MWAHA WOOSOMIYA 41
NCIPO 108 Ophenta wa Muluku Khonimala
Nifento na Nluku khanimmala
“ Munsukhuru Yehova kontha uyo namaana; nifento nawe nookhuluvelya khanimmala.”—ISAA. 136:1.
ITTHU INHALEEHU WIITTHUCA
Nhina ula mwahoola, ninaahala woona mananna nifento na Yehova ninhalaaya unilipiha navirihaka itafaawuti.
1-2. Itafaawutini aswali a Yehova anaananaaya?
MUUPUWELE ikalawa imphwanyiya niiphyo yuulupale iriyari ipahari ni yeettihiyaka ni mawimpi irwaaniyaka khula mphantte. Nlattu woohikhalana itthu yookhikicera, toko nankura, iyo ikalaweeyo inaarwaaniya khula mphantte untthunaaya mawimpyaayo. Nankura, anaakhikicera ikalaweeyo wiira ihirwaaniye khula mphantte.
2 Navirihaka itafaawuti, ninkhala khampa ile ikalaweele. Moopuwelelweehu ankhala khampa avonyeriyee mphantte nkhwaawe. Nyuuva nnaakupali wiira Yehova nawuufentani ni nawuuwacerani. Masi nihuku nikhwaawe, nlattu wooviriha itafaawuti, atthunaka nyuuva nnoopuwela wiira Yehova khanoona itthu inwiirani. (Isaa. 10:1; 13:1) Vano, atthunaka mpatthaniinyu naawuulumelani itthu yowuumalihani ni nnaapacera wiicoona ukhala saana. (Miru. 17:17; 25:11) Masi nanlelo nyuuva nnaapacera waanyihacera wakhala wiira Yehova nawuuwacerani. Ni mpanka nyuuva wuupuwela wiira Yehova hoonyanyalani. Vano, isiyani inlamuliya ukhala nikhikicero nihu awula nankureehu ni inhala unilipiha navirihaka itafaawuti? Nimoolumacero makhwaawe, manannani ninhaleehu uhihiyerera ukhuluvela wiira Yehova naanifenta ni naaniwacera?
3. Nifento nookhuluvelyaa maanaaya isiyani? (Isaalimu 31:7 ni 136:1) b) Kontha isiyani nineereehu wiira Yehova khanle ntakihero nuulupale no nifento nookhuluvelya? (Nwehe ciicammo ilatarato.)
3 Itthu inlamuliya ukhala nikhikicero nihu awula nankureehu ukati unviriheehu itafaawuti, nikhanle nifento nookhuluvelya na Yehova. (Nsome Isaalimu 31:7; 136:1.a) Nuulumo nifento nookhuluvelyaa, pooti waaciya nifento nimmwiiriha ntthu unvaresesa nkhunanawe. Yehova khanle ntakihero no nno nifento nookhuluvelyanno. Mpanka Ibiibiliya ihoohimya co imwaacaka Yehova “oomwinciva nifento nookhuluvelyaa.” (Nkw. 34:6, 7) Ibiibiliya inaahimya ciicammo yamwaacaka Yehova co: “Nikhanle nifento nuulupale ni nookhuluvelya nnowoonihereenyu atthu otheene anooswalelani.” (Isaa. 86:5) Muupuwele itthu intaphulelaaya nifento nookhuluvelya na Yehova maanaaya: Yehova khanaahiya aswalyaawe ookhuluvelyaa! Wuupuwela wiira Yehova khanle ookhuluvelyaa, iyo pooti ukhala khampa nikhikicero ninhala unilipiha ukati unviriheehu itafaawuti.—Isaa. 23:4.
