MWAHA WOOSOMIYA 34
NCIPO 3 Yehova Onninivaha Ikuru, Nlipelelo, ni Nroromelo
Nyuuva pooti wankupaliinyu wiira Yehova hoolevelelani
“Ni weeva uhokilevelela makoosyaaka ni matampyaaka.”—ISAA. 32:5.
ITTHU INHALEEHU WIITTHUCA
Nhina ula mwahoola, ninaahala woona iveerusu co mbiibiliyani cinkhuluveliha wiira Yehova nawaalevelela ale anoonihera uttharuwa itampi caya ni kontha isiyani ikhanlyaaya itthu yofayita ukupali uleveleliya.
1-2. Nineecoona cani nacuwelaka wiira Yehova honilevelela? (Nwehe ciicammo wakaapani.)
MWENE Davidi waanonriipa nrima cinene nlattu wo citthu coohiloka caapankilyaawe. (Isaa. 40:12; 51:3, muru) Masi uyo ahoonihera uttharuwa weekhweeli ni upanka marukunuso. Masi Yehova, ahonlevelela. (2 Sam. 12:13) Vano Davidi ahokhala ootteeliya ucuwela wawe wiira Yehova honlevelela.—Isaa. 32:1.
2 Khampa Davidi, hiiva ciicammo pooti wankhaleehu ootteeliya nacuwelaka wiira Yehova nawoonihera unakiriryaawe. Ikhanle itthu yoolipiha ucuwela wiira Yehova ri owiitthenkaceene wiira anilevelele itampi cihu wakhalaka wiira ninawoonihera uttharuwa, uhituruwela-tho upanka ni naahimeryaka mahumu itthu ipankileehu, hataa cikhalaka cuulupale! (Miru. 28:13; Mite. 26:20; 1 Jo. 1:9) Ni unaanitteela nrima Yehova anilevelelaka itampi cihu kontha khanhala unittarusa!—Ezek. 33:16.
Mwene Davidi antikhaka Isaalimu cinhimya ulevelela wa Yehova (Nwehe iparaagarafu 1-2)
3-4. Manannani anuunu amoca yiiconnyaaya upattisiya waya ni isiyani inhaleehu woona nhina ula mwahoola?
3 Ikwaha cikhwaawe, atthu akhwaawe anoopuwela wiira Yehova khanaalevelela. Moone itthu yaawiirannyenle anuunu amoca aneehaniya Jennifer yuunuwihiye naamucyaaya akhanle Masaahiti a Yehova. Vano wuunuwa waya, ayo yahopacera upanka citthu cootakhala ni khayaatthuna waahimerya asithumwanaya. Masi uvira waya myaakha, ayo yahopanka marukunuso ni yahopacera unswalela Yehova mpaka upattisiya. Ayo aneera: “Makhalelwaaka khalayi, yaakhala ommihakhuni, oorupihana woohiloka, oohapaliya cinene ni ooviruwa venci. Masi mi kancuwela wiira nlattu wo wiivaherera wa Yesu, Yehova pooti wankilevelelaawe itampi caka kooniheraka uttharuwa. Masi hataa ukhalaka wiira kaahonihera uttharuwa ni kahonlepela Yehova ukilevelela itampi caka, nkaakupali wiira Yehova khweeliini hokilevelela.”
4 Niireke wiira ikwaha cikhwaawe, nyuuva unawuurikani ukupali wiira Yehova hoolevelelani? Muupuwele mananna Davidi ciiconnyaawe nlattu Yehova woomoonihera unakiriryaawe. Uyo ankupali wiira Yehova ahonlevelela kontha khanle nakiriri. Phimaana, Yehova nopheela wiira hiiva ciicammo niicoone khampa Davidi ciiconnyaawe. Nhina ula mwahoola, ninaahala woona kontha isiyani ikhanlyaaya itthu yofayita ukupali wiira Yehova honilevelela ni isiyani inhala unikavihera ukupali.
KONTHA ISIYANI IKHANLYAAYA ITTHU YOFAYITA UKUPALI WIIRA YEHOVA HONILEVELELA?
