MWAHA WOOSOMIYA 22
NCIPO 15 Munvuwihe Kristu: Mwaana Oopacerya a Yehova
Yesu noonela cani ncina na Yehova?
“Miiva kihaacuweliha ncina ninyu ni akinhala uhiya ulalya.”—JOAU 17:26.
ITTHU INHALEEHU WIITTHUCA
Nhina ula mwahoola, ninaahala woona mananna Yesu cuwelihilyaawe, reerihilyaawe ni cittittimihilyaawe ncina naathumwaane.
1-2. a) Isiyani Yesu yaapankilyaawe uhiyu waya nihuku nahalaawe wiiviya? b) Makohoni anhaleehu waakhula nhina ula mwahoola?
UHIYU wo neecese nihuku 14 mweeri wo Nisam mwaakha wo 33 nawile Kristu, Yesu ahaalyaana maapostolwaawe Paasikuwa. Uyo ancuwela wiira, woohipica anhala utumihiya, waattiya ni wiiviya naawanannyaawe. Vano, umaliha wawe ulya, ahaalipiha maapostolwaawe. Ukati waapheelaaya ukhuma, Yesu ahopanka nivekelo nofayita. Apostolu Joau ahantikha nno nivekelonno ni ninaaphwanya nvangenliyu wawe ikapiitulu 17.
2 Nhina ula mwahoola, ninaahala woona isiyani ineetthucereehu nivekelo na Yesu. Ni ninaahala woona waakhuliya wo ala makohwaala: Isiyani Yesu yaavahaawe ifayita cinene hinaaya ukhwa? Isiyani yoonaawe ukhalana ifayita cinene ukati waaryaawe watuninyani?
“KIHAACUWELIHA NCINA NINYU”
3. Isiyani Yesu yaahimilyaawe nhina ncina na Yehova ni isiyani yaapheelaawe uhimya? (Joau 17:6, 26)
3 Ukati waalompaawe, Yesu aheera: “kihaacuweliha ncina ninyu.” Unawoonannya wiira uyo mwahooyo waari wofayita cinene, kontha Yesu ahooluma ikwaha piili. (Nsome Joau 17:6, 26.a) Isiyani Yesu yaapheelaawe uhimya? Niireke wiira Yesu apheela uhimya wiira howiitthuciha attharyaawe ncina na Nluku? Atthari a Yesu yaari ayuuta. Phimaana, ayo yancuwela ncina na Nluku. Nno ninaakhumela ikwaha cookhalaka imiliyawu 7 nhina Cowantikhiya Ceeheperewu. Yesu khaawiitthucihile attharyaawe ncina na Nluku. Khweeliini, uyo awiitthucihale nno ncinanno maanaaya isiyani. Yesu ahaakavihera attharyaawe uncuwela sana-sana Yehova, uhela nhina citthu cipankilyaawe, itthu inaapheelelaawe apinaatamu ni makhalelwaawe. Yesu paahi phaahala wiitthuciha sana-sana makhalelo a Yehova, kontha uyo phancuwela sana-saana waavikana atthu otheene.
4-5. a) Nhimye ntakihero ninthoonyera ucuwela ncina na ntthu maanaaya isiyani. b) Manannani atthari a Yesu awilyaaya yacuwelaka ncina na Yehova?
4 Muupuwele wiira humu o wanlokoni winyu khanle meetiku owooperari ni nyuuva nnancuwela ikhumelo yo khalayi. Vano nihuku nimoca, nyuuva nnaawerennya ni nnaatthawihenreriya usipitaali unvaraawe nteko uyo munnooyo ni nawoopola ukumiinyu. Vano nyuuva nnaatepa unfenta uyo munnooyo ni ukati uniiweenyu nuulumiyaka ncina nawe, nnawuupuwela itthu yuupankenlyaaweni. Uyo munnooyo nanlelo khanle humu nnoncuweleenyu nenne nokhalayi. Masi, nna coo, uyo khanle meetiku oponle ukumiinyu.
