Nthanle nenna co ukavihera Umwene wa Nluku!
Muupuwele nyuuva nneewile weeriyaka wiira iphyo yuulupale cinene ineera yawaaka ncoko unkhaleenyu. Vano, atthu oorumiya niikuvernu anaavira yakhuwelaka yeeraka: “NKHUME WOWAAKUVYA! NTTHAWELE NIPURO NOOKHIKICERYA!” Isiyani yaahaleenyu upanka? Khweeliini, nyuuva mwanhala utthawela nipuro nookhikicerya.
Pooti waneereehu wiira hiiva ninanriiha uwa wo “iphyo yuulupale cinene”, akhanle “masakha moolupale.” (Matewus 24:21) Khawankhitirya hiiva urwaa nipuro nikhwaawe ahinhalaaya uphiya ayo masakhaayo. Masi pooti wampankeehu itthu wiira niikhikicere. Nipankekeni?
Ukati Yesu waataphulelaawe mwaha umwaakoni, uyo ahoolumaca eeraka: “Nhihiye uhoolelihera Umwene wa Nluku ni isariyaawe.” (Matewus 6:33) Ninhala ukhitiri cani upanka iyo?
Nhoolelihere Umwene wa Nluku. Iyo maanaaya wiira nihaana nitepaka uvaha ifayita Umwene wa Nluku uvikana itthu ikhwaawe. (Matewus 6:25, 32, 33) Kontha isiyani ninlamuliyeehu uwehera Umwene wa Nluku iyo inanneeyo? Kontha apinaatamu khankhitiri umalamaliha masakha ankhumelela. Umwene wa Nluku paasi phinhala ukhitiri uvara uyo nteko woorikooyo.
Ntothe isariya ya Nluku. Nihaana neekurumicaka weettela malamulo osariya ni mattharelelo a Nluku. Kontha isiyani? Kontha nalakelaka mwaneeneehu yooreera ni yootakha unaaniwaanela masakha. (Miruku 16:25) Masi neettelaka malamulo a Nluku, uhiya paasi untteeliha nrima uyo, hiiva ciicammo ninaaphwanyera ifayita.—Isaiya 48:17, 18.
Nhihiye uhoolelihera Umwene wa Nluku ni isariyaawe. Yesu ahohimya wiira ahaavo yaahala utepa uvaresesa mihakhu wiira aphwanye nsurukhu mwinci. Atthu akiina yaahala uviriha ukati mwinci ni urihakaca ikuru caya mpaka ayo uhikhalana ukati woototha Umwene wa Nluku.—Matewus 6:19-21, 25-32.
Masi Yesu ahokhuluveliha wiira ale yaahala ukavihera Umwene wa Nluku yanhala uphwanya citthu cinaathwa ni wahoolo anaahala uphwanya iparakha coohimala.—Matewus 6:33.
Hataa ukhalaka wiira atthari a Yesu o iseekulu yoopacera yaanaavaresesa Umwene wa Nluku ni isariyaawe, ayo khayonne yamalaka masakha o muukumini waya. Uhookhalaru commo, ayo yaakhala ookhikiceriya. Manannani?
Ayo yaakhala yeettelaka malamulo a Nluku, upanka commo waanaakavihera unyema masakha anaaphwanya ale ahintthuna umwiiwelela Nluku. Waamini woolipa waarinaaya wiira Umwene wa Nluku waanaahala uwa, wahaakavihera waanana masakha moolupale yaaphwanya. Ni Nluku ahaava “ikuru cuulupale” wiira akhitiri uvilela.—2 Akorintu 4:7-9.
NIIREKE WIIRA NYUUVA NNAAHALA UHOOLELIHERA UMWENE WA NLUKU?
Makristau o iseekulu yoopacera yaheewelela ile yaarumiyaaya ni Yesu, ukhanle uhoolelihera Umwene wa Nluku. Ayo yanlalya ihapari comaana khula mapuro yaaphwanyannyaaya atthu. Niireke wiira mahukwaala ahaavo ampanka commo?
Iyeeni! Masaahiti a Yehova ahoona wiira uhanle ukati vakaani wiira Umwene wa Nluku umalamalihe ila ituninya yoohinamaaneela. Phimaana, ayo anawiikurumica cinene wiira yeettele moolumo a Yesu, aneera: “Nnya ihapari comaana co Wuumweneni nnya cinaahala ulalennya ntuninyani motheene munkhaliya, yahimyeriyaka atthu o khula ilapo; vano phinhalaaya umala ulumwenku wotuninya.”—Matewus 24:14.
Isiyani nnohaleenyu upanka wiiwa winyu ihapari comaana? Ninawuukurumicani waatakiha atthu o iseekulu yoopacera yaakhala isittatti yo Bereia, u Masetoniya. Ukati apostolu Paulu waalalyenraawe ihapari comaana co Umwene wa Nluku, ayo yahaamini moolumwaayo “ni nrima wotheene.” Uhiya commo, ayo “yaanaasoma sana-saana Cowantikhiya Cowaarya” wiira yooneehe wakhala wiira citthu caahimeriyaaya caari ceekhweeli ni ayo yaaheettela citthu ceetthucihiyaaya.—Miteko 17:11, 12.
Nyuuva ciicammo pooti nnopankeenyu itthu imocaaru. Mwahooleliheraka Umwene wa Nluku ni isariyaawe, nyuuva nnaahala uphwanya nikhikicero nenna co, ni wahoolo nnaahala uphwanya nnema ni mpuha woohimala.