Khampa nankura nokhiceraawe ikalawa ukati wo phyoo yuulupale, ukhuluvela wihu nifento na Yehova unaanikhicera ukati ninviriheehu itafaawuti. (Nwehe iparaagarafu 3)
MUUPUWELE WIIRA NIFENTO NOOKHULUVELYA NA YEHOVA NIKHANLE IKHWEELI YOOPACERA IRI MBIIBILIYANI
4. Nvahe matakihero okhweeli coopacera co Mbiibiliyani, ni ntaphulele kontha isiyani nihinhiiyeehu ukupali?
4 Inanna imoca yoolipihaca ukhuluvela winyu nifento nookhuluvelya na Yehova ukhanle wuupuwela wiira nno nifentonno ikhanle ikhweeli yoopacera iri mbiibiliyani. Nuulumo “ikhweeli yoopacera iri mbiibiliyani” maanaaya isiyani? Atthunaka nyuuva nnoopuwela ikhweeli coopacera ciitthucileenyu Nnuulumoni na Nluku. Wootakihera, nyuuva nheetthuca wiira ncina na Nluku nikhanle Yehova, wiira Yesu khanle mwaana oopacera wumpiya ni Nluku, wiira atthu akhwile khancuwela hataa itthu ni wiira watuniyani inaahala ukhala ipephooni nipuro apinaatamu anhalaaya ukhala mpaka woohikhwa. (Isaa. 83:18; Ekles. 9:5; Joau 3:16; Apoka. 21:3, 4) Wiiwa winyu nnya ikhweelinnya, atthunaka nyuuva wahoorikani ukupali. Kontha isiyani? Kontha nyuuva nhoonelela wiira nnyo cikhanle ikhweeli. Wuupuwela wiira nifento na Yehova ikhanle ikhweeli yoopacera iri mbiibiliyani, unaanikavihera unyema wuupuwela wiira Yehova khannoona navirihaka itafaawuti awula khanniwacera. Nttwee noone manannani unhalaaya unikavihera.
5. Ntaphulele mananna citthu cowoothiya cineetthucihiya cinkhitiryaaya ukwanyulaciya.
5 Isiyani nyuuva yuukavihenreni unyema citthu ciitthucihiya nhinapacera usoma Ibiibiliya? Khweeliini, itthu yuukavihenreni waari ulattaniha itthu yiitthucihiyeenyu ukereeca winyu ni itthu mwiitthucileenyu mbiibiliyani. Muupuwele co, nyuuva mwankupali wiira Yesu aari Nluku Okuru-Cotheene. Vano upacera winyu usoma Ibiibiliya, nyuuva mwaaneekoha co: ‘Kiireke iyo ikhanle ikhweeli?’ Vano wiitthuca winyu ni muupuwelaka itthu Ibiibiliya inhimyaaya, nyuuva nhoonelela wiira khinakhala ikhweeli. Yesu khanle “ntthu oopacera wumpiya cihinaaya wumpiya citthu cotheene” ni “Mwaana oopacera wumpiya ni Nluku.” (Akol. 1:15; Joau 3:18) Khweeliini, citthu cineetthucihiya cowoothiya, pooti ukhala khampa itthu inrika ukwanyula. (2 Akor. 10:4, 5) Vano wiitthuca winyu ikhweeli, khanturuwenle-tho ukupali citthu cowoothiya ceetthucileenyu khalayi.—Afili. 3:13.
6. Kontha isiyani nnolamuliyeenyu ukupali wiira nifento nookhuluvelyaa na Yehova ninaakhala mpaka?
6 Nyuuva pooti upanka itthu yoolikanaca niitthu Ibiibiliya inhimyaaya yaacaka nifento na Yehova. Mwaananaka marikariko ni mwapaceraka wuupuwela wiira Yehova khanoofentani, mwiikohe co: ‘Kiireke itthu inoopuwelaaka ikhanle ikhweeli?’ Nlattanihe moopuwelelweenyu nimoolumo amphwanyannya nhina Isaalimu 136:1 iveerusu yo ula mwahoola. Kontha isiyani Yehova neeraawe wiira nifento nawe nikhanle nookhuluvelya? Kontha isiyani nuulumo nifento nawe nookhuluvelya khanimmala nimphwanyannyaaya ikwaha 26 nhina ila Isaalimwiila? Khampa noonileehu, nifento nookhuluvelya Yehova ninwooniheraawe apoovwaawe nikhanle ikhweeli yoopacera iri mbiibiliyani, khampa ikhweeli cikhwaawe coopacera co mbiibiliyani cahoorikenleni ukupali. Wuupuwela wiira Yehova khanoofentani ni khanwoonani ukhala ntthu ofayita, akhanle moopuwelelo oohinamaana. Nnyeme wuupuwela commo, khampa caahaleenyu ukhotta ukupali citthu cowoothiya cineetthucihiya!