5 Inanna imocaaru, atthari a Yesu yancuwela ncina na Yehova. Masi, nlattu wa Yesu, ayo yahoonelela wiira nno ncinanno nahaana ifayita muukumini waya. Kontha isiyani? Kontha nhina wo citthu caapankaawe ni coolumaawe, Yesu anoonihera makhalelo a Yehova. Vano, ayo yanancuwela sana-sana Yehova ukati Yesu aawaceraawe atthu ni aawiitthucihaawe.—Joau 14:9; 17:3.
“NCINA NINYU, NCINA NIKIVAHILEENYU”
6. Isiyani Yesu yaapheelaawe uhimya ukati weenryaawe ncina na Yehova hovahiya? (Joau 17:11, 12)
6 Ukati waalompaawe, Yesu ahaalompela attharyaawe, eeraka: “Mwaakhikicere ayo nlattu wo ncina ninyu, ncina nikivahileenyu.” (Nsome Joau 17:11, 12.b) Niireke wiira Yesu aakowiihaniya Yehova? Mena. Yesu aheera “ncinaninyu”, amwaacaka Yehova. Wiira wawe commo, Yesu hoonihera wiira khaawyeele ncina na Yehova. Vano, kontha isiyani Yesu wenryaawe wiira ahovahiya ncina na Nluku? Yoopacera, Yesu ari nrumiya a Yehova. Uyo awile watuninyani mwa ncina na Yehova ni ampanka citthu cinci cootikinihaca mwancina naathumwaane. (Joau 5:43; 10:25) Uhiya commo, ncina na Yesu maanaaya wiira “Yehova moopoli.” Khweeliini, ncina na Yehova ninaalattanaca ninno na Yesu.
7. Nhimye ntakihero no mananna Yesu aahalaawe wuuluma mwa ncina na Yehova.
7 Wiira niiweehe saana, muupuwele nna ntakihero nna. Embaxador nokhala ntthu nrumiya ilapo ikhwaawe wuuluma mwa ncina na nhooleli olapwaawe. Phimaana, moolumo a Embaxador anaattittimihiya toko caahalaaya uttitthimihiya moolumo a nhooleli o ilapwaawe. Inanna imocaaru, Yesu ri khampa Embaxador a Yehova, kontha nuuluma mwa ncina nawe.—Mat. 21:9; Luka 13:35.
8. Manannani Yesu aaryaawe nrumiya a Yehova hataa ukati waaryaawe hinayaryaa khampa pinaatamu? (Nkwaha 23:20, 21)
8 Ibiibiliya immwiihana Yesu “Nuulumo”, kontha Yehova naanvarela nteko Yesu wiira aahimeerye malakiherwaawe malayikha ni apinaatamu. (Joau 1:1-3) Pooti Yesu phaari nlayikha naarumiya wiira niweettihere asarayeli ukati weettaaya muuthakoni. Ukati Yehova waasovenrihilyaawe asarayeli wiiwelela nno nlayikha nno, uyo ahohimyaca kontha isiyani. Uyo enre: “Ncina naka niri ninno nlayikhanno.”c (Nsome Nkwaha 23:20, 21.d) Yehova enre commo, kontha ancuwela wiira Yesu aanhala woonihera makhalelo mamocaaru uyo rinaawe, uhimya ikhweeli cawe ni ureeriha ikhweeli naathumwaane.
“PAAPA, NTTITTHIMIHE NCINA NINYU”
9. Ifayitani Yesu aavahaawe ncina na Yehova?
9 Khampa noonileehu, hataa ukati Yesu aaryaawe hinawa watuniyani, ncina na Yehova yaari itthu yofayita cinene muukumini wawe. Citthu cotheene Yesu caapankaawe ni caahimyaawe ukati waryaawe va watuniyani vaa cinawoonihera mananna ncina na Yehova naarinaaya ifayita. Ukati waamalihilyaawe nteko woolalyeera va watuniyani vaa, uyo ahonlepela Yehova, eeraka co: “Paapa, nittitthimihe ncina ninyu.” Ni athumwaane yahomwaakhula ni ncu nuulupale naakhanle khampa itari. Ayo yenre co: “Mi kihottitthimiha ncina naka ni kinaahala uturuwela uttitthimiha.”—Joau 12:28.
10-11. a) Manannani Yesu ttitthimihilyawe ncina na Yehova? (Nwehe ciicammo ilatarato.) b) Kontha isiyani ncina na Yehova nihaana ureerihiya ni ucuwelihiya?
