MWAHA WOOSOMIYA 23
NCIPO 2 Nsina Nanyu ti Yehova
Ifayitani nirinaaya ncina na Yehova para hiiva?
“‘Nyuuva nkhanlee masaahityaaka’, neera Yehova.”—ISAI. 43:10.
ITTHU INHALEEHU WIITTHUCA
Nhina ula mwahoola, ninaahala woona isiyani inlamuliyeehu upanka wiira nireerihe ni nituruwele uttitthimiha ncina na Yehova.
1-2. Nincuwela cani wiira Yesu oonela ukhala itthu yofayita ncina na Yehova?
YESU oonela ukhala itthu yofayita ncina na Yehova muukumini wawe. Uyo khanlee ntthu notepa waakiha cinene ncina na Yehova. Khampa nonneehu nhina mwaha uvinre, Yesu ahokupali ukhwa para woonihera wiira Yehova khanlee owaarya ni citthu cotheene cimpankaawe cikhanle comaana. (Mark. 14:36; Mabere. 10:7-9) Caviraka myaakha 1.000 cinhalaawe ulamulela, Yesu naahala uhiya ukhulupale wotheene mmatatani wa Yehova, kontha noopheela wiira uttitthima wotheene ukhale wa Yehova. (1 Akor. 15:26-28) Mananna Yesu cinvahaawe ifayita ncina na Yehova, unawoonihera wiira nifento nirinaawe naathumwaane nikhanle nuulupale.
2 Yesu aawile watuniyani wiira acuwelihe ncina naathumwaane. (Joau 5:43; 12:13) Uyo ciicammo ahowiiriha attharyaawe ucuwela ncina naathumwaane ni ahopanka miiriirya. (Joau 17:6, 26; 10:25) Ni Yesu ahonlepela Yehova wiira aakavihere attharyaawe “nlattu wo ncina na Yehova.” (Joau 17:11) Unawoonannyaa wiira, Yesu oonela ukhala itthu yofayita ncina na Yehova. Vano, mweemele ni muupuwele: manannani nyuuva nnohaleenyu waahimeerya atthu wiira nkhanlee nkristau ni nnaavarela nteko ncina naathumwaane Yesu?
3. Isiyani inhaleehu woona nhina ula mwahoola?
3 Ukhala wiira nikhanlee makristau eekhweeli, hi ninantakiha Yesu, ninaafenta ni ninaahisima ncina na Yehova. (1 Pet. 2:21) Nhina ula mwahoola, ninaahala woona kontha isiyani atthu anlalyeera “ihapari comaana co Umwene wa Nluku” mahukwaala ancuweliyaaya nlattu wo ncina na Yehova. (Mat. 24:14) Ni ciicammo ninaahala woona manannani ninhaleehu woonihera wiira ncina na Yehova nikhanle nofayita cinene muukumini wihu.
“APOOVU ANHALA UCISA NCINA NAWE”
4. a) Isiyani Yesu yaawiirenlyaawe attharyaawe hinaaya urwaa wiirimu? b) Nikohoni ninhaleehu waakhula?
4 Ukati vakaani hinaaya urwaa wiirimu, Yesu ahowiirela attharyaawe co: “Ukati unhaleenyu uveleeliheriya nnepa wowaarya, nnaahala waakhela ikuru ni nnaahala ukhala masaahityaaka u Yerusaleemu, u Yuuta wotheene ni u Samariya, ni mpaka micoko coottayi nviralyaaya ituninya.” (Mite. 1:8) Iyo maanaaya wiira attharyaayo yaanhala ulalyeera ihapari comaana mapuro otheene, uhiya paahi u Sarayeli. Nuuwakatyaaya, atthu otheene yaanhala ukhalana ukati wookhala atthari a Yesu. (Mat. 28:19, 20) Ukati Yesu weenryaawe: “Nnaahala ukhala masaahityaaka”, niireke ayo attharyaayo yaahala ukhala masaahiti a Yesu paahi awula yaalamuliya ucuwela ncina na Yehova? Ikapiitulu 15 yo Miteko inaanikavihera uphwanya waakhuliya waya nna nikohonna.
5. Manannani maapostolu ni mahumu o Yerusaleemu yoonelenlyaaya wiira ncina na Yehova nahaana nacuweliyaka? (Nwehe ciicammo ilatarato.)
