Umwene unhala ulamulela mpaka

Amwene Nabukodonosor arupaka uhiyu, yaholoha itthu yootikhiniha. Iyo itthwiiyo yahaavara nrima cinene ni mpaka khayaakhitiri urupa. Vano ahowiihana anamacuwelacaaya otheene ni yahowiirela co: “Kihimeeriye itthu kilohilyaaka.” Anamacuwelacaayo, yaahakhula yiiraka: “Khweeli pwiiya! Masi sontte, mpacere unihimeerya itthu ilohileenyu. Amwene Nabukodonosor yahaakhula yeeraka: “Mena! Phinyu nnolamuliya ukihimerya tokooni itthu kilohilyaaka, mwaahikihimeeryeke kinawiivakacani.” Anamacuwelacaayo, yahaakhula yiiraka: “Masi amwene, sontte! Nnihimeerye itthu ilohileenyu, vano hiiva ninaahala utaphulela itthu inhimyaaya.” Amwene Nabukodonosor yahowiirela anamacuwelacaaya co: “Nnopheela ukithepyaca! Nkihimeerye itthu ilohilyaaka.” Anamacuwelacaayo, yahaakhula yiiraka: “Khunhala ukhitirya pwiiya, khaavo nohala ukhitiri upanka itthu inlepeleenyu.”

Amwene Nabukodonosor yaahorusiya cinene mpaka yaahoruma wiivakaciya anamacuwelaca otheene o Babilooniya. Iyo yaahela nhina wiiviya ciicammo, Daniele, Mesaki, Sadraki ni Apeteneku. Daniele ahorwaa uwuulumana amwene Nabukodonosor ni ahaalepela wiira anvahe ukati. Vano, Daniele naasipatthannyaawe yahonlompa Yehova ni yahonlepela wiira aakavihere. Isiyani Yehova aapankilyaawe?

Yehova aahonhimeerya Daniele itthu amwene Nabukodonosor yaalohilyaaya, ni itthu yaataphulelaaya. Usawaya, Daniele ahomwiirela nanteko amwenyooyo co: “Uhimwiive namacuwelaca hataa mmoca. Mi pooti wantaphulelaaka itthu amwene ilohilyaaya”. Nantekooyo aahoncisa Daniele ni ahonrwaana wo amwene Nabukodonosor. Vano, Daniele aahowiirela a mwenyaayo co: “Nluku noohimeeryani citthu cinhala wiirannya uhoolo. Itthu ilohileenyu phiila: pwiiya nhoona ilatarato yaarina muru wo iwooru, ikhakacaaya ni myoono caya caari coparaata, nthukwanno ni anataraayo yaari okoopere, mettonnyo caari coyuuma ni manyaayo yaari oyuuma ni ootakaneela uloko. Nuukatyaaya, nluku naahophacuwa umwaakoni ni naahophita manya olataratwaayo ni ilataratweeyo yaahothatuwa ntthupi. Woottharanana, iphyoo yaahovaviha ntthupinno. Wuumaleloni, nlukunno naahothatuwa mwaako muulupale ni waahokhunela ituniya yotheene.”

Vano Daniele ahaataphulela amwene Nabucodonosor itthu yaalohilyaaya eeraka co: “Muru wo iwooru wolataratooyo maanaaya wiira umweneenyu. Iparaateeyo intaphulela umwene unhala uwa wamalamalaka umweneenyu. Vano, unaahala ukhumelela umwene nkhwaawe wokoopere ni unaahala ulamulela ntuniyani motheene. Nuuwakatyaaya, unaahala ukhumelela umwene unhala ukhala woolipa khampa iyuuma. Wuumaleloni, unaahala ukhumelela umwene wookawannyaca. Miphantte co uyo umwenyeeyo, mphantte nkhwaawe unhala ukhala woolipa khampa iyuuma, masi mphantte nkwaawyooyo unhala ukhala woohilipa khampa uloko. Nluku naathatuwile mwaakonno maanaaya wiira umwene wa Nluku. Uyo umwennyooyo unaahala umalamaliha umwene wotheene ni uyo phinhala ulamulela mpaka.”

Ukati amwene Nabukodonosor weewilyaaya iyo, yahokhoroma ni yahomwiirela Daniele co: “Nlukwaa phuhimenrye nya citthu cilohilyaaka nnya. Khaavo Nluku nkhwaawe nonvikana uyo” amwene Nabukodonosor uhiya wuupuwela umwiiva Daniele, yahonthanla wiira akhale nhooleli anamacuwelaca otheene o Babilooniya. Ni yahonthanla wiira akhale nsatoro. Nhoona mananna Yehova aakhunlyaawe nivekelo na Daniele nkhayi naasipatthannyaawe?