10 Yesu ciicammo ahottitthimiha ncina naathumwaane. Manannani? Inanna imoca, waari wuuluma makhalelo omaana a Yehova ni citthu cootikhiniha caapankilyaaya. Masi iyo khintosa paahi. Ncina na Yehova nahaana nareerihiyaka ni naturuweliyaka uttitthimihiya.e Yesu ahoonihera mananna iyo itthwiiyo iryaaya yofayita ukati waawiitthucihilyaawe eetthucyaawe mananna oolompa. Uyo enre: “Apaapeehu nri wiirimu, ninaalompa wiira ncina ninyu nihisimiye cinene.”—Mat. 6:9.
11 Kontha isiyani ncina na Yehova ninlamuliyaaya ureerihiya ni ucuweliya? Kontha Sotwani honanariha ncina na Yehova ni hohimya citthu cowoothiya ujardim yo u Edeni. Sotwani enre wiira Yehova khanle owootha ni khaavaha citthu comaana apinaatamu oopacera. (Upha. 3:1-5) Ciicammo, Sotwani aheera wiira mananna Yehova nopankaawe citthu akhanle oohinamaana. Nlattu wo citthu cowoothiya Sotwani caahimilyaawe, atthunaka atthu yahopacera umoona Yehova ukhala Nluku oohinamaana. Ukati wa Jo, Sotwani ahowoothereriha aswali a Yehova wiira yanswalela yapheelaka citthu. Uyo ciicammo aholakela wiira khaavo aahala unswalela Yehova ni ukhala ookhuluvelya. (Jó 1:9-11; 2:4) Nuuwakatyaaya, waanhala ucuwannyaa tipani aari owootha, Yehova awula Sotwani.
Yesu awiitthucihaka attharyaawe ifayita irinaaya ureeriha ncina na Yehova (Nwehe iparaagarafu 10)
“KINAAVAHA UKUMYAAKA”
12. Isiyani Yesu yaalakenlyaawe upanka nlattu woofenta ncina na Yehova?
12 Nlattu wonfenta Yehova, Yesu aheekurumica upanka yotheene yaakhitiryaawe wiira areerihe ni acuwelihe ncina na Yehova. Uyo ahokupali ukhwa para woonihera wiira Yehova khanle owaarya ni citthu cotheene cimpankaawe cikhanle comaana. Uyo enre co: “kinaavaha ukumyaaka.” (Joau 10:17, 18) Apinaatamu oohipahuwaf Atamu ni Hawa, yahonrukunuwela Yehova ni yaahokhala mphantte wa Sotwani. Woovirikana naayo, Yesu aholakela uwa watuniyani wiira oonihere athumwaane nifento noohipawu. Uyo aapankile iyo amwiiwelelaka Yehova muukumini wawe motheene. (Mabere. 4:15; 5:7-10) Yesu khaahiile uvaresesa imaani mpaka waakhwilyaawe.(Mabere. 12:2) Upanka wawe commo, uyo hoonihera unfenta Yehova ni ncina nawe.
13. Kontha isiyani Yesu aaryaawe ntthu ooreera woonihera wiira Sotwani nawootha? (Nwehe ciicammo ilatarato.)
13 Citthu cotheene Yesu caapankaawe caanawoonihera wiira Sotwani phiri owootha, kahi Yehova! (Joau 8:44) Yesu aanancuwela sana-sana Yehova. Phimaana, unari wiira citthu cotheene Sotwani caahimyaawe caari cokhweeli, Yesu aanhala ucuwela. Yesu khaahiile ukhala ookhuluvelya ni waakihera ncina na Yehova. Hataa wakhalaka toko wiira Yehova aahonnyanyala, Yesu aholakela ukhwa, uhiya waarukunuwela athumwaane oofenta, Yehova.—Mat. 27:46.g
Ayariyeru mpaka ukhwa, Yesu hoonihera wiira Sotwani phiri owootha, kahi Yehova! (Moone iparaagrafu 13)
“KIHOMALIHA NTEKO MWAAKIVAHILEENYU”
