MWAHA WOOSOMIYA 24
Yehova naanilevelela niiraati
“Weeva, Yehova, ukhanle namaana ni khula ukati unaatthuna ulevelela; nikhanle nuulupale nifento nookhuluvelya ninwooniheraa atthu otheene anooswalela.”—ISAA. 86:5.
NCIPO 42 A Minha Oração a Jeová
NINHALA WIITTHUCANI?a
1. Ikhweelini Salomau yantikhilyaawe nhina Eklesyaste 7:20?
MWENE Salomau hantikha co: “Khaavo pinaatamu nasariya watuninyani nopanka itthu yomaana ukati wotheene ni hinttheka.” (Ekles. 7:20) Iyo ikhanle ikhweeli! Otheene cihu ninaatthekaka. (1 Jo. 1:8) Phimaana, otheene cihu ninaapheela uleveleliya ni Nluku ni naatthu akhwaawe.
2. Mwiicoonale cani nlattu wooleveleliya nimpwaniinyu?
2 Khweeliini, nyuuva nnaakhitiri wuupuwela ikwaha imoca yantthekenleenyu mpwaniinyu. Nyuuva atthunaka wahooriipani nrima nlattu wo iyo itthwiiyo ni mwahopheela uhokoleela ukhalana upatthani womaana ni uyo. Phimaana, mwahonlepela mpwaniinyu ninrimeenyu wotheene wiira ooleveleleni. Vano ukati woolevelenlyaaweni, mwiicoonale cani? Wahootteelani nrima venci, keera?
3. Ninhala wiitthucani nhina ula mwahoola?
3 Hi nimpheela wiira Yehova akhale Mpatthaniihu muulupale. Masi ukhala wiira hiiva naatthu omatampi, uhaavo ukati ninoolumeehu awula nimpankeehu itthu inonriipiha nrima. Vano isiyani innikupaliha wiira Yehova naapheela unilevelela? Ulevelela wa Yehova umpwaha cani mananna hiiva cinaaleveleleehu akhunanihu? Ni tipani Yehova nonlevelelaawe?
YEHOVA NAANILEVELELA NIIRAATI
4. Nincuwela cani wiira Yehova naanilevelela niiraati?
4 Ibiiblya inaanikhuluveliha wiira Yehova naanilevelela niiraati. Yehova ahoruma nlayikha umuulumana Moceesi umwaakoni Sinai. Nno nlayikhanno nahohimya moolumo a Nluku neeraka co: “Yehova, Yehova, Nluku okiriri ni oothunku, oovilela ni oomwinciva nifento nookhuluvelya ni ikhweeli, nwoonihera nifento nookhuluvelya atthu imiliyau cene, aalevelelaka makoosi, uvonyaniha waya, ni matampyaaya.” (Nkw. 34:6, 7) Yehova khanle Nluku namaana ni nakiriri, ni khula ukati, Yehova nawaalevelela niiraati atthu yaavanre matampi anthoonyera uttharuwa.—Nem. 9:17; Isaa. 86:15.
Yehova naacuwela citthu cotheene ciniirannyenle muukumini wihu ni mananna nnyo citthunnyo cirukunusilyaaya nrimeehu (Nwehe iparaagarafu 5)
5. Toko cinthoonyeraaya Isaalimu 103:13, 14, Yehova nlattu woonicuwela sana-saana naapheela upanka isiyani?
5 Ukhala wiira Yehova phinumpale, uyo naanicuwela ratta-raatta. Ninaakhala ootikhinihiya neemelaka nuupuwelaka wiira Yehova nancuwela sana-saana khula ntthu nokhala va watuninyani va. (Isaa. 139:15-17) Uyo naakhitiri woona khula ipahuwa iyarelaniyeehu. Ciicammo, Yehova naacuwela citthu cotheene cinikhumelenle muukumini wihu ukhuma nenne nokhalayi ni mananna nnyo citthunnyo cirukunusilyaaya makhalelweehu ni meettelweehu. Yehova naanicuwela sana-saana. Iyo phi itthu immwiiriha unoonela ikiriri.—Isaa. 78:39; nsome Isaalimu 103:13, 14.b
