MWAHA WOOSOMIYA 42
NCIPO 44 Nivekelo na Mutthu Oxankale
Manannani ninhaleehu unlompa Yehova ni nrimeehu wotheene?
“ Kinaalompa ni nrimaaka wotheene. Oo Yehova ukaakhule.” — ISAA. 119:145.
ITTHU INHALEEHU WIITTHUCA
Nhina ula mwahoola, ninaahala woona mananna mavekelo yantikhiye mbiibiliyani anhalaaya unikavihera unlompa Yehova ni nrimeehu wotheene.
1-2. a) Kontha isiyani ikwaha cikhwaawe unrikaaya unlompa Yehova? b) Nincuwela cani wiira Yehova naaviriyana mavekelweehu?
WAKHALA wiira nyuuva unawuurikani unlompa Yehova awula nnooluma itthu imocaaru khula ukati unlompeenyu, nyuuva khanri veekha. Nlattu wootthawatthawa khula mahuku, atthunaka ninaapheelaka ulompa naakuvyaacaka. Awula ninoopuwela wiira iparakha irineehu yoolompa khinniphwanela ni, nlattu wo iyo itthwiiyo, hiiva khaninkhitiri unhimerya Yehova citthu cinniira ni moopuwelelo o wanrimani wihu.
2 Ibiibiliya inaanikhuluveliha wiira itthu yofayita impheelaawe Yehova ukati wonlompa ukhanle ulompa ni nrimeehu wotheene, uhiya ni moolumweehu. Uyo naaviriyana “mavekelo aatthu ammwiiwelela.” (Isaa. 10:17) Yehova naaviriyana khula itthu inoolumeehu kontha nikhanle atthu oopahuwa uhoolo wawe. — Isaa. 139:1-3.
3. Isiyani inhaleehu woona nhina ula mwahoola?
3 Nhina ula mwahoola, ninaahala woona waakhuliya waya ala makohwaala: Kontha isiyani ninlamuliyeehu unlompa Yehova woohoova hataa itthu? Manannani ninhaleehu unlompa Yehova ninrimeehu wotheene? Manannani mavekelo yantikhiye mbiibiliyani anhalaaya unikavihera upanka commo? Isiyani inlamuliyeehu upanka nariipiyaka nrima mpaka uhinkhitiriihu unhimerya Yehova mananna nineecooneehu? Ninaahala woona waakhuliya waya ala makohwaala.
MUNLOMPE YEHOVA WOOHOOVA ITTHU
4. Isiyani inhala unikavihera unlompa Yehova nihoovaka itthu? (Isaalimu 119:145)
4 Yehova khanle mpatthani ookhuluvelya ni nopheela unoona nakhalaka saana. Ucuwela wihu iyo, hiiva ninaapheela unhimerya mananna ninoopuweleehu ni nineecooneehu. Nasaalimu 119 antotha uncuwela sana-saana Yehova. Uyo khaanakhala ntthu oohipahuwa. Atthu ootakhala nrima yammootheryaca citthu coohinamaana. (Isaa. 119:23, 69, 78) Uhiya commo, uyo nasaalimuuyo, waanonripaka nrima ikwaha cikhwaawe nlattu wo itampi caavaraawe. (Isaa. 119:5) Hataa ukhalaka commo, uyo khoova unlompa Yehova.— Nsome Isaalimu 119:145.a
5. a) Kontha isiyani nihinlamuliyeehu uhiyerera wiira moopuwelelo oohiloka anihiihe ulompa? b) Nhimye ntakihero ninoonihera wiira khaninlamuliya uwoonela ihaaya ulompa.
5 Khaninlamuliya uhiyerera wiira moopuwelelweehu oohinamaana anihiihe unlompa Yehova. Khweeliini, Yehova naanikurumica wiira ninlompe, hataa ciicammo ale anvara itampi anlamuliya unlompa Yehova. (Isai. 55:6, 7) Muupuwele ila itthwiila, ntthu neettiha ntteeke naacuwela wiira pooti wammuulumanaawe ule nowehaweha khula ukati umpheelaawe ukaviheriya. Atthunaka uyo nawoona ihaaya wakhalaka wiira naapanka itthu yoohinamaana. Nyuuva nnoonela cani, niireke uyo anhala uhiya umuulumana ule nowehawehoole? Mena vakaani! Inanna imocaaru, wakhalaka wiira ninaavara itampi awula ninaapanka itthu yoohinamaana, khaninlamuliya woova unhimerya Yehova awula unlompa. — Isaa. 119:25, 176.
ISIYANI INHALA UNIKAVIHERA UNLOMPA YEHOVA?
6-7. Isiyani inhala unikavihera ulompa ninrimeehu wotheene? Nhimye ntakihero. (Nwehe ciicammo niwehero.)