5. Isiyani Sotwani impheelaawe wiira nikupali? Nhimye ntakihero.
5 Ukupali wiira Yehova naanifenta ni naanilevelela itampi cihu unaanikavihera unyema ukhalana moopuwelelo a Sotwani. Muupuwele wiira Sotwani naapanka yotheene inkhitiryaawe wiira anihiihe unswalela Yehova. Wiira eerannyeehe itthu impheelaawe, Sotwani naamananiha uniiriha ukupali wiira Yehova khanhala unilevelela itampi cihu. Moone itthu yaamwiirannyenle nlopwana mmoca aakumihiye wanlokoni no Korintu nlattu woopanka urupihana woohiloka. (1 Akor. 5:1, 5, 13) Nuuwakatyaaya, uyo ahoonihera uttharuwa. Masi hataa ukhala commo, Sotwani aapheela wiira atthu o wanlokoni ahinlevelele ni ahimwaakhelele wanlokoni vaa. Ciicammo, Sotwani aapheela wiira uyo nlopwanooyo eecoone uhileveleliya. Ni unari wiira atthu o wanlokoni khayanlevelenle, uyo atthunaka aahala wuupuwela wiira Yehova khanhala unlevelela. Ni iyo itthwiiyo pooti waahalaaya unriipiha nrima ni mpaka uhiya unswalela Yehova. Iyo phiitthu Sotwani yaapheelaawe. Mahukwaala ciicammo, Sotwani noopheela wiira hiiva nuupuwele wiira Yehova khanhala unilevelela itampi cihu ni wiira nihiye unswalela. Masi ukhala wiira khanintikhina itapha cawe, hi khaninhiya umwaanana.—2 Akor. 2:5-11.
6. Isiyani inlamuliyeehu upanka naahikupaliki wiira Yehova honilevelela?
6 Nakupaliki wiira Yehova naanilevelela, ninaakhala ootteeliya. Napankaka itthu yoohinamaana, hiiva unaniriipa nrima cinene nlattu wo itthu ipankileehu. (Isaa. 51:17) Iyo ikhanle itthu yomaana. Kontha nacuwelaka wiira nihopanka itthu yoohinamaana, pooti unikurumica upanka marukunuso ni upacera upanka citthu comaana. (2 Akor. 7:10, 11) Masi wakhalaka wiira nanlelo ninoopuwela wiira Yehova khanilevelenle nhina itthu ipankileehu, pooti uniloloviha ni uhiya unswalela. Nakupaliki wiira Yehova honilevelela, ninaakhala ootteeliya ni unswalela nimananna cimpheelaawe. Ni iyo phiitthu Yehova impheelaawe. (Akol. 1:10, 11; 2 Tim. 1:3) Masi, manannani ninhaleehu ukhitiri upanka marukunuso ni ukupali wiira Yehova honilevelela?
ISIYANI INHALA UNIKAVIHERA UKUPALI WIIRA YEHOVA HONILEVELELA?
7-8. Isiyani Yehova ihimilyaawe eecaacaka uyova ni isiyani inlamuliyeehu ukupali? (Nkwaha 34:6, 7)
7 Muupuwele itthu Yehova ihimilyaawe eecaacaka uyova. Moone itthu yiirannyeele, ukati Moceesi waapheelaawe uncuweleeha cinene Yehova, muupuwele itthu yaamwiirenlyaawe.a (Nsome Nkwaha 34:6, 7.b) Hataa ukhalaka wiira Yehova haana makhalelo menci omaana, uyo aholakela unhimerya Moceesi wiira khanle Nluku nakiriri. Vano, niireke Nluku khampa uyo, anhala ukhotta unlevelela nswalyaawe oonihenre uttharuwa itampi cawe? Hataa vakaani! Upanka commo, khaahala woonihera wiira khanle Nluku okiriri.