6. Yehova thoonyenre cani wiira naapheela unilevelela?
6 Yehova hothoonyera wiira naapheela unilevelela niiraati. Yehova naacuwela wiira otheene nikhanle anamatampi ni ninweherera ukhwa nlattu wotampi ya Atamu. (Aroo. 5:12) Khiivo inhaleehu ukhitiri upanka wiira niwoopole akhwiihu awula wiira niicoopole hiiva muukhwani. (Isaa. 49:7-9) Masi Nlukwiihu honoonela uthunku ni hopanka itthu wiira anoopole. Uyo pankile isiyani? Toko cinthoonyeraaya Joau 3:16, Yehova honveleeliha mwanawe wiira akhwe ni anoopole. (Mat. 20:28; Aroo. 5:19) Yesu khwile wiira awoopole muukhwani ale ammwaamini. (Mabere. 2:9) Muupuwele mananna Yehova caariipiyaawe nrima waamoonaawe mwanawe eeviyaka niinanna yowuulihaca muru ni yoowerya! Woonela winyu, unari wiira Yehova khampheela unilevelela, uyo anhala unhiya mwanawe eeviyaka?
7. Matakiheroni o mbiiblyani anthoonyera wiira Yehova naapheela unilevelela?
7 Ibiiblya inaahimya ihantisi ca atthu yaaleveleliye ni Yehova. (Efesu 4:32) Ntthu nohimiya mbiiblyani aaleveleliye ni Yehova atthunaka nopacereenyu umuupuwela khanle mwene Manaseesi. Uyo nlopwanooyo ahovara matampi moolupale. Uyo ahopanka uswali woohinamaana ni ahaakurumica akhunanawe upanka ciicammo. Uyo ahaapaha asaanaawe wamooroni wiira aavahe itthuvo anluku oohikhweeli ni mpaka ahonhela ttontto ooswaleliya ntempuluni yowaarya ya Yehova. Imwaacaka Manaseesi, Ibiiblya ineera co: “Uyo ahopanka venci cinene nnyo citthu coohinamaanannyo uhoolo wa Yehova wiira anveehe.” (2 Ikor. 33:2-7) Masi ukati Manaseesi waattharuwilyaawe ninrimaawe wotheene, Yehova ahonlevelela ni ahonhiya uturuwela ukhala mwene. (2 Ikor. 33:12, 13) Nyuuva atthunaka ciicammo nnaamuupuwela mwene Davidi. Uyo ahovara itampi cuulupale, toko weetta uluva ni umwiiviha ntthu. Masi, ukati mwene Davidi waathoonyihenryaawe uttharuwa weekhweeli ni waakupanlyaawe wiira ahottheka, Yehova ahonlevelela. (2 Sam. 12:9, 10, 13, 14) Ala matakiherwaala anthoonyera wiira Yehova khweeli naapheela unilevelela ni khampa cinhaleehu woona, inanna Yehova cinnilevelelaawe inaapwaha cinene inanna hiiva ninaaleveleleehu akhwiihu.
YEHOVA KHANLE NLEVELELI HINLIKANANIYA
8. Nlattuni nineereehu wiira Yehova khanle Suwiisi hinlikananiya?
8 Yehova khanle “Suwiisi o ntuninyani motheene.” (Upha. 18:25) Suwiisi omaana haana acuwelaka sana-saana malamulo. Pooti waneereehu wiira Yehova khanle Suwiisi hinlikananiya, kontha uhiya ukhala Suwiisi paasi, uyova phipankile malamulo amphwanyannya mbiiblyani. (Isai. 33:22) Khaavo ntthu nkhwaawe nocuwela sana-saana isiyani ikhanle yoonanara ni yooreera unvikana Yehova. Isiyani-tho immwiiriha Yehova ukhala Suwiisi omaana? Suwiisi omaana haana acuwelaka citthu cotheene ciirannyeele hinaaya ulakela unhukhumu ntthu. Phimaana, Yehova khanle Suwiisi omaana hinlikananiya kontha uyo naacuwela ni nawoona citthu cotheene cineerannya.
9. Isiyani Yehova inwehaceraawe hinaaya ulakela unlevelela ntthu?
9 Yehova khari toko masuwiisi apinaatamu. Khula ukati, uyo naacuwela citthu cotheene cineerannya. (Upha. 18:20, 21; Isaa. 90:8) Masuwiisi apinaatamu ancuwela paahi citthu cinoonaaya awula cineewaaya. Masi Yehova kahi phiryaawe commo. Uyo naacuwela sana-saana isiyani immwiiriha ntthu upanka citthu, toko mananna cumpiyaawe, mananna cuunuwihiyaawe, nipuro ninkhalaawe ni ciicammo mananna cinoopuwelaawe. Ciicammo, Yehova naacuwela itthu khula ntthu inoopuwelaawe wanrimani. Uyo naacuwela ratta-raatta isiyani inniiriha upanka citthu. Yehova naakhitiri woona citthu cotheene. (Mabere. 4:13) Phimaana, Yehova hinaaya ulakela unlevelela ntthu, uyo naawehacera tokooni isiyani immwiira uyo ntthuuyo.
