Mwene oopacera o Sarayeeli

Yehova ahaathanla masuwiisi wiira yaawacere a Sarayeeli. Masi ukhala wiira apoovu akhwaawe yaahaana mwene, a Sarayeeli ciicammo yahonlepela Samuweli wiira akhalane mwene. Samuweli ahoona wiira iyo yaari itthu yoonanara. Phimaana, ahonlompa Yehova, Yehova ahaakhula co: “Samuweli, ayo khaanookhotteetthu weeva, masi ankikhotta miiva. Waahimeerye wiira anaahala ukhalana mwene, masi uyo mwennyeeyo nohala waapanka ipottha ayo apoovwaayo.” Samuweli Ahaahimeerya a Sarayeeli citthu Yehova caahimilyaawe. Masi waanookhalaru commo, ayo yahaakhula yiiraka co: “Hi khaninanaata. Ninompheela mwene paahi!”

Yehova aahomwiirela Samuweli wiira nlopwana mmoca neehaniya Sawuli phinhala ukhala mwene o Sarayeeli. Ukati Sawuli waarweelyaawe umoona Samuweli u Ramaa, Samuweli aahomwiitthela makhura mmurummo ni ahomoonihera wiira Sawuli ahothanliya wiira akhale mwene o Sarayeeli.

Nuuwakatyaaya, Samuweli ahowiihana apoovu otheene wiira awoonihere mwene onaanaano o Sarayeeli. Masi khaavo aakhitiri umoona Sawuli. Nnaacuwela nlattuni? Kontha uyo aaneepitha. Vano atthwaayo umwaavya waya, yahomphwanya. Uyo aari oosancama awula oorekama waapwaha atthu otheene ni aari ooreera cinene. Vano Samuweli ahonwaana iriyari wo a Sarayeeli otheene ni aheera co: “Mmooneke ula phi mwene Yehova nthanlilyaawe. Apoovwaayo yaahotteeliya cinene waacuwenlyaaya wiira vano ahokhalana mwene.

Wiipaceroni, Sawuli ammwiiwelela Yehova ni ampankaka citthu cotheene caarumiyaawe ni Samuweli. Masi nuuwakatyaaya, aahohiya umwiiwelela. Nkwaha mmoca Sawuli aapheela unvaha nkuttho Yehova. Masi uyo khaathanliye wiira avare uyo ntekooyo. Samuweli aahomwiirela wiira uhivahe mpaka kiweeke. Masi Sawuli khanweherenre ni aahovaha veekhaawe. Phimaana, Samuweli ahoomwiirela Sawuli co: “Khawaalamuliya uhimwiiwelela Yehova!” Sawuli uhimeriya wawe, niireke aahopacera umwiiwelela Yehova? Mena.

Kontha unavinreene ukati, Sawuli aahorwaa waanana apoovu yeehaniya Amalekita. Yehova aahomwiirela Sawuli wiira aalamuliya wiiva Amalekita otheene, masi Sawuli khaamwiivile mwene Omalakita eehaniya Agague. Yehova aahomwiirela Samuweli co: “Sawuli khankiwaacera ni khampheela ukiiwelela.” Samuweli ahoriipiya nrima cinene umwiiwa wawe Yehova oolumacaka ale moolumwaale. Vano Samuweli aahokhuma ni aahorwaa umuulumana Sawuli. Samuweli aahomwiirela Sawuli co: “ukhala wiira khumpheela wiiwelela, Yehova naahala unthanla mwene nkhwaawe. Ukati Samuweli waakhumaawe wiira arwee, Sawuli ahonvara ihancwaweeyo ni mpaka waahuwa. Vano Samuweli aahomwiirela Sawuli co: “Yehova ciicammo naahala uwaakha umwene o Sarayeeli.” Vano tipani aahala ukhala-tho mwene o Sarayeli? Yehova anhala unthanla ntthu aahala woonihera unfenta ni aamwiiwelela.