5 Mwaakha 49 nawile Kristu, maapostolu ni mahumu yaahothukumana u Yerusalemu wiira yoopele mwaha isiyani ale yahaari a Yuuta yaalamuliyaaya upanka wiira akhale makristau. Wuumaleloni uyo nkutthaanooyo, Tiyaku, nhimaawe Yesu, aheera co: “Peturu hottonkaca mananna Nluku cipacenryaawe waawacera amalaponi wiira, iriyaryaaya, aatthonkomanihe apoovu anhala ucisa ncina Nawe.” Masi ncinani Tiyaku naacaawe? Uyo ahottonkaca moolumo a porofeeta Amos, eeraka co: “Wiira atthu akhwaawe antothe niikuru cotheene Yehova, wamoca naatthu okhapila cotheene, aneehaneliya ncina naka, neera Yehova.” (Mite. 15:14-18) Ayo attharyaayo khayaahala wiitthuca paahi ncina na Yehova, masi ciicammo yaahala wiihaneliya ncina nawe. Iyo maanaaya wiira, ayo yaahala ucuweliya nlattu wo ncina na Yehova ni ciicammo yaahala wiihaneliya nno ncinanno.
Wanthukumanoni wo mphwinko wo mahumu unhoolela wo iseekulu yoopacera, ayo alopwa-na ookhuluvelyaayo anawoonenela wiira makristau yahaana yakhalaka apoovu yaahala ucisa ncina na Yehova (Nwehe iparaagarafu 5)
6-7. a) Kontha isiyani Yesu aawilyaawe watuniyani? b) Isiyani yaahela nhina woopoliya waapinaatamu?
6 Ncina ”Yesu” maanaaya wiira “Yehova moopoli.” Iyo ikhanlee ikhweeli, kontha Yehova honvarela nteko Yesu wiira awoopole ale anhala woonihera waamini. Yesu ahowa watuniyani wiira avaherere ukumyaawe. (Mat. 20:28) Nlattu woovaha ukumyaawe, Yesu hokhitiriha wiira ale anhala woonihera waamini yoopwee ni aphwanye ukumi woohimala.—Joau 3:16.
7 Kontha isiyani apinaatamu waalamuliyaaya woopoliya? Nlattu wo itthu yiirannyeele ujardim yo Eeteni. Khampa noonileehu nhina mwaha uvinre, anamathelana oopacera, Atamu ni Hawa yaahonrukunuwela Yehova. Nlattu wo iyo, ayo yahohaleela iparakha yaarinaaya yookhalana ukumi woohimala. (Upha. 3:6, 24) Masi Yesu aahowa watuniyani wiira apanke itthu yofayita cinene, uhiya paahi woopola apinaatamu. Sotwani ahomoothereriha Yehova upanka citthu coohinamaana. (Upha. 3:4, 5) Vano, woopoliya waapinaatamu waanhela nhina ciicammo upanka itthu yuulupale cinene: ureeriha ncina na Yehova. Yesu aari nrumiya a Yehova ni aapanka itthu Yehova aapheelaawe nimananna omaana. Phimaana, uyo aari ntthu aahala ukhitiri ureeriha ncina na Yehova.
Manannani ntthu waahalaawe wiira khanlee nkristau eekhweeli, masi hicuwelaka awula hivarelaka nteko ncina naathumwaane Yesu?
8. Isiyani atthari ookhuluvelyaa otheene a Yesu inlamuliyaaya ucuwela?
8 Otheene ale yaari ayuuta ni yahaari ayuuta yaapheela ukhala atthari a Yesu yaalamuliya ukupali wiira Yehova, athumwaane Yesu, phikhanle moopolyaaya. (Joau 17:3) Uhiya commo, khampa Yesu, ayo yaahala wiihaneliya ncina na Yehova. Ni ciicammo yaalamuliya ucuwela ifayita irinaaya ureeriha nno ncinanno. Iyo phiitthu yaalamuliyaaya upanka wiira yoopwee. (Mite. 2:21, 22) Vano, atthari ookhuluvelyaa otheene a Yesu yaahaana yancuwelaka Yehova ni Yesu. Niisariya, nivekelo noomalela Yesu naapankilyaawe nimphwanyannya nhina Joau ikapiitulu 17 nimalenlee naala moolumwaala: “Mi kihaacuweliha ncina ninyu ni akinhala uhiyerera waacuweliha, wiira mananna cikifentileenyu naayo mwaafente ni miiva kiwaataanane.”—Joau 17:26.
“NYUUVA NKHANLE MASAAHITYAAKA”
9. Ninhala woonihera cani wiira ncina na Yehova nikhanle nofayita muukumini wihu?
9 Mpaka vaa, unawoonannyaa wiira atthari otheene a Yesu ahaana ureeriha ncina na Yehova. (Mat. 6:9, 10) Ncina na Yehova nihaana nikhalaka itthu yofayita cinene muukumini wihu ni hiiva ninlamuliya woonihera iyo ni citthu cimpankeehu. Vano, isiyani inlamuliyeehu upanka wiira nireerihe ncina na Yehova ni noonihere wiira Sotwani nawootha?