Yehova khanle nasariya ni khanonthanla ntthu onwacera saana. Yehova khankunyariya (Nwehe iparaagarafu 10)
10. Nlattuni nineereehu wiira ihukhumu ca Yehova cinkhala cosariya ukati wotheene? (Nwehe Deuteronomiyu 32:4.)
10 Yehova khanle Nluku hinaathanla atthu wiira aawacere saana, ni khula ukati nawaahukhumu atthu niisariya. Yehova khanlakela unlevelela ntthu nlattu woomoona ureera ikhove, ukhala thaciri, ucuwelaciya awula nlattu woomoona ukhala ntthu oocuwelaca. (1 Sam. 16:7; Tiya. 2:1-4) Hi khaninonkhanyereriha Yehova upanka itthu ni khaninonkunyari. (2 Ikor. 19:7) Yehova khanlakela itthu nlattu wonviruwela ntthuuyo awula nlattu woncukulela. (Nkw. 34:7) Khweeliini, unawoonannya wiira Yehova khanle Suwiisi hinlikananiya kontha naacuwela citthu cotheene cinniira ni makhalelweehu.—Nsome Deuteronomiyu 32:4.c
11. Nlattuni nineereehu wiira mananna Yehova cinlevelelaawe anaavirikana nimananna apinaatamu cinaalevelelaaya akhunanaya?
11 Cowantikhiya Cowaarya niiluuka iheperewu cinaathoonyera wiira mananna Yehova cinnilevelelaawe anaavirikana nimananna hiiva cinaaleveleleehu akhwiihu. Dicionário mmoca hohimya wiira “nuulumo no iheperewu nantikhiye mapuro makhwaawe, ninromoliya yaaciyaka paahi mananna Nluku cinaalevelelaawe anamatampi. Nno nuulumonno khaninromoliya aaciyaka pinaatamu nonlevelela nkhunanawe ukhala wiira ulevelela wa apinaatamu khunlikanana ulevelela wa Nluku.” Yehova paahi phinkhitiri unlevelela ntthu woohuupuwela-tho itampi yaavaralyaawe. Masi ulevelela wa Nluku unniphwanyiha ifayitani?
12-13. a) Yehova anilevelelaka hiiva ninkhala cani? b) Niireke Yehova naahala unittarusa nlattu wo matampi anilevelenlyaawe?
12 Nacuwelaka ni naaminiki wiira Yehova honilevelela, unaaniphwanya “ukati wo nnema” awula unaanitaphuwa nrima. Iyo itthwiiyo inniira Yehova anilevelelaka. (Mite. 3:19) Yehova anilevelelaka, uyo naanitthuna wiira nituruwele ukhala apatthannyaawe. Unkhala khampa khanivanre iyo itampiiyo.
13 Yehova anilevelelaka, uyo khanhala unittarusa nlattu wotampi ivanreehu. (Isai. 43:25; Jer. 31:34) Yehova naweesa uttayi itampi cihu “toko cittalivannyaaya unkhuma ncuwa mpaka unkela ncuwa.”d (Isaa. 103:12) Noopuwelaka mananna Yehova cinnilevelelaawe, ninansukhuru cinene wanrimani wihu. (Isaa. 130:4) Masi tipani Yehova nonlevelelaawe?
TIPANI YEHOVA NONLEVELELAAWE?
14. Mpaka va, isiyani yiitthucileehu nhina ulevelela wa Yehova?
14 Khampa ciitthucileehu, Yehova nanlevelela ntthu hataa avaraka matampi moolupale. Ni niheetthuca wiira ukhala wiira Yehova khanle Mumpiihu, Suwiisiihu ni phipankile malamulo ari mbiiblyani, uyova paahi phinomphwanela ulakela ukatini unhalaawe unlevelela ntthu. Masi isiyani Yehova inwehaceraawe hinaaya ulakela unlevelela ntthu?
