IHANTISI 101
Paulu naarwaaniya u Rooma
Ikwaha yoneeraru Paulu yaakhumilyaawe aviraka alalyeeraka, nipuro naamalenlyaawe uphiya waari u Yerusalemu. Uphiya wawe nwo, uyo ahovariya ni ahotthukiya. Uhiyu, Yesu ahomuulumana Paulu ni ahomwiirela co: “Weeva unrwaa ulalyeera u Rooma.” Paulu ahokhumaniya u Yerusalemu ni ahorwaaniya u Sesareeya ni ahotthukiya wonwo myaakha piili. Nhooleli Festu ahoolumacera mwaha wa Paulu wiira ooniye wakhala wiira ahaana isariya awula mena. Uyo ukatyuuyo, Paulu aholepela itthu. Uyo enre co: “Kimpheela wiira mwahaaka wuulumaceriye ni Seesari, u Rooma.” Festu ahotthuna ni Paulu ahopakheriya mpaketini wiira arwaaniye u Rooma. Asimpwanaawe eeli, Luka ni Aristarku, ciicammo yahorwaa nkhayi nuuyo.
Paketi eettakoono mmaacini, yahancera waattaniya iphyoo mahuku menci. Atthu otheene mpaketini yooniha wiira yaanaahala ukhwa. Masi Paulu aheera co: “Mwaatthi, nlipe nrima! Hi khaninhala ukhwa! Nlayikha nimoca nihokuulumana uhiyu. Nno nikiirenle co: ‘Uhoove, Paulu. We unaahala uphiya u Rooma ni atthu otheene ari niweeva mpaketini anaahala woopwa.’”
Yahovira mahuku 14 nanlelo yaattaniyaka iphyoo. Vano, alopwana yaari mpaketini yahancera woona ilha wakhiviru ni yaholakela urwaa weemela wonwo. Iyo yaari ilha ineehaniya Malta. Waattamela waya, paketyuuyo ahancera ukanyuwaca, masi atthu 276 yaari mpaketini yahoopwa. Atthu akhwaawe yahorampela mmaacini mpaka uphiya munhaavani woomaka ni akiina yaawela ithaapwa co paketi wiira aphiye mpaka munhaavani woohittittha mmaacini. Atthu o Malta yahowaakhela ni yahaapahera mooro wiira yootthe.
Uvira waya myeeri miraru, anatoropa yahompakhera Paulu mpaketini nkhwaaawe. Paulu waaphiilyaawe u Rooma, mayamunna yahomoonanana. Ukati waawonnyaawe mayamunna, uyo ahonsukhuru Yehova ni ahotepa ulipa nrima. Hataa ukhalaka wiira aanootthukiya, Paulu ahotthuniheriya ukhala inupa yowaalukariya, masi haavo natoropa mmoca ankhalenla. Uyo ahokhala u Rooma myaakha piili. Atthu yawaaka umootola, uyo aanawaahimerya ihapari co Umwene wa Nluku ni moolumo a Yesu. Uyo ciicammo ahantikhela iwarakha maloko o Ásia Menor ni o Yuteya. Ihantisi ya Paulu inawoonihera wiira Yehova ahonkurumica wiira aalalyeere ihapari comaana atthu o mapuro menci.
“Ninaathoonyera nimananna otheene wiira hiiva ninonvarela nteko Nluku, nimpanka iyo nivilelaka nattehattehiyaka vale, naananaka marikariko, yanithwaaka itthu, naananaka masankiho.”—2 Akorintu 6:4