8 Hiiva pooti wankupaliihu wiira Yehova uhimya wawe wiira khanle nakiriri, uyo nohimya ikhweeli, kontha khanle Nluku hinootha. (Isaa. 31:5) Phimaana, nihaana ukupali itthu inhimyaawe. Vano, wakhalaka wiira nyuuva unawuurikani ukupali wiira Yehova hoolevelelani, mwiikohe co: ‘Kiireke kinaakupali wiira Yehova khanle nakiriri ni khankhotta unlevelela ule noonihera uttharuwa?’ Wakhalaka wiira nyuuva nnaakupali wiira khanle Nluku nakiriri, pooti wankupaliinyu wiira ciicammo hoolevelelani.
9. Manannani Yehova cinnilevelelaawe itampi cihu? (Isaalimu 32:5)
9 Muupuwele itthu Yehova inniitthucihaawe mbiibiliyani mananna cinnilevelelaawe. Moone ntakihero na mwene Davidi itthu ihimilyaawe aacaka ulevelela wa Yehova. (Nsome Isaalimu 32:5.c) Davidi enre co: “Nyuuva nhokilevelela itampi caka.” Nuulumo “ulevelela” niiluuka iheperewu, pooti waaciya “ukumiha” awula “ucisa.” Vano, Yehova unlevelela wawe Davidi, uyo aaheecoona khampa wiira Yehova howaaca umwaakhela nrinttyuuyo ni nuurihela uttayi. (Isaa. 32:2-4) Ni hiiva ciicammo, pooti uniirannyeela itthu imocaaru yaamwiirannyenle Davidi. Nooniheraka uttharuwa weekhweeli, khaninhala uturuwela-tho ukhala ooriipiya nrima nlattu wo itthu ipankileehu. Uhiya commo, ninaakhala ootteeliya kontha Yehova honilevelela weekhweeli.
10-11. Isiyani nuulumo “wiitthenkaca wiira alevelele” ninhimyaaya namwaacaka Yehova? (Isaalimu 86:5)
10 Nsome Isaalimu 86:5.d Davidi neera wiira Yehova ri “owiitthenkaceene wiira anilevelele.” Iyo maanaaya wiira Yehova khanviruwa navaraka itampi ni uyo naapheela cinene waalevelela ale anoonihera uttharuwa. Kontha isiyani Yehova nopankaawe commo? Mphantte nkhwaawe wo iyo iveeruswiiyo ineera: “Nikhanle nuulupale nifento nookhuluvelya ninwooniheraa atthu otheene anooswalela.” Mwaha uvinre, niheetthuca wiira Yehova hokhuluveliha uwoonihera nifento nookhuluvelyaa ale anonfenta ni khanhala waanyanyala. Nlattu wonifento nawe nookhuluvelyaa, uyo nawaalevelela niiraati otheene anoonihera uttharuwa itampi caya. (Isai. 55:7.) Wakhala wiira nyuuva khannokupali wiira Nluku hoolevelelani itthu ipankileenyu khalayi, muupuwele co: ‘Nyuuva nnaakupali wiira Yehova ri owiitthenkaceene para waalevelela otheene ale anoonihera uttharuwa itampi caya ni anlompa yanlepelaka woonihera unakiriryaawe, nyuuva pooti ukupali wiira Yehova ciicammo hoolevelelani ukati mwanlepenleenyu wuulevelelani.’
11 Ucuwela wiira Yehova naacuwela mananna hiiva numpiyeehu ni upahuwa wihu, ninaakhala oolipihiya. (Isaa. 139:1, 2) Iyo inawoonannya nhina Isaalimu ikhwaawe Davidi yuulumilyaawe inhala unikavihera ciicammo ukupali uleveleliya ni Yehova.
YEHOVA NAACUWELA MANANNA CUMPIYEEHU
12-13. Khampa cinthoonyeraaya Isaalimu 103:14, isiyani Yehova ihinliyalaawe ni manannani cinnivaceraawe?
12 Nsome Isaalimu 103:14.e Davidi naahimya wiira Yehova “naacuwela wiira hiiva nikhanle ntthupi.” Naala moolumwaala, Davidi naahimya itthu immwiiriha Yehova ukhala owiitthenkaca wiira aalevelele aswalyaawe anoonihera uttharuwa. Uyo naacuwela wiira hiiva nikhanle atthu oopahuwa. Nttwee noone vakaani iyo itthwiiyo maanaaya.