6 Nanlompa Yehova nanhimeeryaka moopuwelelweehu ni citthu cinniira wanrimani wihu, hiiva ninaatepa umpatthanana uyova. Citthuni cinhala unikavihera upanka iyo itthwiiyo?
7 Muupuwele makhalelo a Yehova.b Naahihiyerereke wuupuwela makhalelo a Yehova, hiiva khuntepa unirikela unhimeerya citthu cotheene cinoopuweleehu ni cinniira. (Isaa. 145:8, 9, 18) Moone itthu yawiirannyenle anuunu Kristine yaarina athumwanaya okhirini. Ayo aneera: “Miiva khawaakhirikela unwehera Yehova khampa Apaapa ni unlompa. Mi koopuwela wiira nlattu woopahuwa waka, uyo anhala ukinyanyala ni khaahala ukiiwelela-tho. Ikhaleloni ya Yehova yaakavihenre anuunu Kristine? Ayo aneera: “Nifento nookhuluvelya na Yehova ninaakikupaliha wiira Yehova naakifenta. Mi kinaacuwela wiira uyo khanhala ukihiya veekhaka. Hataa kamoraka, uyo naahala ukiwacera ni nifento ni ukikavihera wunwa. Ucuwela iyo itthwiiyo, uhokikavihera ukhitiri umuulumana kanhimeeryaka utteeliya unkhalanaaka ni ciicammo masukhuli ankhalanaaka.”
8-9. Khampa cinthoonyeraaya ntakihero naanuunu Aliska, kontha isiyani unreeraaya wuupuwela toko itthu yo wuuluma nihinaaya ulompa?
8 Muupuwele itthu inhaleenyu uhimya. Nhinaaya ulompa, nyuuva pooti waneekoheenyu ala makohwaala: ‘Masakhani anaananaaka nna co? Kiireke kihaana unlevelela ntthu? Kinaaviriha itafaawuti ni kinaapheela ukaviheriya ni Yehova wiira kivilele?’ (2 Mam. 19:15-19) Ciicammo pooti wanontakiheehu Yesu namlompaka Yehova navarelaka nteko ncina nawe, Umwene ni itthu impheelaawe Yehova. — Mat. 6:9, 10.
9 Anuunu aneehaniya Aliska yahonanela wiira awannyaya yahaana iretta yo cancer muukookoni. Wuupaceroni, ayo waanaarika cinene unlompa Yehova. Ayo aneera: “Miiva kankhalaka niiwasiwaasi ni wankirika wuupuwela itthu yoorwaa ihimya.” Isiyani yaakavihenre anuunu Aliska? Ayo anaahimya yeera: “Kihinaaya ulompa, miiva kinaakumiha ukati vakaani wiira kithotokanihe saana itthu inhalaaka uhiya ni upanka commo, unaakikavihera uhihimya itthu imocaaru ni iretta inaawerya awannyaka. Ciicammo unaakikavihera uhikhala niiwasiwaasi ni oomalelyaa ukati woolompa.”
10. Kontha isiyani unreeraaya ulompa wohaakuvihaca? (Nwehe ciicammo ilatarato.)
10 Nhilompe mwakuvyaacaka. Mavekelo ookhuvyaaca pooti ukhala ookhuma wanrimani. Nalompaka woohaakuvyaaca, ninaahala ukhitiri wuuluma citthu cotheene cinniira ni cinoopuweleehu.c Elijah, awannyaya anuunu Aliska, aneera: “Miiva kinaamananihaka ulompa ikwaha cinci nihuku nimoca, kakumihaka ukati wiira kipanke mavekelo moolupale, kinawoona wiira upatthannyaaka ni Yehova unaatepa ukhala woolipa. Yehova khanoocya ukiviriyana nlattu woolompa cinene, vano miiva kihocuwela wiira pooti wanoolumaaka nimananna cimpheelaaka.” Mmananihe upanka co: Mwaavye ukati ni nipuro ninlamuliyeenyu ulompa woohinyakuleliya, atthunaka nkumiheraka ncunno vate ni mmananihe ulompa woohaakuvyaaca.
Ntothe nipuro ni ukati wiira nlompe woohaakuvyaaca (Nwehe iparaagarafu 10)
MUUPUWELACERE MAVEKELO ARI MBIIBILIYANI
11. Kontha isiyani unreeraaya wuupuwela mavekelo yantikhiye mbiibiliyani? (Nwehe ciicammo ikwaaturu “Nyuuva nnawiicoona khampa ayo?”)