10. Ihukhumuni imphwanyannya nhina Isaiya ikapiitulu 42 mpaka 44? (Isaiya 43:9; 44:7-9) (Nwehe ciicammo ilatarato.)
10 Nhina Isaiya ikapiitulu 42 mpaka 44, niheetthuca mananna ooreeriha ncina na Yehova. Nhina nnyo ikapiitulunnyo, ninawoopeliya mwaha nlikanihero no tiripunnali Yehova nohalaawe utthenkaca wiira aahukhumu atthu. Yehova nawaalepela ale ahinonswalela woona wiira anluku anaaswalelaaya akhanle owootha. Ciicammo nawaalepela masaahiti wiira yoonihere citthu cinoonihera wiira anluku anaaswalelaaya ahaana ifayita. Masi khaavo nkhitiri upanka iyo!—Nsome Isaiya 43:9; 44:7-9.a
Niri khampa utiripunali ni nihaana iparakha yuulupale yookhala Masaahiti a Yehova (Nwehe iparaagarafu 10 ni 11)
11. Isiyani Yehova naahimeeryaawe apoovwaawe nhina Isaiya 43:10-12?
11 Nsome Isaiya 43:10-12.b Awuulumanaka apoovwaawe, Yehova eenre co: “Nyuuva nkhanle masaahityaaka, . . . ni mi kikhanle Nluku.” Vano, uyo ahaalepela wiira yaakhule nna nikohonna: “Tipani khanle Nluku khampa mi?” (Isai. 44:8) Ikhanle iparakha yuulupale hiiva waakhula nna nikohonna. Nlattu wo moolumacerweehu ni citthu cimpankeehu, hiiva ninaavaha usaahiti wiira Yehova khanlee Nluku eekhweeli. Ncina nawe khaninlikananiya. Mananna hiiva ninkhaleehu, ninawoonihera wiira ninaanfenta Yehova ni ninaamwiiwelela, hataa ukhalaka wiira Sotwani nanoopopihaca. Naayo manannaayo, hiiva ninaakhalana iparakha yookavihera ureeriha ncina na Yehova.
12. Manannani inatiri ya Isaiya 40:3, 5 yiiraneelyaaya?
12 Neekurumicaka ureeriha ncina na Yehova, hiiva ninantakiha Yesu Kristu. Inatiri imoca yo Isaiya ineera wiira aanhala uyaryaa ntthu aahala ‘untthenkacera iphiro Yehova.’ (Isai. 40:3) Manannani iyo inatiriiyo yiiraneelyaaya? Joau mpattisa ahontthenkacera iphiro Yesu. Uyo aawile mwancina na Yehova ni uuluma mwancina na Yehova. (Mat. 3:3; Mark. 1:2-4; Luka 3:3-6) Isiyani Isaiya ciicammo yaahimilyaawe? Uyo eenre: “Uttitthima wa Yehova unaahala woonannyaa.” (Isai. 40:5) Manannani yiiraneelyaaya iyo? Ukati Yesu aawilyaawe va watuniyani vaa, uyo aari nrumiya a Yehova oohipahuwa, khampa Yehova phaawile.—Joau 12:45.
13. Manannani ninhaleehu untakiha Yesu?
13 Khampa Yesu, hiiva ciicammo nikhanlee masaahiti anaakiha ncina na Yehova. Hi ninaawuulumana atthu akhwaawe nno ncinanno ni ninawaahimeerya citthu cotheene Yehova cipankilyaawe. Masi, wiira nikhale masaahiti omaana, hiiva khaninlamuliya uhiyerera wuuluma citthu cotheene Yesu cipankilyaawe wiira areerihe ncina na Yehova. (Mite. 1:8) Yesu aari Saahiti a Yehova eekurumica cinene waakiha ncina na Yehova ni hii ninaatthara ntakihero nawe. (Apoka. 1:5) Vano, isiyani inlamuliyeehu upanka para woonihera wiira ncina na Yehova nikhanlee nofayita muukumini wihu?
NINHALA WOONIHERA CANI WIIRA NCINA NA YEHOVA NIKHANLEE NOFAYITA MUUKUMINI WIHU?
