Yehoyata aholipa nrima

Apwiyamwene Yesapeeli yahonyara mwaana eehaniya Ataliya. Ataliya aari ootakhala nrima khampa anumwaane ni aatheliye ni amwene o Yuuta. Ukati ayo amwennyaayo yaakhwilyaaya, mwaana Aataliya ahokhala mwene, masi ukati mwaana Ataliya akhwilyaawe, ayo yaholakela ukhala apwiyamwene o Yuuta. Phimaana, yahowiivakaca atthu otheene yaarina ihakhi yookhala mamwene, uhela nhina ucuulwaaya. Ni atthu otheene yanwoova.

Nankuttho muulupale Yehoyata ni amwaarawe Yehosepa yancuwela wiira citthu cootakhala apwiyamwene Ataliya yaapankaaya. Phimaana, yahonkusaca mwaana mwankaani aari mwanculaya Ataliya eehaniya Yehoyasi ni yahonvithaca ntempulu, yahonwaceraca saana. Wiira akhitiri upanka iyo, yahaana ukhala oolipa nrima.

Ukati Yehoyasi aarinaawe myaakha 7, Yehoyata ahaathukumaniha alopwana o Yuuta ni aheerela co: “Nwehawehe mikhora co ntempulu ni nhinhiye ntthu akelaka.” Vano Yehoyata ahomweesa Yehoyasi uhoolo waatthu otheene o Yuuta ni ahonwariha ikorowa mmurummo ni atthu otheene yaakhuwela yiiraka: “Munttitthimihe mwene.”

Ukati apwiyamwene Ataliya yaawonnyaaya apoovu akhuwelaka yaahorwa utempulu atthawaka. Umoona waya mwene onanaano yahopacera ukhuwela yiiraka: “Afaalusu! Afaalusu!” Wootharanana, alopwana akhwaawe yahaavara apwiyamwene Ataliya, yahakumihera vate itempulu ni yaahowiiva. Vano, umwene wo u Yuuta wahokhala wootaphuwa mmatatani wo apwiyamwene ootakhala nrima Ataliya. Masi nanlelo cahaavo citthu cootakhala caapankilyaaya. Isiyani Yehoyata aapankilyaawe?

Yehoyata wamoca ni apoovu otheene yaholapha wiira yaahala unswalela Yehova paasi. Phimaana ayo yahokwanyulaca itempulu ya Bahaali uhela nhina ilatarato cotheene ca Bahaali. Nuuwakatyaaya, Yehoyata ahathanla anankuttho, malevita ni atthu yaahala ukhalelela mikhora wiira anvarele nteko Yehova ntempulu. Ni ayo manannaayo apoovu yanhala unswalela Yehova ni mananna capheelaawe. Woottharanana, Yehoyata nkhayi ni alopwana akhwaawe yahoncisa Yehoyasi ni yahonrwaana upalaasiyu ni yaahomunkomiha wakhaterani yeemwene. Apoovu otheene o Yuuta wahaatteela nrima cinene kontha vano yancuwela wiira yanhala unswalela Yehova ni mananna caapheelaawe. Uhoona mananna ulipa nrima wa Yehoyata waakavihenryaaya apoovu?