7. Nvahe matakihero nsomaka iveerusu co mbiibiliyani cinkhuluveliha wiira Yehova naanifenta
7 Ibiibiliya inaanihimeerya mananna menci wiira Yehova naanifenta. Moone itthu Yesu aahimilyaawe aacaka attharyaawe, uyo enre co: “Nyuuva nhaana ifayita cinene uvikana iphera cinci.” (Mat. 10:31) Ciicammo Yehova mwaneene enre co awaacaka apoovwaawe: “Kinaahala wuulipiha, iyee, kinaahala wuukavihera. Kinaahala wuuvarelela cinene nintata naka nonlopwana ni nosariya.” (Isai. 41:10) Muupuwele itthu innikupaliha nhina ala moolumwaala. Yesu khenre: ‘Atthunaka nyuuva nhaana ifayita cinene uvikana iphera cinci.’ Ni Yehova khenre co: ‘Atthunaka mi kinaahala wuukaviherani.’ Uhiya commo, Yehova ni Yesu yenre: “Nyuuva nhaana ifayita cinene” ni “Kinaahala wuukaviherani.” Mwaananaka marikariko ni muupuwelaka wiira Yehova khanuufentani, nnya iveerusunnya cinaahala wuukaviherani kahi paahi wiicoona ufentiya ni Yehova, masi ucuwela ni waamini khweeliini wiira Yehova nawuufentani. Nnya cikhanle ikhweeli. Mwalompaka ni muupuwelelaka nnya iveerusunnya, nyuuva pooti wuuluma itthu imocaaru ni moolumo amphwanyannya nhina 1 Joau 4:16: “Hiiva ninaacuwela nifento Nluku ninnooniheraawe ni ninaakupali nno nifentonno.”b
8. Isiyani nyuuva nnolamuliyeenyu upanka wakhalaka wiira nanlelo nnoopuwela wiira Yehova khanoofentani?
8 Vano wakhalaka wiira nyuuva nanlelo nnawuupuwela wiira Yehova khanoofentani? Nlattanihe mananna nyuuva nneecooneenyu ni itthu nnocuweleenyu. Khaninlamuliya ukhuluvela moopuwelelweehu, masi ninlamuliya ukhuluvela ikhweeli co mbiibiliyani. Ni itthu Ibiibiliya iniitthucihaaya nhina nifento na Yehova, ikhanle ikhweeli. Muupuwelaka wiira Yehova khanuufentani, nyuuva khannokupali ikhalelo imooca yofayita irineewe: nifento nawe.—1 Jo. 4:8.
MUUPUWELELE MANANNA YEHOVA NOOFENTAAWENI
9-10. Isiyani intaphulelaaya moolumo a Yesu ari nhina Joau 16:26, 27 aneera: “Apaapa anawuufentani?” (Nwehe ciicammo ilatarato.)
9 Pooti waniitthuceehu-tho nifento na Yehova nuupuwelaka itthu Yesu yaahimenryaawe attharyaawe eeraka: “Apaapa anawuufentani.” (Nsome Joau 16:26, 27.) Yesu khoolumile iyo wiira aatteelihe nrima attharyaawe. Nasomaka murwaaya ala moolumwaala, ninawoona wiira Yesu aaca ulompa.
