Yesu ahomunweleliha Laazaru

Isittatti yo u Petaaniya Yesu ahaana asimpwanaawe araru, Laazaru naasirokorawe Maria ni Marta. Nihuku nimoca Yesu nari isittatti imoca yoottalivela ni u Petaaniya, Yesu aahohimeriya wiira Laazaru anwerennya. Ni Marta ni Maria yaaphela wiira Yesu arwee wowaakuvyaaca. Masi Yesu ahopica nuuphiya. Umala waya mahuku meeli, uyo ahaahimerya attharyaawe co: “Nttwee u Petaaniya. Laazaru naarupa, vano mi kinkoonwusa. Attharyaawe yaheera: “Wakhala wiira naarupa, ri saana. Woona wawe wiira attharyaawe khayiiweehile itthu yaapheelaawe uhimya, aheerela co: “Laazaru hokhwa.”

Yesu aaphiile u Petaaniya anavinre mahuku macese nakhwileene Laazaru. Yahaavo atthu enci yaawile ummaaliha Marta ni Maria. Ukati Marta waacuwenlyaawe wiira Yesu ahophiya, ahontthawelela ni ahomwiirela co: “Pwiiya, unari wiira mwaahaavo va nyeenyaaka khaahala ukhwa.” Yesu aheera: “Marta, nyeenyaa naahala uhokoleela ukhala nkumi. Unaakupali?” Marta ahaakhula: “Iyee, mi kinaakupali wiira naahala wunwelelihiya wahoolo.” Yesu ahomwiirela: “Marta, mi kinunweleliho ni ukumi.”

Vano, Marta ahorwa unhimerya Maria wiira Yesu howa. Vano Maria ahontthawelela Yesu, ni atthu akhwaawe yahontthara. Maria uphiya waya nipuro naaryaawe Yesu ahokhoroma uhoolo wawe ni unlakoono aheera: “Pwiiya unari wiira mwahaavo nyeenyaaka khaahala ukhwa.” Ukati Yesu waamoonnyaawe Maria nari oriipiya nrima nuuyo ciicammo ahancera wunla. Ukati atthu akhwaawe waamoonnyaaya unlaka yaheera: “Keera nnaamoona, Yesu anciveliya ni Laazaru.” Akhwaawe yaaniikoha kontha isiyani Yesu ahankavihenryaawe Laazaru. Vano isiyani Yesu yaahalaawe upanka?

Yesu ahorwa umahiye waavitthiyaawe Laazaru ni aholepela wiira nikumihiye nluku naattiyelela mahiyaayo. Marta umoona wawe alelepelaka ukumihiya nluku ahomwiirela: “Ahovira mahuku macese nakhwileene. Irutthwiiyo inaanukha.” Hataa ukhalaka commo nahokumihiya nlukunno, ni Yesu aholompa eeraka: “Paapa, mi kinawuusukhuruni kontha nnaakivirirana. Mi kinaacuwela wiira nenne-nenne nnaakiviriyana, masi kuulumile nlattu waatthu kirinaakaala va, wiira yaamini wiira thi nyuuva nkirumile uwa va watuninyani va.” Vano Yesu ahokhuwela cinene eeraka: “Laazaru ukhumele vate”! woohipica yaheerannyaa itthu yootikinihaca: Laazaru ahokhuma mmahiyemmo! Vano Yesu ahoruma utthukulaciya mattapwatta otheene yaatthukaceriyaawe.

Atthu enci yonne ule mwiiriiryoole yaahomwaamini Yesu. Masi akhwaawyaayo yaahorwaa waahimeerya citthu cotheene mafariseu. Mafariseu yahaana nttima nuulupale cinene mpaka yahopheela umwiiva Yesu nkhayi ni Laazaru. Hicuwelaka ntthu, Yuta Iskariyoti ari ntthari a Yesu ahorwaa uwuulumanaca mafariseu ni ahaakoha co: “Munhala ukiliva kavi koohimeryakani nipuro ryaawe Yesu?” Ayo yaheeraca wiira anaahala unliva misurukhu 30 co iparaata. Vano, Yuuta ahohala uupuwelaka mananna onvariiha Yesu.