13 Davidi neera wiira Yehova naanicuwela mananna cumpiyeehu. Uyo ahomumpa Atamu ni ntthupi notthaya ni naacuwela itthu apinaatamu impheelaaya. Wootakihera, ayo anaapheela ulya, urupa ni ukhala akumi. (Upha. 2:7) Ukhala wiira Atamu ni Hawa ahovara itampi, apinaatamu ahokhala ntthupi nimananna makhwaawe. Hi nikhanle ntthupi kontha nikhanle atthu oopahuwa ni nihaana uhihiyerera waanana unyema upanka citthu cootakhala. Yehova naacuwela wiira nlattu wookhala ucuulu wa Atamu ni Hawa, ikwaha cikhwaawe ninaavara itampi. Ni navaraka itampi ni nooniheraka uttharuwa, uyo naanoonela ikiriri ni naanilevelela .—Isaa. 78:38, 39.
14. a) Isiyani Davidi ihimilyaawe-tho mananna Yehova cinnilevelelaawe? (Isaalimu 103:12) b) Isiyani ineetthuceehu nimananna Yehova canlevelenlyaawe Davidi? (Nwehe ikwaaturu“Mananna Yehova nolevelelaawe ni noliyalaawe.”)
14 Isiyani inhala unikavihera-tho ukupali wiira Yehova honilevelela? (Nsome Isaalimu 103:12.f) Davidi neera wiira, Yehova anilevelelaka itampi cihu, uyo naarihela uttayi cinene, khampa uttalivannyaaya unkhumaaya ncuwa ni unkelaaya ncuwa. Khampa uhinkumana caya unkhumaaya ncuwa ni unkelaaya ncuwa, ireferensiya imoca ineera wiira Yehova anilevelelaka naacisa itampi cihu ni urihela uttayi. Phimaana, nihaana ukupali wiira Yehova khanhala wuupuwela-tho itthu ipankileehu. .—Ezek. 18:21, 22; Mite. 3:19.
15. Isiyani inlamuliyeehu upanka wakhalaka wiira nanlelo khaninkupali wiira Yehova honilevelela itampi civanreehu khalayi?
15 Manannani moolumo a Davidi nhina Isaalimu 103 anhalaaya unikavihera ukupali wiira Yehova honilevelela? Muupuwele mananna Yehova cineecoonaawe. Uyo naacuwela wiira nyuuva nkhanle ntthu oopahuwa. Ni Yehova nawaalevelela ale otheene anoonihera uttharuwa itthu ipankilyaaya ni ampanka marukunuso. Muupuwele ciicammo wiira Yehova holakela uhuupuwela itampi caatthu caalevelenlyaawe. Phimaana, uyo khanhala wuuttarusani. Yehova khanweheeha itampi civanreenyu khalayi ni nyuuva ciicammo nnolamuliya uliyala. (Isaa. 130:3) Nakupaliki wiira Yehova honilevelela, ninaahiya wuupuwela ni khaninhiyerera unswalela wanitteelaka nrima.
16. Nhimye ntakihero ninoonihera wiira ikhanle itthu yowoopiha wuupuwela cinene itampi Yehova cinilevelenlyaawe. (Nwehe ciicammo ilatarato.)
16 Muupuwele co, ntthu eettihaka ikaaro, naaweheeha ispeliyu wiira oone itthu inontthara. Masi uyo khanweheeha ukati wotheene. Yaahala ukhala itthu yowoopiha unari wiira anweheeha ukati wotheene ispeliyu. Wiira eettihe nimananna ookhikicerya, uyo haana uhihiyerera uweheeha uhoolo unkelaawe. Inanna imocaaru, ikhanle itthu yomaana ikwaha cikhwaawe wuupuwela itampi cipankileehu khalayi, kontha nnyo pooti unikavihera unyema uturuwela-tho upanka. Masi natepaka uweheeha itampi civanreehu khalayi, pooti uniloloviha wiikurumica wihu unswalela Yehova. Uhiya commo, nihaana uhihiyerera wiikurumica urwaa uhoolo ni wuupuwela citthu coohoolo cikhuluvelihilyaawe.—Isai. 65:17; Miru. 4:25.