14. Manannani Yehova ntthuvenlyaawe Yesu nlattu wookhala ookhuluvelyaa?
14 Yesu hinaaya ukhwa, aholompa eeraka: “Kihomaliha nteko mwaakivahileenyu wiira kipanke.” Yesu aanaamini wiira aahihiyeke ukhala ookhluvelyaa, Yehova aanhala uncaaliha ni iyo phiitthu yaapankilyaawe. (Joau 17:4, 5) Yehova ahomunweleliha Yesu ni honvaha nrintti muulupale wiirimu. (Mite. 2:23, 24; Afili. 2:8, 9) Nuuwakatyaaya, Yesu hokhala Mwene Oomwene wa Nluku. Isiyani unhalaaya upanka umwene? Yesu nawaakhula nno nikohonno nhina nivekelo neetthucihalyaawe. Uyo enre: “Umweneenyu ulamulela va watuniyani vaa ni ipankiye impheeleenyu wiirimu ni ciicammo va watuninyani vaa.“—Mat. 6:10.
15. Isiyani-tho Yesu inhalaawe upanka?
15 Woohipica, Yesu naahala uwaanana awanani a Nluku ni waamalamaliha ukhottoni yo Armacetoo. (Apoka. 16:14, 16; 19:11-16) Ciicammo, Yesu naahala unttikhela Sotwani munlittini, nipuro uyo nihinhalaawe waathepya-tho apinaatamu ni ninhalaawe ukhala khampa hookhwa. (Apoka. 20:1-3) Yesu naahala uwaana nnema va watuninyani vaa ni naahala waakavihera apinaatamu ukhala oohipahuwa ukati unhalaawe ulamulela nhina myaakha 1.000. Ciicammo, naahala uwunweleliha ale akhwile ni wiiriha ituninya ukhala ipeephoni. Wahoolo waya, itthu Yehova inaapheelelaawe apinaatamu inaahala wiirannyaa!—Apoka. 21:1-4.
16. Unhala ukhala cani ukumi caviraka myaakha 1.000?
16 Isiyani inhala ukhumelela caviraka myaakha 1.000 Yesu alamulelaka? Itampi ni upahuwa khunhala ukhala-tho. Apinaatamu khaanhala ulepela-tho uleveleliya coovonya caya. Ciicammo, ayo khaanhala ulepela-tho uleveleliya itampi caya wavareliyaka nteko wiivaherera wantthu wiira akhale apatthani a Yehova. ”Nwananiihu muulupale ukhanle ukhwa unaahala umala”, atthu ookhwa anaahala wunwelelihiya ni atthu otheene va watuniyani vaa anhala ukhala oohipahuwa.—1 Akor. 15:25, 26.
17-18. a) Isiyani inhala wiiranyaa wiimaleloni wo myaakha 1.000? b) Isiyani Yesu inhalaawe upanka wiimaleloni wo myaakha 1.000? (1 Akorintu 15:24, 28) (Nwehe ciicammo ilatarato.)
17 Itthuni-tho inhala wiiranyaa wiimaleloni myaakha 1.000 Yesu cinhalaawe ulamulela? Khaavo nohala waanyihacera wiira Yehova khanle Nluku owaarya ni osariya. Manannani? Ujardim yo Edeni, Sotwani ahomoothenriha Yehova ukhala nhooleli oohaafenta atthu ni owootha. Masi, wiimaleloni wo myaaka 1.000 Yesu unrwaawe ulamulela, khaavo nhala utikhinaca wiira Yehova khanle nyari onifento.
18 Woohipica, unaahala woonanyaa wiira citthu cotheene Sotwani cihimilyaawe cikhanle cowoothiya. Isiyani Yesu inhalaawe upanka wuumaleloni myaakha 1.000 cinhalaawe ulamulela? Niireke naahala uthara ntakihero na Sotwani ni unrukunuwela Yehova? Yesu khanhala upanka commo! (Nsome 1 Akorintu 15:24, 28.h) Yesu naahala uhokolosera umwene waathumwaane ni naahala utthuna uhooleliya. Khweeliini, woovirikana ni Sotwani, Yesu holakela uhiya citthu cotheene mmatatani wa Yehova, kontha uyo nanfenta.