15. Toko cinthoonyeraaya Luka 12:47, 48, isiyani Yehova inwehaceraawe hinaaya ulakela unlevelela ntthu?
15 Itthu yoopacera, Yehova naawehacera wakhala wiira ntthuuyo aanaacuwela wiira itthu impankaawe ikhanle yoohinamaana. Yesu ahothoonyera iyo itthwiiyo nhina moolumo amphwanyannya nlivuruni ya Luka 12:47, 48. (Nsome.e) Ntthu apankaka imweeni itthu incuwelaawe wiira inanrusa Yehova, uyo novara itampi yuulupale. Unawoopiha uyo ntthuuyo uhileveleliya ni Yehova. (Mark. 3:29; Joau 9:41) Masi khweeliini, otheene cihu nihopaca upanka itthu yaacuweleehu wiira ikhanle itthu yoohinamaana. Ukhala wiira hiiva naanaacuwela wiira iyo ikhanle itthu yoohinamaana, niireke Yehova pooti unilevelela? Iyee! Uyo pooti unilevelela, kontha ihaavo itthu ikhwaawe inwehaceraawe hinaaya ulakela unlevelela ntthu.
Pooti wankhuluveleehu wiira Yehova naahala unilevelela nattharuwaka khweeliini (Nwehe iparaagarafu 16-17)
16. Uttharuwa isiyani, ni nlattuni ninlamuliyeehu uttharuwa wiira Yehova anilevelele?
16 Itthu yonayeeli, Yehova naawehacera wakhala wiira ntthuuyo hottharuwa khweeliini. Masi uttharuwa weekhweeli isiyani? Uttharuwa weekhweeli unkhala ntthuuyo urukunusa moopuwelwaawe, meettelwaawe ni makhalelwaawe. Ciicammo, unkhala uthoonyera wiira ntthuuyo unanriipa nrima cinene nlattu woopanka itthu yoohinamaana awula nlattu woohipanka itthu yomaana yaalamuliyaawe upanka. Ntthu oottharuwa khweeliini khunonriipa nrima nlattu woovara itampi paahi, masi ciicammo unanriipa nrima nlattu woohiyerera upatthannyaawe ni Yehova uririyacaka mpaka waavanryaawe iyo itampiiyo. Muupuwele wiira mwene Manasesi ni mwene Davidi yahovara matampi moolupale. Masi Yehova ahaalevelela kontha ayo yahothoonyera uttharuwa weekhweeli. (1 Mam. 14:8) Unawoonannya wiira Yehova nonilevelela nattharuwaka khweeliini. Masi uriipiya nrima paahi nlattu wotampi ivanreehu khuntosa. Nihaana ciicammo nipankaka itthu ikhwaawe.f Ihaavo-tho itthu ikhwaawe Yehova inwehaceraawe hinaaya ulakela unlevelela ntthu.
17. Urukunusa nrima maanaaya isiyani, ni nlattuni ntthu nolamuliyaawe urukunusa nrimaawe? (Nsome Isaiya 55:7.)
17 Itthu yoneeraru ni yuulupale phiila: Yehova naawehacera wakhala wiira ntthuuyo horukunusa nrimaawe, awula wakhala wiira hohiya upanka citthu coohinamaana ni hancera upanka citthu comaana. (Nsome Isaiya 55:7.g) Ntthuuyo haana arukunusaka moopuwelwaawe ni wancera utthara moopuwelo a Yehova. (Aroo. 12:2; Efesu 4:23) Ntthuuyo haana eekurumicaka kahi wiira ahiye paahi upanka citthu coohinamaana, masi ciicammo wiira ahiye wuupuwela nnyo citthunnyo. (Akol. 3:7-10) Masi ninaacuwela wiira wiivaherera wa Yesu phinkhitiriha Yehova unilevelela itampi cihu ni unireeriha. Masi Yehova nohala uvarela nteko wiivaherera wa Yesu wiira anilevelele, oonaka wiira ninawiikurumica cinene uhiya upanka citthu coohinamaana.—1 Jo. 1:7.
MWAAMINI WIIRA YEHOVA NAAHALA WUULEVELELANI
18. Niitthucile isiyani nhina mananna Yehova cinnilevelelaawe?
18 Nttwee nuupuwele citthu ciitthucileehu mpaka va. Yehova khanle nleveleli hinlikananiya. Nlattuni nineereehu commo? Yoopacera, kontha Yehova khula ukati naanilevelela niiraati. Yonayeeli, kontha uyo naanicuwela sana-saana. Uyo naacuwela citthu cotheene cinniira ni khaavo-tho ntthu nkhwaawe nohala ukhitiri unoona wanrimani wakhala wiira khweeli nihottharuwa awula mena. Ni woomalihera, niheetthuca wiira Yehova anilevelelaka, uyo naaliyala itampi cihu. Ucuwela iyo itthwiiyo unaaniiriha ukhala ninrima wootaphuwa ni uhokoleela ukhalana upatthani womaana nuuyova.
