MWAHA WOOSOMIYA 33
NCIPO 4 Yehova “ti Makampusi Aka”
Ntthune nifento na Yehova
“Kihowiihana ninifento nookhuluvelya.”—JER. 31:3.
ITTHU INHALEEHU WIITTHUCA
Ninaahala woona kontha isiyani iryaaya itthu yofayita ukupaleela wiira Yehova naanifenta ni manannani ninhaleehu wuncerera waamini wihu iyo ikhweeliiyo.
1. Kontha isiyani mwiivaherenreenyu wa Yehova? (Nwehe ciicammo ilatarato.)
NYUUVA nnawuupuwela ukati mwiivaherenreenyu wa Yehova? Nyuuva mwaalakenle iyo itthwiiyo kontha nnancuwela sana-saana Yehova ni nnanfenta. Mwahonkhuluveliha Yehova wiira mwanhala uhoolelihera upanka itthu impheelaawe muukumini winyu wotheene ni mwaholakela unfenta ninrimeenyu wotheene, niiroohweenyu yotheene, nimoopuwelelweenyu otheene ni ikuru cinyu cotheene. (Mark 12:30) Ikhumelo vaava, nifento nirineenyu ni Yehova ninaatepa ukhala noolipa. Vano mwaahala waakhula cani, unari wiira ntthu ahookohani co: “Nyuuva khweeliini nnanfenta Yehova?” Woohaanyihacera, nyuuva mwaahala waakhula co: “Mi kinanfenta Yehova uvikana khula itthu awula ntthu!”
Nyuuva nnawuupuwela inanna canfenteenyu Yehova ukati mwiivaherenreenyu wa Yehova ni mwaapattisiyeenyu? (Nwehe iparaagarafu 1)
2-3. a)Isiyani Yehova impheelaawe wiira nikupali? (Jeremiya 31:3) b) Isiyani inhaleehu woona nhina ula mwahoola?
2 Masi manannani caahaleenyu waakhula nnakohiye co: “Nnaakupaleela wiira khweeliini Yehova nawuufentani?.” Niireke mwanhala upica waakhula, moonihaka toko wiira khunoophwanelani ufentiya ni Yehova? Anuunu amoca yaahuva ukati waaryaaya mwanhima aneera: “Mi kinaacuwela wiira kinanfenta Yehova. Mi kinaakupaleeha ninrimaaka wotheene iyo itthwiiyo. Masi ikwaha cinci, kinawiikohaka wakhala wiira Yehova naakifenta.” Munhala ucuwela cani inanna Yehova nooweheraaweni?
3 Yehova nopheela wiira nkupaleele ninrimeenyu wotheene wiira nawuufentani. (Nsome Jeremiya 31:3.a) Khweeliini, Yehova phiwiirihileni nyuuva upheela unswalela. Ni ukati wiivaherenreenyu ni mpattisiyeenyu, nyuuva nhaakhela itthuvo yomaana: nifento nookhuluvelya na Yehova. Iyo maanaaya wiira nawuufentani ninrimaawe wotheene ni khanhala wuunyanyalani. Yehova nawaafenta aswalyaawe wuuhelani nhina nyuuva. (Mal. 3:17) Yehova nopheela wiira mwiicoone khampa apostolu Paulu ciicoonaawe. Uyo ankupaleela wiira Yehova ananfenta, mpaka ahantikha co: “Kontha, miiva kinaakupali wiira hataa ukhwa, hataa ukumi, hataa malayikha, hataa ikuvernu, hataa citthu cirivo, hataa citthu cinhala uwa, hataa ikuru, hataa irekamelo, hataa wiisa, hataa itthu ikhwaawe yowumpiya inhala unimwalaniha ni nifento nihu ni Nluku, niri ni Kristu Yesu, Apwiiyeehu.” (Aroo. 8:38, 39) Nhina ula mwahoola, ninaahala woona kontha isiyani ninlamuliyeehu wuncerera waamini wihu wiira Yehova naanifenta ni isiyani inhala unikavihera uhihiyerera ukupali.