Khampa ntthu neettiha ikaaro nolamuliyaawe uweheeha uhoolo unkelaawe uhiya uweheeha ispeeliyu, hiiva ciicammo ninlamuliya uweheeha iparakha cinhaleehu waakhela uhoolo, uhiya uweheeha itampi civanreehu khalayi (Nwehe iparaagarafu 16)
NHIHIYERERE UKUPALI ULEVELELIYA
17. Kontha isiyani ninlamuliyeehu uhihiyerera ukupali wiira Yehova naanifenta?
17 Ninlamuliya uhihiyerera ukupali wiira Yehova naanifenta ni naanilevelela. (1 Jo. 3:19.) Kontha isiyani? Kontha ayo akhanle mananna Sotwani novarelaawe nteko wiira anihiihe unswalela Yehova. Ni ukati untepeehu waattamela wuumaleloni ula ulumwenkuula, uyo naapanka yotheene inkhitiryaawe para unikupaliha wiira khaninfentiya ni khaninleveleliya ni Yehova, kontha naacuwela wiira unonhaleela ukati vakaani paahi wiira amalamalihiye. (Apoka. 12:12) Masi nihaana uhihiyerera umwaanana Sotwani ni unswalela Yehova wookhuluvelyaa!
18. Isiyani inlamuliyeenyu upanka para ukupali wiira Yehova nawuufentani ni naapheela wuulevelelani?
18 Mwaha uvinre, uhoonihera isiyani inlamuliyeenyu upanka para ukupali wiira Yehova nawuufentani. Nhina ula mwahoola, nheetthuca mananna ookupali wiira Yehova hoolevelelani, wootakihera, muupuwele itthu ihimilyaaya eecaacaka uyova. Muupuwele isiyani Ibiibiliya inhimyaaya mananna Yehova nolevelelaawe ni nhiliyale wiira uyo naacuwela wiira nyuuva nkhanle ntthu oopahuwa ni naahala uwoonihera unakiriryaawe. Uhiya commo, nhiliyale wiira, anlevelelaka ntthu, uyo khanoopuwela-tho itthu ipankilyaawe ntthuuyo. Vano, nyuuva nnaahala ukhuluvela khampa mwene Davidi caakhuluvenlyaawe unakiriri wa Yehova eeraka co: ‘Kihosukhuru, Yehova, uhokilevelela itampi caka!’—Isaa. 32:5.
NCIPO 1 Makhalelo a Yehova
a Nwehe mwaha uneera “Yehova khanle namalevelela muulupale”, nhina irevista Ukhalenla Junho 2022 iparaag. 4-7.
b Nkwaha 34:6 Yehova ahonvira uwiitho eeraka co: “Yehova, Yehova, Nluku okiriri ni oothunku, oovilela ni oomwinciva nifento nookhuluvelya ni ikhweeli, 7 nwoonihera nifento nookhuluvelya atthu imiliyawu cene, aalevelelaka makoosi, uvonyaniha waya, ni matampyaaya. Masi khanhala unhiya woohinhukhumu ule tthekale, kontha naahala waawiihera nttaruso ayari, asaana, ni ucuulu.
c Isaalimu 32:5 Vano, kahoohimyera itampyaaka. Akaavithile nikoosi naka. Mi kiheera: “Kinaahala uncuweliha Yehova makoosyaaka.” Ni weeva uhokilevelela nikoosi naka ni matampyaaka.
d Isaalimu 86:5 Kontha nyuuva, Yehova, nkhanle namaana ni khula ukati nnaatthuna ulevelela; nikhanle nuulupale nifento nookhuluvelya ninwoonihereenyu atthu otheene anooswalelani.
e Isaalimu 103:14 Kontha uyova naacuwela sana-saana inanna cumpiyeehu, khanliyala wiira hiiva nikhanle ntthupi.
f Isaalimu 103:12 12 Toko cittalivannyaaya unkhuma ncuwa ni unkela ncuwa, ciicammo uyo naattikhela uttayi matampiihu.