Yesu naahala ukhala otteeliya ukati unhalaawe unhokolosera Yehova umwene camalaka myaakha 1.000 (Nwehe iparagrafu 18)
19. Yesu oonela cani ncina na Yehova?
19 Yehova ahaana isariya yoonthanla Yesu wiira akhale nrumiyaawe. Ni uyo naavara ratta-raatta uyo ntekooyo. Vano, manannani Yesu noonelaawe ncina na Yehova? Moonelo a Yesu, nno ncinanno maanaaya citthu cotheene, citthu cotheene uvikana khula itthu. Uyo mpaka ahaamini uleva ukumyaawe nlattu wo nno ncinanno. Ni wiimaleloni wo myaakha 1.000, uyo naahala waavaha athumwaane Umwene. Ninhala utakiha cani makhalelo a Yesu? Ninaahala woona waakhuliya waya nna nikohonna nhina mwaha untharanana nuula.
NCIPO 16 Ninvuwihe Yehova Mwaha wa Mwanawe Othanliwe
a Joau 17:6 Kihaacuweliha ncina ninyu atthu ontuninyani nkivahileenyu. Ayo yaari aawinyu masi nhokivaha miiva ni ayo ahiiwelela nuulumo ninyu. 26 Mi kihaacuweliha ncina ninyu ni akinhala uhiyerera waacuweliha, wiira mananna cikifentileenyu naayo mwaafente ni miiva kiwaataanane.
b Joau 17:11 Vano miiva akirii ntuninyani, masi ayo ari ntuninyani, ni miiva kinaawa nipuro niriinyu, Apaapa Owaarya, mwaakhikicere ayo nlattu woncina ninyu, ncina nikivahileenyu, wiira ayo yaataane khampa hiiva cinaataaneehu. 12 Ukati waaryaaka naayo, kaanaakhikicera nlattu woncina ninyu, ncina nikivahileenyu; ni kihaakhikicera ni khaavo rimenle, hikhanle mwaana aayariye wiira atankanyiye, wiira yiirannye itthu inhimyaaya cowantikhiya cowaarya.
c Ikwaha cinci Yehova naaruma malayikha wiira yuulume mwa ncina nawe. Phimaana, ikwaha cikhwaawe Ibiibiliya inawiira Yehova phinuuluma, masi khweeliini ninari nlayikha. (Upha. 18:1-33) Wootakihera, Ibiibiliya inaahimya wiira Yehova ahonvaha malamulo Moceesi, masi iveerusunnyo cinawoonihera wiira aavarenle nteko nlayikha wiira apanke iyo.—Levi. 27:34; Mite 7:38, 53; Akol. 3:19; Mabere. 2:2-4.
d Nkwaha 23:20 Kinaahala uruma nlayikha nimoca uhoolo winyu wiira nuukhikicereni ni nuuveleeleni mpaka nipuro kitthenkacilyaaka. 21 Nviriyane saana ni mwiiwelele itthu inhalaaya uhiya nno nlayikhanno. Nhihiye wiiwelela nno nlayikhanno kontha khaninhala ulevelela citthu cinhaleenyu uvonya ni ncina naka niri ninno nlayikhanno.
e MOOLUMO OOTAPHULELIYA: Nuulumo “ureeriha” maanaaya uhisima, woona ukhala itthu yowaarya, uswalela awula uhisima cinene. Nuulumo “uturuwela uttitthimiha” maanaaya ureeriha makhalelo a ntthu noothererihiya ukhalana makhalelo ohinamaana awula woonihera wiira uyo khampanka nnyo citthunnyo.
f Ukhwa wa Yesu ciicammo uhaavaha iparakha apinaatamu yookhalana ukumi woohimala.
g Nwehe “Makoho Aanamasoma” nhina irevista Ukhalenla ya Abril 2021 ipaag. 30-31.
h 1 Akorintu 15:24 Vano wuumaleloni, phinhalaawe waahokolosera Umwene Athumwaane ni Nlukwaawe, napacile toko umalamaliha ikuvernu cotheene, ukhulupale wotheene ni ikuru cotheene. 28 Nluku apankihaka citthu cotheene umwiiwelela Mwanawe, Mwanawooyo ciicammo naahala uwiiwelela Athumwaane, ale apankihile citthu cotheene umwiiwelela. Ayo manannaayo, Nluku paahi phinhala ulamulela citthu cotheene.