Ayoca khayaaswalenle ilatarato

Uvira waya ukati, amwene Nabukodonosor yahopanka ilatarato yuulupale yo iwooru. Woottharanaca, yahaalattula anamacuwelaca otheene ni atthu otheene o Babilooniya wiira arwee yoone iyo ilataratweeyo. Nhina ayo atthwaayo, ahaavo Sadraki, Mesaki ni Apeteneku. Vano ayo amwennyaayo yaheera co: “Ukati unhalaaya wiiwiya icipo irumaka, uhaana ukhoromiya wiira iswaleliye ila ilataratweela! Vano ntthu nohala uhiswalela ila ilataratweela naahala uvonyeriya nfornuni.” Vano, niireke ale amirawo araru maheperewaale yanhala uswalela ile ilataratweele awula yaahala umwiiwelela Yehova?

Ukati nciponno naapacenryaaya uruma, atthu otheene yaahokhoroma ni yaahopacera uswalela ilataratweeyo, masi Sadraki, Mesaki ni Apeteneku khayaakhoromile ni khayaaswalenle iyo ilataratweeyo. Atthu akhwaawe yaahowoonaca ni yaahorwaa wahimeerya amwene Nabukodonosor. Vano, ayo yaheera wiira yeehanaciye. Ni uwaacawaya yahowiirelaca co: “Ula nkwahoola kinawuulevelelacani. Masi nhaana uswalela ila ilataratweela, mwahiswaleleke kinawuuvonyerani nfornuni. Ni khaavo Nluku nohala uwoopolani.” Vano, ayo amirawaayo yaahaakhulaca co: “Khanimpheela uleveleliya kontha Nlukwiihu naahala unoopola. Masi hataa uyo hinoopolaka khaninhala uswalela iyo ilataratweeyo.”

Amwene Nabukodonosor yaahorusiya cinene ni yaheera co: “Wapariheliye mooro nfornunimmo ikwaha 7 uvikana cimpharelesaaya maukweene! Mwatthuke ala alopwanaala ni mwaavonyere nfornunimmo.” Anatoropaayo yahaavaraca, yahatthukaca ni yahaavonyeraca nfornunimmo. Masi ukati anatoropaayo yaavonyeracaaya nfornunimmo, yahokwhaaca nlattu wooviha morooyo. Vano amwennyaayo waarweelyaaya uthurumela nfornunimmo, yaahowoona atthu acese yeettaka. Vano ayo yaahotuthuwa ni yaahokoha co: “Keera naavonyenre atthu araru? Vano nfoorniunimmo kinoona atthu acese. Mmocooyo nokhala toko nlayikha”

Amwene Nabukodonosor yahaattamela ifornwiiyo ni yaahomwihana Sadraki, Mesaki ni Apeteneku wiira akhumele vate. Wootikhiniha amirawo ooraaru yaakhumacile nforniunimmo woohivyaaca hataa vakaani. Ni khayaanukaca mwiisi, ikharari caya ni ikuwo cayanyo khacaavile hataa vakaani.

Amwene Nabukodonosor yaheera co: “Nluku a Mesaki, Sadraki ni Apeteneku haana ikuru waavikana anluku otheene. Uyo horuma nlayikha wiira awoopole nfornuni. Khaavo nluku nonlikanana uyova.

Isiyani nimwiitthucereehu Mesaki, Sadraki ni Apeteneku? Nihaana ulakela unkhuluvela Yehova hataa yanikhumelelaka marikariko