14. Nineecoona cani nacuwelaka ncina na Yehova? (Isaalimu 105:3)
14 Hi unaanitteela nrima nlattu wo ncina na Yehova. (Nsome Isaalimu 105:3.c) Yehova naakhala ootteeliya cinene anoonaka wanitteelaka nrima nlattu wo ncina nawe. (Jer. 9:23, 24; 1 Akor. 1:31; 2 Akor. 10:17) Ikhanle iparakha yuulupale uttitthimiha ncina na Yehova ni waakiha nno ncinanno. Hi khaninoonela ihaaya uwuulumana atthu ninaavaraneehu nteko, ninaasomaneehu ucikolani, aattamananiihu ni atthu akhwaawe wiira hi nikhanle Masaahiti a Yehova. Sotwani noopheela wiira hiiva nihiye uwuulumana atthu ncina na Yehova. (Jer. 11:21; Apoka. 12:17) Khweeliini, Sotwani nkhayi nimaporoofetaawe owootha anaapanka yotheene inkhitiryaaya wiira amwarusele citthu cowoothiya ni upheela wiira atthu otheene ahincuwele Yehova. (Jer. 23:26, 27) Masi, nlattu woofenta wihu ncina na Yehova, hiiva khaninhiyerera uttitthimiha nno ncinanno “mahuku otheene.”—Isaa. 5:11; 89:16.
15. Uromola ncina na Yehova maanaaya isiyani?
15 Hi khaninhiyerera uromola ncina na Yehova. (Joweli 2:32; Aroo. 10:13, 14) Uromola ncina na Yehova unaahela nhina citthu cinci, uhiya paahi ucuwela. Hi ninaancuwela Nluku mananna ciryaawe, ninaankhuluvela, ninaanlepela unikavihera ni ciicammo univaha malakihero. (Isaa. 20:7; 99:6; 116:4; 145:18) Ni hiiva ciicammo ninaawuulumana atthu akhwaawe ncina nawe ni makhalelwaawe wiira naakavihere upanka marukunuso muukumini waya para unswalele ni untteelihe nrima.—Isai. 12:4; Mite. 2:21, 38.
16. Ninhala woonihera cani wiira Sotwani nawootha?
16 Hi ninaakupali uhuva nlattu wo ncina na Yehova. (Tiya. 5:10, 11) Naahihiyerereke ukhala ookhuluvelya wa Yehova hataa naananaka masakha, hiiva ninawoonihera wiira Sotwani nawootha. Ukati wa Jó, Sotwani eenre co awaacaka ale anonswalela Yehova: “Pinaatamu naahala uhiya citthu cotheene cirinaawe wiira oopole ukumyaawe.” (Jó 2:4) Sotwani aahimya wiira apinaatamu anhala unswalela Yehova yakhalaka saana, masi yaakhumelelaka masakha, anaahala uhiya unswalela. Jó hoonihera wiira iyo yaari itthu yowoothiya. Ni hiiva ciicammo nihaana iparakha yowoonihera wiira khaninhala unrukunuwela Yehova hataa ukhalaka wiira Sotwani naamananiha unihiiha. Hiiva pooti wankupaliihu wiira Yehova khanhala uninyanyala ni naahala uniwacera ni unikavihera nlattu wo ncina nawe.—Joau 17:11.
17. Khampa cinhimyaaya 1 Peturu 2:12, manannani-tho makhwaawe oottitthimiha ncina na Yehova?
17 Hi ninaahisima ncina na Yehova. (Miru. 30:9; Jer. 7:8-11) Ukhala wiira hi nikhanle arumiya a Yehova ni ninaacuweliya nlattu wo ncina nawe, citthu cimpankeehu pooti wiiriha uttitthimihiya ncina nawe awula uhihisimiya. (Nsome 1 Peturu 2:12.d) Vano, hiiva nimpheela upanka yotheene inkhitiriihu wiira ninttitthimihe Yehova ni citthu cinoolumeehu ni citthu cimpankeehu. Naayo manannaayo, ninaakhitiri uttitthimiha ncina na Yehova, hataa nakhalaka apinaatamu oopahuwa.
18. Manannani-tho makhwaawe ninhaleehu woonihera wiira ncina na Yehova nikhanlee nofayita muukumini wihu? (Nwehe ciicammo niwehero.)
18 Hi nimpheela ureeriha ncina na Yehova hataa ukhalaka wiira atthu akhwaawe anaanuuluma pusya. (Isaa. 138:2) Manannani? Ninawiikurumica upanka yotheene inkhitiriihu wiira nintteelihe nrima Yehova hataa ukhalaka wiira atthu akhwaawe khaanciveliya ni citthu cimpankeehu awula anaanuuluma pusya.e Moone itthu yaamwiirannyenle Yesu. Uyo ahokupali uhuva, ukhwa ni wiihaniya nakhirini wiira attitthimihe ncina na Yehova. Yesu khaahiyerenre wiira ihaaya cinhiihe ureeriha ncina na Yehova ni khaawacera citthu atthu akhwaawe coopuwelaaya. (Mabere. 12:2-4) Itthu yaapheelaawe waari upanka ile itthu Yehova yaanrumilyaawe upanka.—Mat. 26:39.