10 Yesu ahaahimerya attharyaawe wiira yahaana ulompa yaromolaka ncina na Yesu, uhiya unlompela uyova. (Joau 16:23, 24) Yaari itthu yofayita ayo ucuwela iyo itthwiiyo. Yesu wunwelelihiya wawe, pooti ukhalaka wiira attharyaawe yanpheela unlompela uyova, kontha yaari asipatthannyaawe. Ayo pooti ukhalaka wiira, wuupuwela wiira maana Yesu aanaafenta cinene, atthunaka uyo anhala uviriyana mavekelwaaka ni waalepela athumwaane wiira yaakavihere. Masi Yesu aawiirenle wiira khayaalamuliya wuupuwela commo. Kontha isiyani? Yesu enre co: “Apaapa anawuufentani.” Iyo itthwiiyo inwiitthucihani isiyani? Nyuuva nheetthuca myaha cimmuuluma Yesu ni nhokhala mpatthannyaawe. (Joau 14:21) Khampa ale attharyaale, nyuuva ciicammo pooti wanonlompeenyu Yehova Mwakhuluvelaka wiira nawuufentani. Ikwaha cotheene nnolompeenyu, nnawoonihera wiira nnaakhuluvela ala moolumwaala.—1 Jo. 5:14.
Nyuuva pooti unlompa Yehova nkhuluvelaka, “nhiliyalaka wiira uyo nawuufentani” (Nwehe iparaagarafu 9-10)d
NCUWELELE MAPURO ANKHUMELELAAYA AYO MOOPUWELELWAAYO
11. Kontha isiyani Sotwani nohalaawe ukhala ootteeliya wakhalaka wiira ninaapacera wuupuwela wiira Yehova khannifenta?
11 Mapuroni ankhumelelaaya moopuwelelo anwiirihani waanyihacera wakhala wiira Yehova nawuuufentani? Atthunaka nyuuva nnoopuwela wiira ankhumelela wa Sotwani, ni iyo ikhanle ikhweeli. Tiyapu noopheela “unikhuura” ni uyo unantteela nrima anoonaka noopuwelaka wiira Yehova khannifenta. (1 Pet. 5:8) Masi nlattu wo nno nifentonno phimwiirihile Yehova unvaherera mwanawe wiira anilevelele itampi cihu. Ni Sotwani nopheela wiira hiiva nuupuwele wiira khanirina ifayita. (Mabere. 2:9) Vano, tipani nohala ukhitiri utthema nuupuwelaka wiira Yehova khannifenta? Sotwani. Ni tipani nohala utteeliya nrima nahiyaka unswalela Yehova nlattu woovololaca? Ciicammo Sotwani. Masi Sotwani phihinfentiya ni Yehova. Nhina itapha cotheene cinvarelaawe nteko, uyo naamananiha uniiriha wuupuwela wiira Yehova khannifenta ni khannoona ukhala atthu ofayita uhoolo wawe. (Efesu 6:11) Nacuwelaka itthu mwaninaniihu immanaanihaawe unipanka, hiiva ninaakhitiri unkhottela Tiyapu.—Tiya. 4:7.
12-13. Kontha isiyani upahuwa unniirihaaya waanyihacera nifento na Yehova?
12 Masi moopuwelelo anniriiha wuupuwela wiira Yehova khannifenta, pooti ukhumelela ni mananna makhwaawe. Manannani? Nlattu woopahuwa uyaryanneehu. (Isaa. 51:5; Aroo. 5:12) Itampi ihoniiriha ukhala uttayi ni Mpattusiihu. Iyo ciicammo inaahela nhina moopuwelelweehu, irutthwiihu ni nrimeehu.
13 Itampi inaaniiriha ukhalana moopuwelelo oohinamaana. Hi ninawiicoona uhikhala saana, ukhala niiwasiwaasi, uhikhala ookhikicerya ni unoonihiihaca ihaaya. Iyo pooti uniirannyeela navaraka itampi. Ni ciicammo pooti uniirannyeela nlattu wo wuupuwela wiira nikhanle atthu oopahuwa, itthu Nluku yahaapheelaawe unumpa wawe. (Aroo. 8:20, 21) Khampa ikaaro yonyaala nroota nimoca ihineettaaya saana, hiiva ciicammo khaninkhitiri ukhala saana khampa cumpiyeehu nlattu woopahuwa wihu. Phimaana, ikwaha cikhwaawe ninaananeehu moopuwelelo anniriiha wuupuwela wiira Yehova khannifenta. Wakhalaka wiira iyo itthwiiyo inaawiirannyeelani, ninlamuliya wuupuwela wiira Yehova khanle ‘Nluku muulupale ni owoopiha, wiira . . . nowoonihera nifento nookhuluvelya ale anonfenta ni aneettela malamulwaawe.’— Nem. 1:5.