19. Hataa nikhalaka atthu oopahuwa ni nivaraka matampi ikwaha cinci, nlattuni ninlamuliyeehu ukhala unitteelaka nrima?
19 Ukhala wiira naatthu oopahuwa, hi khaninhala uhiya uvara matampi. Masi itthu innimaaliha akhanle moolumo amphwanyannya nhina ilivuru Estudo Perspicaz das Escrituras, ivoluume 1, ipaagina 210. Iyo ineera: “Ukhala wiira Yehova naacuwela uhilipa mwiirutthuni waatthu anonswalela, ayo khanlamuliya ukhala ukati wotheene waariipaka nrima nlattu wo ipahuwa iyarelaniyaaya ni nlattu woovonyiha ikwaha cinci. (Isaa 103:8-14; 130:3) Wakhala wiira anaweettela iphiro ca Nluku, ayo pooti wankhalaaya waatteelaka nrima. (Afili 4:4-6; 1Jo 3:19-22)” Wuupuwela ayo moolumwaayo unaanilipiha venci.
20. Ninhala wiitthucani nhina mwaha nkhwaawe unttharanaca nuula?
20 Nihaana ninsukhuruku Yehova nlattu woonilevelela niiraati khula itampi invareehu wakhalaka wiira nihottharuwa. Masi ninlamuliya utakiha cani mananna Yehova cinnilevelelaawe? Ulevelela wa Yehova ni ulevelela wihu manannani cinlattanacaaya ni cinvirikanaaya? Nlattuni unreeraaya ucuwela mananna cinvirikanaaya? Mwaha nkhwaawe unttharana nuula unaahala waakhula ayo makohwaayo.
NCIPO 45 Os Pensamentos do Meu Coração
a Mbiiblyani, Yehova naathoonyera sana-saana wiira naapheela waalevelela niiraati atthu yaavanre matampi attharuwale. Masi ukati nkiina, hiiva ninoopuwela wiira khunniphwanela uleveleliya ni Yehova. Nhina ula mwahoola, ninaahala woona nlattuni ninlamuliyeehu ukhuluvela wiira Nluku naapheela unilevelela niiraati nattharuwaka.
b Isaalimu 103:13 Toko nlopwana cimmoonelaawe ikiriri mwanawe, Yehova ciicammo naawoonela ikiriri ale ammoova. 14 Kontha uyova naacuwela sana-saana inanna cumpiyeehu, khanliyala wiira hiiva nikhanle ntthupi.
c Deuteronomiyu 32:4 Mwala, citthu cotheene cimpankaawe cikhanle coohipahuwa, kontha iphiro cawe cotheene cinkhala cosariya. Nluku ookhuluvelya, himpanka citthu coohisariya; uyo khanle nasariya ni owookwa.
d Nwehe ilivuru Achegue-se a Jeová, ikapiitulu 26, iparaagarafu 9.
e Luka 12:47 Vano, ipottha incuwela itthu impheelaaya apwiiyaaya, masi ihimpanka itthu apwiiyaaya inrumaaya, inaahala waattiya ikwaha cinci. 48 Masi ipottha ihincuwela citthu cimpheelaaya apwiiyaaya ni ipankile citthu coohinamaana nlattu woohicuwela, inhala waattiya vakaani. Khweeliini, otheene ule aakhenle citthu cinci, naahala uwehereriya wiira apanke citthu cinci; ni ule vahaceriye citthu cinci, naahala uwehereriya wooniya apankaka citthu cuulupale.
f NUULUMO NOOTAPHULELIYA: “Uttharuwa” unkhala urukunusa meettelo ni uriipiya nrima nlattu wo itthu yoohinamaana ntthu ipankilyaawe awula nlattu woohipanka itthu yomaana ntthuuyo yaalamuliyaawe upanka. Uttharuwa weekhweeli unaamwiiriha ntthuuyo urukunusa nrimaawe.
g Isaiya 55:7 Atthu oohiloka ahiye iphiro caya, ni anakhirini ahiye moopuwelwaaya; anturuwele Yehova nohala uwoonela ikiriri; anturuwele Nlukwiihu, kontha naahala waalevelela niiraati.