19. Nnoonela cani ncina na Yehova ni kontha isiyani?
19 Hi unaanitteela nrima cinene nlattu wo ncina na Yehova ni ikhanlee iparakha yuulupale cinene wiihaniya Masaahiti a Yehova. Phimaana, hi ninaakupali uthanyiya ni uhuvihiya naatthu akhwaawe. Ncina na Yehova nikhanlee itthu yofayita cinene muukumini wihu, uvikana moopuwelelo aatthu akhwaawe. Vano, hataa ukhalaka wiira Sotwani naamananiha unihinha, hi niholakela uhihiya uttitthimiha ncina na Yehova. Napankaka commo, ninaahala woonihera wiira ncina na Yehova nikhanlee itthu yofayita muukumini wihu, khampa Yesu coonelaawe.
NCIPO 10 Ninvuwihe Yehova, Muluku Ahu!
a Isaiya 43:9 Atthu otheene ahaana yathukumanaka nipuro nimoca, ni apoovu otheene ahaana yathukumanaka. Tipani nohala uhimya nnyo citthunnyo? Tipani nohala unihimeerya citthu coopacera cinhala wiirannya? Uyo ntthuuyo wakhala wiira haavo, aawaane Masaahiti anhala woonihera wiira noohimya ikhweeli; Ayo yiiwe ni yiire: ‘Khweeli!’” 44:7 Tipani nokilikanana? Wakhala wiira haavo, eehimyace akumihere ncu nawe vate ni oonihere citthu cinthoonyeera wiira nohimya ikhweeli! Ahimye citthu cinhala wiirannya wahoolo, ni cihinhala wiirannya, khampa miiva cimpankasaaka ukhuma nenne nokhalayi kaatthenkacilyaaka apoovwaaka. 8 Nhikhale owoova ni nhisanke. Mi akuuhimyeeraleni otheene cinyu ni akincuwelihale khalayiiru? Nyuuva nkhanle masaahityaaka. Haavo Nluku nkhwaawe kihikhanle miiva? Mena, khuuvo Mwala nkhwaawe. Khuuvo mwala nkiina mi uncuwelaaka wiira uhaavo.’” 9 Otheene ale anaapanka attontto khiivo iryaaya, ni ikaruma caya cintepaaya ufenta khanhala uphwanyera ifayita. Khampa masaahityaaya, attonttwaayo khanooneetthu ni khiivo incuwelaaya. Phimaana, ale yaapankile anaahala woonihaciya ihaaya.
b Isaiya 43:10 “Nyuuva nkhanle masaahityaaka,” neera Yehova, iyee, nantekwaaka nthanlalyaaka, wiira nyuuva nkicuwele ni nkaamini, ni ncuweleehe wiira thimivano. Kihinatthi ukhala khaarivo-tho Nluku ni kakhaleru khanakhumelela-tho nkina. 11 Miiva Yehova, ni kaahikhale mi khaawo moopoli.” 12 “Miiva kiholalyaa, kihoopola ni kiholalyeera nnyo waaryeenyu nhinakhalana Nluku nkhwaawe.” Yehova neera coo: “Nyuuva nnokhala masaahityaaka, ni miiva Kinluku.
c Isaalimu 105:3 Yuulume ncina naa nowaarya yathoonyeraka utteeliya. Waatteele nrima ale anontotha Yehova.
d 1 Peturu 2:12 Nkhalane makhalelo omaana iriyari yaamalapo, wiira yawootherihakani upanka citthu coohinamaana, ayo akhale masaahiti yooneehile citthu comaana cimpankeenyu, ni wiira anttitthimihe Nluku nihuku noohala uhukhumwinya.
e Hataa nswali ookhuluvelyaa Jó ahopacera ukhala niiwasiwaasi ukati asipatthannyaawe araru waamootherihilyaaya upanka itthu yootakhala. Wuupaceroni, yahokhwa asaanaawe otheene ni aahohaleela citthu cotheene caarinaawe. Hataa ukhalaka commo, “Jó khaamootheririhile Yehova upanka nnyo citthu coohilokannyo.” (Jó 1:22; 2:10) Masi ukati Jó woothererihiyaawe upanka citthu coohiloka, uyo ammananiha wiicaakiha, uhiya ureeriha ncina na Yehova.—Job 6:3; 13:4, 5; 32:2; 34:5.