Isiyani inhala wuukaviherani uhihiyerera usoma Ibiiblya?

Woohaanyihacera, usoma Ibiiblya phiitthu yootepa ureera inlakelaawe upanka ntthu. Masi ikwaha cikhwaawe unaarika. Nyuuva atthunaka ikwaha cikhwaawe nnawiikohaka wakhala wiira nnaahala ukhitiri urweehela uhoolo usoma winyu Ibiiblya. Masi kontha isiyani unaareera nyuuva uhihiyerera usoma Ibiiblya? Isiyani inhala wuukaviherani uhihiyerera usoma Ibiiblya hataa mwaananaka marikariko?

1. Kontha isiyani usoma Ibiiblya ikhanle itthu yootepa ukhalana ifayita?

“Nuulumo na Nluku nihaana ukumi ni ikuru.” (Maberewu 4:12) Usoma Ibiiblya uhaana ifayita venci cinene. Iyo inaanikavihera ucuwela mananna mwaneene Nluku cinoopuwelaawe ni cinniweheraawe. Nkaviheriyaka ni Ibiiblya nyuuva nnaahala ucuwela citthu cahaacuweleenyu, ukhalana ucuwelaca ni nweherero. Ni itthu ikhwaawe yootepa ukhalana ifayita: Ukhalaka wiira Ibiiblya inaahala wuukaviherani ukhala mpatthani a Yehova. Nyuuva mwasomaka Ibiiblya, nnaahiya wiira ikuru irinaaya irukunuse makhalelweenyu.

2. Kontha isiyani unaareera uvaha ifayita itthu ineetthucihaaya Ibiiblya?

Ikhweeli co mbiiblyani cinlikanaca ni nhakhu. Phimaana, iyo ineera wiira nihaana ‘nithumaka ikhweeli ni uhitumiha-tho.’ (Miruku 23:23) Navahaka ifayita itthu ineetthucihaaya Ibiiblya, hi ninawiikurumica wiira nihihiye usoma, hataa yanikhumelelaka marikariko.—Nsome Miruku 2:4, 5.

3. Isiyani inlamuliyeenyu upanka wiira Yehova ookavihereni uhihiyerera usoma Ibiiblya?

Yehova Mumpi okuru-cotheene ni Mpatthaniinyu. Uyo nawuucuwelani sana-saana uvirikana inanna cinoocuwelaaweni ntthu nkhwaawe ni naapheela wuukaviherani ncuwela uyova. Yehova pooti wuupankihani nyuuva ‘wuucivelani uvara itthu ni wuuvahani ikuru wiira nkhitiri upanka.’ (Nsome Afilipo 2:13.) Phimaana, ikwaha cikhwaawe mweecoonaka uhuucivelani usoma Ibiiblya awula moonaka wuurikani weetteela citthu cineetthuceenyu, uyo naahala wuukaviherani. Awula wakhala wiira nyuuva nnaahala upheela ikuru wiira nkhitiri waanana marikariko ni masakha anhala wuukhumelelani, uyo nohala ukhala wamoca ni nyuuva. Nhihiyerere unlompa Yehova munlepelaka wiira ookavihereni uhihiya usoma Ibiiblya. — 1 Atesalonika 5:17.

MUNCERERE WIITTHUCA WINYU

4. Nthoonyere wiira nnaavaha ifayita usoma winyu Ibiiblya

Ikwaha cikhwaawe hi ninaakhalanaka citthu cinci coovara mpaka wuupuwela wiira khanirina ukati woosoma Ibiiblya. Isiyani inhala wuukaviherani? Nsome Afilipo 1:10, ni mwamalihaka usoma, moopele mwaha ala makohwaala:

• Citthuni nyuuva cinooneenyu ‘utepa ukhala cofayita’ muukumini?

• Manannani cinlamuliyeenyu uthoonyihera wiira nnaavaha ifayita cinene usoma Ibiiblya?

1. Nyuuva mwapaceraka uhela itthaya yinci mpartini ni waculu waya va wancera uhela maluku, malukwaayo khanhala ukela otheene.

