Umwene unlattanihiya ni mwiri muulupale

Uhiyu mmoca, amwene Nabukodonosor yaaholoha itthu yawoopihile cinene. Mpaka ayo yaahowiihana anamacuwelacaaya wiira ataphulela itthu yaalohilyaaya. Masi khaavo namacuwelaca aakhitinri utaphulela. Vano yaholakela umuulumana Daniele.

Amwennyaayo yaahomwiirela Daniele co: “Mi kilohile mwiri muulupale cinene. Waari woorekama ni mpaka wankwanya wiirimu. Uyo mwiryuuyo waanoonnya ntuniyani motheene. Wahaana mataakhuru ooreera ni mihokorokho cinci. Inama cinci canrwaa umumula wantthuucini waya uyo mwiryuuyo ni miritta cayannyo caacanre ipuuru co asaanuni. Vano, kahoona nlayikha nikhuruwaka wiirimu ni naheera co: “Ukottoliye mwiryuuyo ni cithikilaciye miritthennyo. Ihinye paahi ikhokolweeyo ni miritathinyo. Nceresere waya ikhokolweeyo iheliye iyuuma yokoopere. Nrima wo mwiryuuyo unaahala uhiya ukhala weepinaatamu ni unhala ukhala wo inama ni unaahala uvira ukati 7. Atthu otheene anaahala ucuwela wiira Nluku phinlamulela ni nanvaha umwene khula ntthu nompheelaawe.”

Vano Yehova aahonhimeerya Daniele yaataphulelaaya itthu yaalohilyaaya amwennyaayo. Ukati Daniele eewilyaawe ahoova cinene. Ni ahowiirela amwennyaayo co: “Amwene kinawoonelani uthunku, mi koopuwela wiira citthu cilohileenyu cinhala uwiirannyeela awananiinyu, masi cinhala uwiirannyeelani nyuuva. Mwiri muulupale monneenyu Ukottoliye hinyuuva, kontha nnaahala waakhiya umweneenyu ni nnaarwaa ulya makukhu ntakhwani. Masi khampa nlayikha nihimilyaaya wiira ihinnye ikhokolweeyo ni miritathinyo, nyuuva nnaahala uturuseliya umweneenyuuyo.

Unavinreene mwaakha, amwene Nabukodonosor anari uculu waya ipereetiyu yo upalaasiyu waya, ukati waweheehaaya isittatti yo Babilooniya, ayo yaheera co: “Ila isittatti yooreera kitekilyaaka niikuru caka. Mi kihaavikana mamwene otheene” Amwennyaayo ahinaaya umaliha wuulumaca yaheewa ncu nikhumaka wiirimu niiraka: “Nabukodonosor! Vano uhaakhiya umwennya.”

Ni yoole ukatyuule, amwene Nabukodonosor yahopacera uvahuwa ni yaapanka citthunnyo khampa inama. Phimaana, yahothama upalaasiyu nwo ni yaahorwaa ukhala nkhayi ni inama utakhwani. Ikharari cayanyo caahoonuwa ni caakhala khampa mattenka osaaka ni ihathanyo caakhala khampa ihatha co saaka.

Uvira waya myaakha 7, amwene Nabukodonosor ahoturuwela ukhala saana. Vano, Yehova ahaahiya uturuwela u Babilooniya wiira yahokooleele umwenyaaya. Amwene Nabukodonosor yaheera co: “Yehova hiri Mwene o wiirimu ni uyo unanphwanela uswaleliya. Vano kihocuwela wiira Yehova phinlamulela. Uyo naawiitthuciha atthu owiittottopa ukhala atthu owiiyeviha ni nanvaha umwene khula ntthu nompheelaawe.