MPANTTA 01
Ibiiblya inhala wuukaviherani cani muukumini winyu?
Hiiva apinaatamu ninaapheelaka ucuwela citthu cinci cinniirannyeela muukumini wihu. Toko: uhuva, ukhwa ni mananna cinrweehu ukhala uhoolo. Ciicammo ninaakhalelaka isukhuli mananna owiilihera ni ukhalana amuciihu ootteeliya. Atthu enci ahoonenela wiira Ibiiblya inawaakhula makoho moolupale cinene ankhalaneehu. Ayo ahoonenela ciicammo wiira Ibiiblya ihaana ikano cooreera cimphwanyiha ukumi womaana. Maweherweenyu Ibiiblya pooti wuukaviherani muukumini winyu?
1. Makohoni anaakhuliya mbiiblyani?
Ibiiblya inawaakhula makoho moolupale cinene, toko ala: Ukumi uphattuwacile cani? Wumpeliyeni ukumi? Kontha isiyani atthu anaahuva? Ntthu akhwaaka norwaa vayi? Kontha isiyani cinawaaniya ikhotto hataa atthu otheene yapheelaka nnema? Niireke itthaya inaahala umalamala wanihukuni? Khuntakhala upanka makoho toko ala. Atthu imiliyau cene ahoonenela wiira macipwo anvahaaya Ibiiblya anhimya ikhweeli.
2. Ibiiblya inhala unikavihera cani uphwanya utteeliya cinene khula nihuku?
Ibiiblya inaavaha ikano comaana. Wootakihera, iyo inawaakavihera amuci ukhalana utteeliya weekhweeli. Ciicammo inaanihimyera isiyani inlamuliyeehu upanka nakhalaka oonyoonyiya ni mananna oonicivela nteko unvareehu. Ila ibroxureela inaahala wuukaviherani ucuwela isiyani Ibiiblya ineetthucihaaya nhina nnya citthunnya ni citthu cikiina. Atthunaka nyuuva nnaahala ukupaleela wiira “Cowantikhiya cotheene [awula Ibiiblya yotheene] . . . cihaana ifayita.”—2 Timotiyu 3:16.
Ila ibroxureela kahi wiira inawaakakhaniha Ibiiblya. Uhiya commo, inawiira wuukurumicani wiira ncuweleehehe Ibiiblya. Phimaana, mwiikurumice usoma khula iverisiikulu cinhala uhimiya khula mpantta ni nlikanihe citthu cinoolumaaya Ibiiblya ni citthu cinhaleenyu wiitthuca nhina ila ibroxureela.
MUNCERERE WIITTHUCA WINYU
Moone mananna Ibiiblya cinaakaviheraaya atthu, mananna nyuuva oohala wuucivelani usoma Ibiiblya ni kontha isiyani unaareera ukaviheriya wiiweeha itthu inhimyaaya.
3. Ibiiblya inaamwaleela iphirweehu
Ibiiblya inaalikanaca niilampata yoopharela cinene. Iyo pooti unikavihera uthanla ratta itthu yoohala upanka ni inawuuluma isiyani inhala wiirannya uhoolo.
Nsome Isaalimu 119:105, ni mwamalihaka usoma, moopele mwaha ala makohwaala:
Nasaalimu antikhile ila iveeruswiila aawehera cani Ibiiblya?
Nyuuva nnoonela cani Ibiiblya?
4. Ibiiblya pooti waakhula makoho arineehu
Moone mananna Ibiiblya caakavihenryaaya apurusoora amoca ucuwela cinaakhuliyaaya makoho yahaakhuma mmuru myaakha cene. Moone IVIDIYU, ni mwamalihaka woona moopele mwaha ala makohwaala:
Nvidiyunimmo, makohoni yaarinaaya apurusoora?
Usoma Ibiiblya waakavihenre cani?
Ibiiblya inaanikurumica utotha ucuwela cinaakhuliyaaya makoho arineehu. Nsome Matewus 7:7, ni mwamalihaka usoma moopele mwaha nna nikohonna:
Makohoni nyuuva yaahala wuucivela wiiwa Ibiiblya yaakhulaka?
5. Nyuuva unaahala wuucivelani usoma Ibiiblya
Atthu enci inawaacivela usoma Ibiiblya ni upanka commo unawaakavihera cinene. Moone IVIDIYU, ni mwamalihaka woona moopele mwaha ala makohwaala:
Nvidiyuni imalihileehu woona, kontha isiyani amirawo khiyaacivela usoma Ibiiblya?
Vano nnava, kontha isiyani inawaacivela usoma?
Moolumo o mbiiblyani anaanipisiha nrima ni uniphwanyiha nweherero woohoolo. Nsome Arooma 15:4, ni mwamalihaka usoma moopele mwaha nna nikohonna:
Nnaapheela ucuwela inatiri co mbiiblyani cimpisiha nrima ni cimphwanyiha nweherero woohoolo?
6. Atthu akiina pooti unikavihera wiiweeha itthu inhimyaaya Ibiiblya
Uhiya usoma Ibiiblya veekhaaya, atthu enci ahoona wiira woopela mwaha naatthu akiina unaakavihera cinene. Nsome Miteko 8:26-31, ni mwamalihaka usoma moopele mwaha nna nikohonna:
Isiyani inlamuliyeehu upanka wiira niiweehe itthu inhimyaaya Ibiiblya? (Moone iverisiikulu 30, 31.)
Ilivuru yo Miteko, inaahimya wiira nlopwana mmoca hotoko ulepela ukaviheriya wiiweeha Cowantikhiya cokhalayi co mbiiblyani. Mahukwaala, atthu enci ciicammo ahoona wiira unaareera ukaviheriya wiiweeha itthu inhimyaaya Ibiiblya.
ATTHU AKIINA ANEERA: “Usoma Ibiiblya unkhala urihakaca ukati womahala.”
Nyuuva nnoonela cani? Ni kontha isiyani?
UTHIKILELA
Ibiiblya inaavaha ikano cinnikavihera khula nihuku, inawaakhula makoho moolupale, upisiha nrima ni uphwanyiha nweherero woohoolo.
Wuupuwela
Ikanoni Ibiiblya cinvahaaya?
Makohoni anaakhuliya mbiiblyani?
Isiyani yaahala wuucivelani nneetthucile mbiiblyani?
MWAPHEELAKA UCUWELA CITTHU CIKIINA
Moone mananna ikano co mbiiblyani cinnikaviheraaya mahukweehwaala.
“Ikano co mbiiblyani khacinhiya ukavihera” (Ukhalenla N.º 1 2018, yeekunya)
Moone manannani Ibiiblya cinkavihenryaaya nlopwana mmoca aheecoona ukhalana ifayita ikhumelo inamwannyaawe.
Nsome ikano co mbiiblyani cinaakavihera amuci ukhala ootteeliya.
“Isiiri 12 Siniiriha Etthoko Ohakalala” (Nvenye! N.º 2 2018)
Atthu enci aneera wiira Nluku phinhoolela ituninya. Niireke iyo ikhanle ikhweeli? Moone itthu inhimyaaya Ibiiblya.