Yesu ahonthanla Saulu

Saulu aayariye isittatti yo Tarsu. Uyo aari nfarisewu ni aanaacuwela sana-saana malamulo a ayuuta ni uyo yaanankasiri makristau. Uyo aanaarwaaka waavara makristau alopwana ni athiyana ni urwaa waatthukela nkhattya. Nkwaha mmoca, atthu enci oohinamaana yahonvonyakaca nimaluku ntthari Estevau. Uyo ukatyuuyo, Saulu phaarumile wiira Estevau eeviye ni aanoweemela awehaka ukati weeviyaawe.

Saulu aanawaathanya cinene makristau, mpaka ahonlepela nankuttho muulupale wiira antthunihere urwaa u Tamaasku wiira aavarakace ni aatthuke makristau yaakhala nwo. Ukati Saulu waattamenlyaawe u tamaasku, yahonthaka uwiitho iluusu yoopharela cinene ni uyo ahomorela vathi. Saulu aheewa ncu neeraka: “Saulu, unkilupatthelani?” Vano, Saulu ahokoha co: “Tipani ntthu nokuulumanooyo?” Uyo ahaakhuliya co: “Miiva Yesu. Urwee u Tamaasku ni waphiyaka nwo, unaahala ucuwela itthu inlamuliyaa upanka.” Yoole ukatyuule, Saulu ahopacera uhoona ni atthu yaarinaawe yahoncisa mpaka u Tamaasku.

Ahaavo nkristau mmoca aakhala u Tamaasku eehaniya Ananiyasi. Yesu ahomuulumana ni ahomwiirela wiira arwee uwannyawe nlopwana eehaniya Yuda, wiira amoonanane Saulu. Ananiyasi ahaakhula co: “Masi Pwiiya, mi kiheewa oolumiyaka cinene Saulu. Uyo nopheela waavarakaca ni waatthuka atthariinyu otheene! Vano aheereliya co: “Urwee wamoonanane. Mi kihonthanla wiira avire alalyaaka ihapari comaana mapuro menci.”

Ananiyasi ahorwaa umoonanana Paulu ni ahomwiirela co: “Yesu hokiruma wiira kuuvonihe.” Vano, Saulu ahoturuwela woona. Uyo aheetthucihiya myaha ca Yesu ni ahokhala ntthari a Yesu. Uyo ahopattisiya ni ahancera ulalyeera nkhayi nimakristau akiina mmasinakooka. Wuupuwele mananna ayuuta caakhanlyaaya ukati waamoonaaya Saulu amuulumaka Yesu!

Saulu ahokhala myaakha miraru alalyeeraka u Tamaasku. Masi ayuuta yaananlupattha ni yaapheela umwiiva. Ukati mayamunna waacuwenlyaaya wiira uyo aapheela wiiviya, yahonkavihera utthawela nipuro nikhwaawe. Ayo yahonhela ntthuttuni yuulupale ni yahomphoviha nipuro imuuru yo wasittatti waarinaaya iphaa.

Ukati Saulu waaphiilyaawe u Yerusalemu, ahomananiha waakhalakhalana makristau akhwaawe. Masi ayo yammoova. Vano, ntthari mmoca eehaniya Barnabe ahonkavihera Saulu. Uyo ahonrwaana wo maapostolu ni ahaahimerya wiira uyo ahohiya waalupattha mayamunna. Vano, Saulu ahancera ulalyeera nkhayi ni nloko no Yerusalemu. Wahoolo, uyo ahohiya wiihaniya Saulu ni ahancera wiihaniya Paulu.