14. Kontha isiyani wuupuwela wiivaherera wa Yesu unhalaaya unikavihera ukupali wiira Yehova naanifenta? (Arooma 5:8) (Nwehe ikwaaturu ineera “Mwiikhikicere wiira nhithepiye ‘niikuru cowootha co tampi”.)
14 Ikwaha cikhwaawe, hiiva pooti wiicoonaka wiira khunniphwanela ufentiya ni Yehova. Uhimya ikhweeli, hiiva khunniphwanela ni nlattu wo nno nifentonno, phinniiriha ukhala atthu ofayita. Hi khaninkhalana nifento na Yehova nlattu wooniphwanela. Phimaana, nlattu wo nifento, Yehova honvaherera mwanawe wiira nileveleliye itampi cihu. (1 Jo. 4:10) Muupuwele ciicammo wiira Yesu khaawile para woopola atthu oohipahuwa, masi woopola atthu o matampi. (Nsome Arooma 5:8.) Nlattu woopahuwa wihu, hiiva khaninkhitiri wuupanka citthu nimananna oohipahuwa ni Yehova naacuwela wiira hiiva khaninhala ukhitiri upanka iyo itthwiiyo. Nacuwelaka wiira upahuwa wihu unaaniiriha waanyihacera wakhala wiira Yehova naanifenta, ninaapanka yotheene inkhiriihu wiira iyo itthwiiyo ihiniirannyeele.— Aroo. 7:24, 25.
NHIHIYERERE UKHALA OOKHULUVELYA
15-16. Naahihiyeke ukhala okhuluvelya wa Yehova, isiyani ninlamuliyeehu ukupali, ni nlattuni? (2 Samuweli 22:26)
15 Yehova nopheela wiira nilakele uthanla itthu yomaana: ‘toko uhihiyerera unvaresesa.’ (Deut. 30:19, 20) Napankaka commo, pooti wankupaliihu wiira uyo khanhala uhiyerera unithoonyera nifento nawe nookhuluvelyaa. (Nsome 2 Samuweli 22:26.c) Naahihiyeke unvaresesa Yehova, pooti wankupaliihu wiira uyo khanhala uhiya unikavihera waanaana masakha annikhumelela muukumini wihu.
16 Toko niitthucileehu, hiiva pooti ukhitiri waanana masakha annikhumelela muukumini wihu. Hiiva ninaacuwela wiira Yehova naanifenta ni naahala unikavihera. Iyo phiitthu ineetthucihaaya Ibiibiliya. Nuupuwelaka wiira Yehova khannifenta, pooti wanuupuweleehu ile incuweleehu, wiira Yehova naanifenta, uhiya ukhuluvela mananna cineecooneehu. Nihihiyerere waamini wiira citthu cineetthuceehu mbiibiliyani cinooluma nifento na Yehova nihimmala, cikhanle cokhweeli.
NCIPO 159 Munttitthimihe Yehova
a Isaalimu 31:7 Unaahala ukitteela nrima cinene nlattu wo nifento naa nookhuluvelya, kontha weeva unawoona masukhulyaaka; Unaacuwela cinkiriipaaya nrima. 136:1 Munsukhuru Yehova, kontha uyo namaana; Nifento nawe nookhuluvelya khaninhala umala.
b Matakihero makhwaawe Deuteronomiyu 31:8, Isaa 94:14, ni Isaiya 49:15.
c 2 Samuweli 22:26 Ntthu noovaresesani, nyuuva Pwiiya ciicammo nnanvaresesa; Ntthu neettela isariya ni ookhomaala, nyuuva nnanwacera niisariya
d ILATARATO: Amunna amoca alompaka alepelaka ukaviheriya wiira yaawacere amwaaraya anwerennya, wiira acuwele mananna oovarela nteko nsurukhu ni uwiitthuciha asaanaawe unfenta Yehova.