Davidi ni Sawuli

Davidi umwiiva wawe Koliyasi, Sawuli ahonthanla wiira aahoolele anakhotto otheene o Isarayeli. Davidi ahovira micoko cinci aanaka ikhotto ni khula ncoko waarwaawe uyo aantthema ikhottweeyo. Phimaana ahocuwelaciya mapuro menci. Ukati waaturuwaawe ukhottoni, athiyana yaankhuma mmawannyaya ni yammwiipela icipo Davidi yiiraka co: Davidi heeva anakhotto enci masi Sawuli wiivile vakaani. Nlattu wo iyo itthwiiyo Sawuli ammoonela nttima Davidi ni aholakela umwiiva.

Davidi ankhitiri umoopa saana viyola. Nkhwaha mmoca amoopaka viyola uhoolo waamwene Sawuli, ayo yahonvonyana nivaka wiira anhome, masi Davidi ahoorammpela ni nno nivakanno nahohoma isiri. Amwene Sawuli yahomananiha umwiiva Davidi ikwaha cinci. Nlattu wo iyo itthwiiyo Davidi ahotthawela wuuthakoni. Uphiya wawe nwo aheepitha nnikhukuni.

Vano, amwene Sawuli yahaathukumaniha alopwana 3.000 ni yahorwa unwehaweha Davidi muuthakoni. Uphiyawaya nwo, ahicuwelelaka amwene Sawuli yahokela nenne nikhuku neepithilyaawe Davidi nne. Vano atthu yaamweettana Davidi yahomwiirela co: “Ileelo Yehova hoovaha ala amwennyaala wiira uwiive.” Vano Davidi ahowaattamela amwennyaayo ni ahothikila nlempe no ikuwo yaawanryaaya. Ayo amwennyaayo khayaacuwelennle hataa itthu. Vano Davidi ahoona wiira hopanka itthu yoohinamaana, nlattu woohaahisima amwene yaathanliye ni Yehova. Vano Davidi ahaahiiha alopwana yaarinaawe wiira ahaapanke pusya amwene Sawuli. Ukati amwene Sawuli waakhumilyaaya nnikhukuni mmo, Davidi ahokhuma ni uyo aheerela co: “Naari nkhayi mu nnikhukuni mu nyuuva khankoonne. Miiva pooti waawiivaakani. Masi mi akuupankileni itthu yootakhala.” Niireke Sawuli ahohiya unlupattha Davidi?

Mena. Sawuli ahomananiha ikwaha cinci wiira anvare Davidi. Nkwaha mmoca uhiyu, Davidi ari nimwaanculawe Apisayi. Yahokelaca nheemani wa Sawuli, mpaka nipuro naaryaawe Abner nlopwana aakhikicera amwene. Ukati waamoonnyaawe Sawuli arupaka Apisayi apheela umwiiva. Masi Davidi ahomwiirela co: “Apisayi Yehova naahala unhukhumu Sawuli. Nttwee nikuse paahi nivakanno ni ntiita wo maacyuuyo nikhumeke.”

Davidi ni Apisayi yahokhumaca nheemani mmo ni yahowelaca mwaako waattamenle nne nipuronne, anarica waculu vaa, Davidi ahokhuwela eeraka co: “Abner kontha isiyani uhaakhikicenryaa amwennyaayo. Hi nihocisa nivaka nayanno ni ntiitaaya wo maacyuuyo ni weeva khawoonne hataa vakaani.” Sawuli ahoona wiira naari nlove na Davidi ni aheera co: “Khweeliini waanhala ukiiva, masi khukiivile. Vano kihocuwela wiira weeva phinhala ukhala mwene o Isarayeli.” Nuuwakatyaaya Sawuli ahoturuwela uwaani. Niireke amuci otheene a Sawuli yaananlupatha Davidi? Nttwee noone.