakoono, ahonlepela Yehova eeraka: “Yehova, mwakivahaka mwaana, kinawuukhuluvelihani wiira kinanwaana utabernaakulu wiira oovareleni nteko ukumyaawe wotheene.

Nankuttho Eli khaacuwela wiira Ana anlompa ni oopuwela wiira Ana hoohapaliya. Phimaana, ahomwiirela co: “Unvarani va? Uhoohapaliya?” Ana ahomwaakhula eeraka co: “Mena pwiiya, akihapaliye. Kihooriipiya nrima, phimaana, kiwaaka unlompa Yehova.” Eli ahoona wiira ahovonya, phimaana, ahomwiirela Ana co: “Yehova nawuuvaha itthu unlepenlyaa. Urweeke ninnema.” Unavinreene ukati, Ana ahonyara mwaana eehaniya Samuweli. Unawoonannya wiira Ana ahotteeliya cinene, khannaamini?

Ana khaaliyanle itthu yankhuluvelihilyaawe Yehova. Phimaana, Samuweli uhiya wawe waamwa, Ana ahonrwaana utabernaakulu. Uyo ahonvaha Eli eeraka co: “Nnawuupuwela wiira kaahonkhuluveliha itthu Yehova? Uyo haakhula ulompa waka akivahaka ula mwaanoola. Vano ula mwaanoola nohala uvara miteko ca Yehova ukumyaawe wotheene.” Khula mwaakha, Ana nkhayi ni awannyawe Elkana yanrwaaca unthotolaca mwaanooyo ni yaanonciseraca ikuwo conaanaano. Nuuwakatyaaya, Yehova aahonvaha Ana asaana araru asilopwana ni eeli asithiyana.