Inatiri a Jefté

Asarayeli yaahonhiya-tho unswalela Yehova. Ayo yahoturuwela waaswalela anluku oohikhweeli. Masi ayo anluku oohikhweelyaayo khayaakavihenre ukati waatupheliyaaya ni anakhotto o waamonita. a Sarayeeli yahoviriha myaakha cinci yahuvahuvaka paasi. Masi nihuku nimoca, ayo yaheera co: “Yehova, hi nihopanka itthu yootakhala sontte, unikavihere.” Vano a Sarayeeli yaahapwesakaca attontto anluku oohikhweeli ni yaahoturuwela unswalela Yehova. Phimaana, Yehova aaholakela waakavihera.

Wiira yaattheme anakhotto maamonita, a Sarayeeli yaahonthanla ntthu mmoca wiira aahoolele, nakhotto oolipa ni okuru eehaniya Jefté. Masi uhinaaya urweennya ukhottoni, Jefté ahomwiirela Yehova co: “Wanikaviheraka utthema, mi kinawuukhuluveliha wiira katuruwaka, ntthu nohala upacera ukhuma wapuwani waka ni awaaka ukaakhelela, naahala wuuvarela nteko utabernaakulu ukumyaawe wotheene.” Vano akaviheriyaka ni Yehova, a Sarayeeli yahotthema ukhottoni nwo.

Ukati Jefté waaturuwaawe, ntthu oopacera aakhumilewapuwani wawe va wiira amwaakhelele, aari mwanawe. Uyo anaakhelela athumwaane eenaka ni eepacaka. Jefté ahoopuwela itthu yankhuluvelihilyaawe Yehova, phimaana, aahosanka cinene kontha aarina mwaana mmoca paasi. Ni vano, isiyani aalamuliyaawe upanka? Uyo aahonhimeerya mwanaawe eeraka co: “Mwanaka, mi kihonkhuluveliha itthu Yehova. Phimaana, kinaahala wuurwaana u Silo wiira wanvareleke nteko Yehova utabernaakulu ukumyaa wotheene.” Vano mwaanooyo, aahakhula eeraka co: “Paapa, wakhala wiira ihaavo ikhuluvelihileenyu, nhaana umalihera. Masi nhinaaya ukirwaana, kinawuulepelani nkihiye myeeri miili wiira kaathweelane asimpwanaaka umwaakoni.” Vano mwaana a Jefté aahovara miteko utabernaakulu ukumyaawe wotheene. Ni asimpwanaawyaayo, yanrwaa unthotola wo khula mwaakha ikwaha imoca.