KONTHA ISIYANI IRYAAYA ITTHU YOFAYITA UKUPALEELA WIIRA YEHOVA NAANIFENTA
4. Ninhala waanana cani itapha cuulupale ca Sotwani?
4 Nakupaleelaka wiira Yehova naanifenta ninaakhitiri waanana itapha ya Sotwani. (Efesu 6:11) Sotwani naahala upanka yotheene inhalaawe ukhitiri wiira anihiihe unswalela Yehova. Itthu imoca invarelaawe nteko ukhanle unikupaliha wiira Yehova khannifenta. Nhiliyale wiira Sotwani nowehaweha nipuro nilolovacileehu. Uyo nonikelakela nakhalaka veekha. Atthunaka ukati unkhaleehu ooriipiya nrima nlattu wo citthu ciniirannyenle khalayi, itafaawuti ninaananeehu nna va awula waanyihacera citthu cinhala wiirannyaa uhoolo. (Miru. 24:10) Sotwani ri khampa kharamu novara inama ukati inkhalaaya yowiitthaala. Ukati unkhaleehu ooriipiya nrima, Sotwani thimpheelaawe wiira nihiye unswalela Yehova. Masi naahihiyeke ulipihaca ukupali wihu wiira Yehova naanifenta ninaahala ukhitiri umwaanana Sotwani.—1 Pet. 5:8, 9; Tiya. 4:7.
5. Kontha isiyani nimpheeleehu wiicoona ufentiya ni uvahiya ifayita ni Yehova?
5 Nakupaleelaka wiira Yehova naanifenta, ninaakhitiri umwaattamela. Kontha isiyani nineereehu commo? Yehova numpile ninrima woofenta ni woopheela ufentiya. Nafentiyaka nintthu, itthu impheeleehu ukhanle unfenta ciicammo uyo ntthuuyo. Vano, neecoonaka ufentiya ni Yehova ninaahala upheela unfenta ciicammo. (1 Joau 4:19) Ni natepaka unfenta, uyo ciicammo naahala unifenta. Ibiibiliya ineera: “Mumphiyeere Nluku ni uyova naahala wuuphiyeerani.”(Tiya. 4:8) Ninhala ulipihaca cani waamini wihu wiira Yehova naanifenta?
ISIYANI INHALA UNIKAVIHERA UTTHUNA NIFENTO NA YEHOVA?
6. Wiira nikupali ufentiya ni Yehova, isiyani ninlamuliyeehu ulompa?
6 Muulume impheeleenyu ukati nnolompeenyu ni nhihiyerere. (Luka 18:1; Aroo. 12:12) Munlompe Yehova wiira ookavihereni wiiwehera khampa uyo nooweheraaweni. Mpanke iyo itthwiiyo ikwaha cinci khula nihuku. Khweeliini, unaarika ukupaliha nrimeehu wiira Yehova naanifenta. Masi nhiliyale wiira Yehova khanle muulupale uvikana nrimeenyu. (1 Joau 3:19, 20) Uyo nawuucuwelani ratta-raatta uvikana mananna cineecuweleenyu. Ciicammo uyo nawoona citthu comaana cimpankeenyu nyuuva cihinkhitiriinyu woona. (1 Sam. 16:7; 2 Ikor. 6:30) Vano, nhihiyerere unlompa Yehova munhimeryaka citthu co wanrimani winyu ni munlepelaka wuukaviherani ukupali wiira nawuufentani. (Isaa. 62:8) Nalompaka, nihaana upanka citthu cofayita. Nttwee noone nnyo citthunnyo.
7-8. Manannani Isaalimu inoniheraaya wiira Yehova naanifenta?
7 Nkhuluvele itthu Yehova inhimyaawe. Yehova ahowiiriha anamantikha Ibiibiliya wantikha mananna uyo ciryaawe. Moone moolumo Davidi antikhilyaawe anoonihera wiira Yehova naanifenta ni naaniwacera. Uyo enre co: “Yehova ri wakhiviru ni ale arina nrima wooriipiya, uyo naawoopola ale ari ni masukhuli.”(Isaa. 56:8) Yehova naawoona uriipiya winyu nrima. Uyo naakhala niiwasiwaasi ni nawoona uweryaa khampa nyuuva nnooneenyu. Khampa vaavale ntthu neetta muuthakoni novahaawe ifayita cinene maaci, Yehova ciicammo naavaha ifayita miithoriinyu. Isaalimu 139:3, ineera: “ Weeva Yehova unaacuwela sana-saana iphiro caka cotheene.” Yehova nawoona citthu cotheene cimpankeenyu, masi uyo nowehesesa citthu comaana cinkhitiriinyu upanka. (Mabere. 6:10) Kontha isiyani? Kontha uyo naavaha ifayita citthu cotheene comaana nnopankeenyu.b
8 Nlattu wo nnya iveerusu co mbiibiliyani nnya, unkhala toko wiira Yehova noniirela: “Mi kimpheela nkupali wiira kinawuufentani ni kinawuuwacerani.” Khampa nonneehu, Sotwani nopheela unikupaliha wiira Yehova khannifenta. Vano mwakhalaka wiira nnawaanyihacera nifento na Yehova, muupuwele co: ‘Tipani kinonkupalyaaka “athumwaane wootha” awula “Nluku eekhweeli”?’—Joau 8:44; Isaa. 31:5.
