Isiri co Yerusalemu

Nttwee nuupuwele myaakha civinre. Nemiya aakhalaawe u Persiya. uyo aari nsarayeli aavara nteko u palaasiyu wo amwene Artaxerxes. Nihuku nimoca mwaamunnawe Nemiya ahokhuma u Yuuta ni aahorwaa unhimerya Nemiya ihapari conriipiha nrima amwiirelaka co: “Atthu aturuwenle u Yerusalemu ari nipuro nowoopiha, mpaka nnaco khaavo tekile isirinnyo ni mikhora co isittattiiyo cihokwanyuulaciya ni anakhotto o Babilooniya.” Iyo yahonriipiha nrima Nemiya. Uyo ampheela cinene urwaa ukavihera, masi khaacuwela wakhala wiira amwennyaayo yanhala unhiya urwaa. Vano, ahonlompa Yehova wiira ankavihere.

Nihuku nimoca, amwene yahoona wiira Nemiya aari oriipiya nrima ni yahonkoha itthu yaawiirannyeela. Vano Nemiya Ahaahimeerya mananna caaryaaya u Yerusalemu, uhela nhina isiri ni mikhorannyo, amwene yahonkoha wakhala wiira wanreerela uyoova upanka itthu. Woohipica, Nemiya ahopanka nivekelo noomaalelya ni aahowiirela amwennyaayo co: “Kiireke pooti Warwaaka u Yerusalemu wiira kalokihaceke isirinnyo?” Amwene Artaxerxes yaahomwiirela arweeke ni yahotthenkaca khula itthu wiira Nemiya eette wookhikicerya. Amwene ciicammo yahonthanla Nemiya wiira akhale kovernatoore o Yuuta ni yahonvaha ithaapwa wiira atekeleke mikhora co Yerusalemu.

Ukati Nemiya Aaphilyaawe u Yerusalemu, ahoona wiira khiivo yaalokile, ahorukureerya isittattiiyo ni aahoona mananna isirinnyo caaryaaya. Nuuwakatyaaya, ahaathukumaniha asuulupale o Yerusalemu ni aahowiirela co: “Khiivo ilokile, nihaana nipankaka itthu, atthu otheene yahaamini ni yahopacera uteka isirinnyo.”

Masi awanannyaaya yahopacera waathyaa yiiraka co: “Nnyo isirinnyo khacinhala ulipa, hataa nancotto pooti ukhitta ni umorosa!” masi asarayeli khayaavololacile ni khayaahiya uvara nteko. Nuuwakatyaaya, isirinnyo cantepa urekama ni ulipa.

Vano awananyaayaayo yaholakela utuphela u Yerusalemu, masi nimananna ootutusera. Ukati a Yuuta yaacuwenlyaaya yahoova cinene. Masi Nemiya ahowiirela co: “Nhoove. Yehova ri ni hiiva.” Nemiya ahoowesa makwarta mmikhoranimmo wiira aakhikicere atthu yaateka isiryaayo. Vano awanannyaayo khayaakhitinri utuphela u Yerusalemu.

Mahuku 52 paasi, isiri ni mikhorannyo caahomala. wiira utthape, nemiya ahawaana u yerusalemu malevita otheene ni ahaakawaniha ikhurupu piili. Nemiya aari ikhurupu ikiineeyo ni Estra ikhwaaweeyo. Ikhurupu coopiili cahowela isirinnyo ni khula ikhurupu yaavira mphanttyaaya. Yahorukureriya isittattiiyo, eepeliyaka icipo Yehova, mpaka ikhurupu coopiili ukumaana ntempulu. Alopwana otheene, athiyana ni asaana o Yerusalemu yahonvaha nkuttho Yehova ni yaahotthapa. Ayo yaari otteeliya cinene mpaka yaaneewannya uttayi.