2. Masi nyuuva mwanceraka uhela maluku, inaahala uhala ikhato yoohala ukela itthaya yotheene. Inanna imocaaru, nyuuva mwapaceraka upanka “citthu citepale ukhala cofayita,” ciicammo unaahala uhala ukati woopanka citthu cikiinannyo.

Usoma Ibiiblya unaanikavihera ukhalana ile yaanithwa yoominepani, ni moolumacero makhwaawe, unaanikavihera uncuwela ni unswalela Nluku. Nsome Matewus 5:3, ni mwamalihaka usoma, moopele mwaha nna nikohonna.

• Iparakhani cinhaleehu waakhela navahaka ifayita usoma wihu Ibiiblya?

5. Nhaahiyerere atthu yoohihakani usoma Ibiiblya

IVIDIYU: Ahotthuveliya nlattu woovilela (5:22)

• Nvidiyuni imalihileehu woona, manannani asipatthannyaawe ni amucyaawe Francesco caakhanlyaaya umwiiwa waya attonkacaka citthu ceetthucaawe?

• Manannani citthuveliyaawe nlattu woohihiyerera usoma Ibiiblya?

Nsome 2 Timotiyu 2:24, 25, ni mwamalihaka usoma, moopele mwaha ala makohwaala:

• Amuciinyu ni asipatthaniinyu anoonela cani citthu cineetthuceenyu?

• Toko cinhimyaaya nnya iveerusunnya, wakhalaka wiira haavo nohala uhincivela uwoonani nsomaka Ibiiblya isiyani inlamuliyeenyu upanka? Kontha isiyani?

6. Nkhuluvele wiira Yehova naahala wuukaviherani

IVIDIYU: Yehova naanikavihera upanka marukunuso muukumini wihu (3:56)

• Ividiyu imalihileehu woona, marukunusoni Jim yaapankilyaawe wiira antteelihe nrima Yehova?

• Isiyani itepile wuucivelani nhina ihantisyaawe?

Nsome Maberewu 11:6, ni mwamalihaka usoma, moopele mwaha ala makohwaala:

• Isiyani Yehova inhalaawe waapankela ale anontotha niikuru caya cotheene awula ale aneekurumica uncuwela ni upanka citthu cinoncivela?

• Woonela winyu, Yehova nokhala cani awoonakani mweekurumicaka wiira nhihiye usoma Ibiiblya?

UTHIKILELA

Khweeliini usoma Ibiiblya uhaana marikariko, masi upanka iyo itthwiiyo unaahala wuukaviherani ukhala ootteeliya mpanka. Nhihiyerere unkhuluvela Yehova, ni uyo naahala wuucaalihani.

Wuupuwela

• Kontha isiyani nyuuva nnooneenyu ikhweeli co mbiiblyani ukhala khampa mihakhu co ifayita cinene?

• Manannani cinlamuliyeenyu uthoonyera wiira nnaalemeliha “citthu cootepa ukhalana ifayita”?

• Kontha isiyani nhaana munlepelaka Yehova wuukaviherani uhihiyerera usoma Ibiiblya?

MWAPHEELAKA UCUWELA CITTHU CIKIINA

Ncuwele citthu cese caakavihere atthu uvarela nteko saana ukatyaaya.

“Nvarele nteko saana ukatiinyu” (Despertai!, yo Fevereiro yo 2014)

Awannyaya aathiyana amoca aneehaniya Grace, khayaacuwela nlattuni amwaarayaayo yaapheela unswalela Nluku. Moone mananna Yehova caakavihenryaawe ayo athiyanaayo.

Yehova naanivaha ikuru wiira nikhitiri waanana khula marikariko (5:05)

Moone mananna nlopwana mmoca cikaviheriyaawe nlattu amwaarawe woovilela.

Kahosoma Ibiiblya wiira kooneehe wakhala wiira ikhweeli (6:30)

Ikwaha ikhwaawe, Masaahiti a Yehova anawootherihiyaka waamwalaniha amuci. Niireke iyo ikhanle ikhweeli?

“Masaahiti a Yehova anawaamwalaniha awula anaawaataniha amuci?” (Mwaha umphwanyannya nsayitini jw.org)