9. Isiyani Yehova inaakhuluvelihaawe ale otheene anonfenta? (Nkwaha 20:5, 6)
9 Muupuwele mananna Yehova nuulivyaaniheraaweni ninifento. Muupuwele itthu Yehova yaamwiirenlyaawe Moceesi ni Asarayeli. (Nsome Nkwaha 20:5, 6.c) Yehova naakhuluveliha wiira khanhala uhiyerera woonihera nifento nookhuluvelya ale anonfenta. Ala moolumwaala anaanikhuluveliha wiira khunkhitirya Yehova uhinfenta ule nonfenta. (Nem. 1:5) Vano wakhala wiira nnawaanyihacera wakhala nifento na Yehova mwiikohe co: ‘Kiireke kinanfenta Yehova?’ wakhala wiira nnaanfenta Yehova ni nnawiikurumica weettela ikano cawe, uyo nawuukhuluvelihani wiira naahala wuufentani cinene. (Dan. 9:4; 1 Akor. 8:3) Nimoolumacero makhwaawe wakhala wiira nnaanfenta Yehova, pooti unkhuluveleenyu wiira nawuufentani. Nifento ni ukhuluvelyaa wa Yehova unaavikana waanyihacera wihu.
10-11. Manannani Yehova nopheelaawe wiira nwehere woopoliya? (Akalasiya 2:20)
10 Muupuwele woopoliya. Wiivaherera wa Yesu Kristu ikhanle itthuvo yuulupale Yehova aavahilyaawe apinaatamu. (Joau 3:16) Masi niireke wiira iyo itthuvweeyo inawuuhelani nhina nyuuva? Woohaanyihacera, iyee! Wootakihera mmuupuwele apostolu Paulu. Uyo ahopanka citthu cinci coohinamaana. Ni hataa ukhalaka wiira ahokhala nkristau uyo aalamuliya waanana makhalelwaawe oohinamaana. (Aroo. 7:24, 25; 1 Tim. 1:12-14) Masi uyo anoonela woopoliya khampa itthuvo Yehova invahiyaawe. (Nsome Akalasiya 2:20.d) Nhiliyale wiira Yehova thimwiirihile apostolu Paulu wantikha ala moolumwaala ni moolumo otheene o mbiibiliyani ari para unikavihera. (Aroo. 15:4) Vano, moolumo a apostolu Paulu anawoonihera mananna Yehova nopheelaawe wiira nyuuva nwehere woopoliya. Uyo nopheela wiira nwehere khampa itthuvo yuuthenkacenryaaweni nyuuva. Mwaweheraka iyo inanneeyo woopoliya, nnaalipihaca ukupaleela winyu wiira Yehova nawuufentani.
11 Hiiva ninansukhurweela Yehova nlattu wonvaherera mwanawe Yesu wiira anoopole. Masi itthu ikhwaawe imwiirihile Yesu uwa watuninyani waari para uwiitthuciha atthu ikhweeli ca Nluku. (Joau 18:37) Iyo ikhweeliiyo inaahela nhina nifento Yehova nirinaawe naasaanaawe.
MANANNANI YESU NONIKAVIHERAWE UTTHUNA NIFENTO NA YEHOVA?
12. Kontha isiyani ninlamuliyeehu ukhuluvela itthu Yesu ulumilyaawe amwaacaka Yehova?
12 Ukati waaryaawe watuninyani, Yesu waanoncivela venci waahimeerya atthu mananna Yehova ciryaawe. (Luka 10:22) Hiiva nihaana isariya yookhuluvela itthu Yesu yaahimilyaawe amwaacaka Yehova. Khweeliini, Yesu hokhala nkhayi ni Yehova wiirimu hinaaya uwa watuniyani. (Akol. 1:15) Yesu mwaneene aneecoona ufentiya ni Yehova. Ni uyo hoona mananna Yehova naafentaawe asaanaawe anonkhuluvela. Masi mananna Yesu nonikaviheraawe ukupali wiira Yehova naanifenta?
13. Manannani Yesu nopheelaawe wiira ninwehere Yehova?
13 Yesu naanikavihera unwehera Yehova khampa uyo cinonweheraawe. Nhina nvageeliyuni, Yesu homwiihana Yehova “Paapa” ikwaha coopwahaka 160. Ukati wuulumaawe naattharyaawe, Yesu ahomwiihana Yehova “Apaapa”ni “Apaapeenyu.” (Mat. 5:16; 6:26) Inoota ya Matewus 5:16 ineera: “Aswali a Yehova okhalayi, yanvarela nteko moolumo menci khampa, ‘Nakuru-Cotheene, Nkhulupale ni Mumpi wiira amuulumane uyova.’ Masi Yesu aavarela nteko cinene nuulumo Paapa, kontha khanaarikarika ni nancuwelaciya. Naayo manannaayo, uyo hoonihera wiira Nluku nopheela wiira aswalyaawe ampatthanane.” Unawoonannya wiira, Yesu nopheela wiira atthu anwehere Yehova khampa cinonweheraawe: khampa nyari oonamaana naafenta asaanaawe. Nttwee noone matakihero meeli anoonihera kontha isiyani Yesu varenlyaawe nteko nuulumo “Paapa” amwaacaka Yehova.
14. Manannani Yesu oonihenryaawe wiira khula ntthu haana ifayita uhoolo wa Yehova? (Matewus 10:29-31) (Nwehe ciicammo ilatarato.)
14 Noopacera, moone itthu Yesu ulumilyaawe nhina Matewus 10:29-31. (Nsome) Iphera cikhanle inuni cooyevaca cihinhala unfenta awula unswalela Yehova. Masi unookhalaru commo, Apaapeehu anaavaha ifayita ni anaacuwela khula iphera immorelaaya vathi. Vano muupuwele mananna Yehova cinnivahaawe ifayita ni cinonwaceraawe khula ntthu nonswalela nlattu wonfenta! Wiira wawe “hataa ikharari cotheene co mmuru winyu cihaalikeliya,” inoota yo iveerusu 30 ineera: “Nlattu Yehova wowaacuwela cinene attharyaawe Yesu, unawoonihera wiira Yehova nawaawacera.” Khweeliini, Yesu nopheela wiira nikupali wiira nihaana ifayita uhoolo wa Apaapeehu owiirimu.
Yehova naavaha ifayita iphera ni naacuwela ukati unkwatelaaya vatti. Vano muupuwele inanna cinoovahaaweni ifayita nyuuva nnonfenta ni nnonswalela! (Nwehe iparaagrafu14)
15. Isiyani moolumo a Yesu anniitthucihaaya-tho nhina Apaapeehu owiirimu?
15 Moone ntakihero nonayeeli Yesu aavarenlyaawe nteko nuulumo “Paapa” nhina Joau 6:44.e (Nsome) Nlattu wo nifento ni unamaana, Yehova mwaneene, huuthanlani nyuuva. Kontha isiyani oothanlilyaaweni? Kontha Apaapeenyu owiirimu ahoona wiira nyuuva nhaana nrima womaana ni makhalelo omaana. (Mite. 13:48) Inoota iri nhina Joau 6:44 ineera wiira, atthunaka Yesu aaca moolumo a Jeremiya ari muru wo ula mwahoola. Aneera: ‘Mi kihoothanla weeva ninifento nookhuluvelya.’ (Jer. 31:3; nwehe ciicammo Oseiya. 11:4.) Muupuwele iyo itthwiiyo maanaaya. Ikhanle itthu yootteeliha nrima ucuwela wiira Apaapeenyu owiirimu anawoona makhalelweenyu omaana, hataa nyuuva nhikhitiriki woona.
16. a) Isiyani Yesu inniitthucihaawe nhina Yehova ni kontha isiyani ninlamuliyeehu ukupaleela? b) Munhala ulipihaca cani ukupali winyu wiira Yehova khanle nyari omaana? (Nwehe ciicammo ikwaaturu “Nyari nimpheeleehu ukhalana otheene.”)
16 Wuuluma wawe amwaacaka Yehova wiira khanle Apaapeehu, waakhala khampa Yesu neera co: “Yehova khaanakhala Apaapaaka paahi; nyuuva ciicammo akhanle Apaapeenyu. Ni mi kinawuukhuluvelihani wiira ayo anawuufentani ni anawuuwacerani.” Vano, wakhala wiira ikwaha cikhwaawe nnawaanyihacera nifento na Yehova, mweemele ni mwiikohe co: ‘Khawaahala ureera ukhuluvela moolumo a Yesu, ukhala wiira uyo nancuwela Yehova ratta-raatta ni nawuuluma ikhweeli?’—1 Pet. 2:22.
NHIHIYERERE ULIPIHACA UKUPALI WINYU WIIRA YEHOVA NAWUUFENTANI
17. Kontha isiyani ninlamuliyeehu uhihiyerera ulipihaca ukupali wihu wiira Yehova naanifenta?
17 Hiiva ninlamuliya upanka yotheene inkhitiriihu para ukupali wiira Yehova naanifenta. Khampa noonileehu nhina ula mwahoola, Sotwani khanle nwanani nopheela uniloloviha ni unihiiha unswalela Yehova. Uyo khanhala uhiyerera umananiha upheela unikupaliha wiira Nluku khannifenta. Hi khanimpheela uvarihiya ni nno ntaphanno!—Jó 27:5.
18. Munhala ulipihaca cani nifento ninyu ni Yehova?
18 Wiira nlipihace ukhuluvela winyu nifento na Yehova, nhihiyerere ulompa wiira ookavihereni wiiwehera khampa uyo nooweheraaweni. Muupuwele iveerusu co mbiibiliyani cinoonihera nifento na Yehova ni mananna cinaawaceraawe ale anonfenta. Nhiliyale wiira ntthu anfentaka Yehova, uyo ciicammo nanfenta. Ciicammo nhiliyale wiira woopoliya ikhanle itthuvo ya Yehova oovahilyaaweni. Ni nkhuluvele moolumo a Yesu aneera Yehova ciicammo khanle Apaapeenyu owiirimu. Vano wakhalaka wiira ntthu nawuukohani: “Weeva unaakupali wiira Yehova nawuufenta?” Nyuuva nnaahala umwaakhula woohuupuwelaca ikwaha cinci wiira: “Iyee uyo naakifenta! ni kinawiikurumica mahuku otheene wiira koonihere wiira kinanfenta!”
NCIPO 154 Nifento khanimmala
a Jeremiya 31:3 Naryeene uttayi, Yehova ahokiphwanya ni ahokiirela co: “Mi kinawuufenta ninifento noohimala. Phimaana kihowiihana ninifento nookhuluvelya wiira waatanace nimiiva.”
b Wiira moone iveerusu coolipiha cinoonihera nifento na Yehova nwehe mwaha uneera “Dúvidas; sentimentos negativos” nhina ilivuru Princípios Bíblicos para a Vida Cristã.
c Nkwaha 20:5 Uhikhoromele uhoolo waya, ni uhitheperiye uswalela, kontha miiva Yehova, Nlukwaa, kikhanle Nluku mmoca mpheela uswaleliya veekhaawe, kaawaanelaka nttaruso, nlattu woottheka asithumwanaya, asaana, ucuulu woneeraru ni woneecese waale ahinkipheela, 6 masi noonihera nifento nookhuluvelya mpaka ucuulu unhala uyaryaa wa apoovu ankifenta ni aniiwelela malamulwaaka.
d Akalasiya 2:20 Nna co kihookhomeliya wanipottoni wamoca ni Kristu. Nnena, ri nuukumi akinakhala miiva, masi Kristu phiri nuukumi wamoca ni miiva. Khweeliini, nnaco kiryaaka nkumi niirutthu yeepinaatamu kinkhala kimwaaminiki mwaana a Nluku, ule kifentile ni khwile wiira akoopole.