11 Itthu inhala unikavihera ukhanle wuupuwelacera mavekelo ari mbiibiliyani ni icipo cowaarya awula isaalimu cimphwanyeehu mbiibiliyani. Woopela mwaha mananna aswali a Nluku okhalayi yoolumaaya ni mananna coopuwelaaya, unaahala wuukurumicani nyuuva ciicammo unlompa Yehova. Woona moolumo yaavarelaaya nteko wiira anttitthimihe Yehova, pooti wuukaviherani uphwanya moolumo makhwaawe ophiyaaru wiira nvarele nteko ukati woolompa. Ni nyuuva atthunaka pooti uphwanya mavekelo answali a Yehova virihile masankiho oolikanaca naayo anviriheenyu.
12. Makohoni anlamuliyeehu wuupuwela ukati unuupuweleleehu mavekelo yantikhiye mbiibiliyani?
12 Mwasomaka nivekelo mbiibiliyani, muupuwele co: ‘Tipani aalompa ni isiyani yaamwiira muukumini wawe? Kiireke inaahala ukikavihera itthu ihimilyaawe? Isiyani ineetthucaaka ninna nivekelonna?’ Atthunaka nyuuva pooti utotha waakhuliya waya ala makohwaala. Nttwee noone matakihero makhwaawe.
13. Isiyani ineetthuceehu ni nivekelo na Ana? (1 Samuweli 1:10, 11) (Nwehe ciicammo ilatarato.)
13 Nsome 1 Samuweli 1:10, 11.d Ana ulompa wawe, uyo anaanana itafaawuti piili cuulupaleru. Yoopacera, uyova khaayara ni yonayeeli, akhattyaawe, yanonwacera pusya. (1 Sam. 1:4-7) Ana aholompa Yehova woohaakuvyaaca. Ulompa wawe, uyo ahopacera wiicoona ukhala saana. (1 Sam. 1:12, 18) Mwaananaka itafaawuti, manannani nnohaleenyu utakiha ulompa wa Ana? Nanhimeeryaka Yehova citthu cinniira, ciicammo ninawiicoona ukhala saana. — Isaa. 55:22.
Ana aari nthiyana ahaayara ni akhattyaawe yanonwacera pusya. Vano, uyo ahonlompa Yehova ninrimaawe wotheene. (Nwehe iparaagarafu 13.)
14. a) Isiyani-tho ineetthuceehu ni ntakihero na Ana? b) Isiyani inoonihera wiira wuupuwelela ihantisi co mbiibiliyani, pooti unikavihera ulompa saana? (Nwehe niwehero.)
14 Ana ahonyara mwaana eehaniya Samuweli. Uvira waya myaakha nanyanre, ahoncisa Samuweli ni ahonrwaana wanankuttho muulupale eehaniya Eliwu. (1 Sam. 1:24-28) Alompaka ninrimaawe wotheene, uyo ahonsukhuru Yehova nlattu wo waakhikicera aswalyaawe ookhuluvelya ni waawacera.e (1 Sam. 2:1, 8, 9) Masakha yaavirihaawe Ana khanyaamanle, uyo khaaweheeha citthu caavirihaawe, masi aaweheeha paahi iparakha Yehova canvahilyaawe. Isiyani ineetthuceehu? Hiiva ninhala ukhitiri uvilele naananaka itafaawuti naweheehaka paahi itthu Yehova ipankilyaawe ni impankaawe wiira anikavihere.
15. Isiyani ineetthuceehu ni nivekelo na porofeeta Jeremiya? (Jeremiya 12:1)
15 Nsome Jeremiya 12:1.f Ikwaha imoca, porofeeta Jeremiya wahonriipa nrima ukati woonaawe atthu yaapanka citthu cootakhala yakhalaka toko yankhala saana muukumini waya ni yantteeliya. Uyo ciicammo wahonriipa nrima nlattu woowaceriya pusya naasinyenyaawe. (Jer. 20:7, 8) Masi Jeremiya ahonhimerya Yehova citthu cotheene cootakhala camwiirannyeela. Nuuwakatyaaya, Jeremiya ahoona mananna Yehova aattarusilyaawe asarayeli oohunya maaru. Iyo yahoncerera ukhuluvela wawe unasariya wa Nluku. (Jer. 32:19) Ni hiiva ciicammo nawoonaka atthu anwinnyera akhunanaya yakhalaka saana awula nawaceriyaka pusya, pooti wiicoona khampa porofeeta Jeremiya ciconnyaawe. Masi khampa Jeremiya, ninlamuliya unlompa Yehova ninhimerya citthu cotheene cinniira, nakhuluvelaka wiira, nuuwakatyaaya, Yehova naahala umalamaliha uwaceraniya woohisariya unooneehu mahukhwaala.
16. Isiyani ineetthuceehu ni nivekelo na nlevita mmoca aakhottihiya unswalela Yehova ntempulu? (Isaalimu 42:1-4) (Nwehe ciicammo ilatarato.)
16 Nsome Isaalimu 42:1-4.g Ila isaalimwiila, yantikhiye ni nlevita mmoca aakhottihiya unswalela Yehova ntempulu naasarayeli akhwaawe. Moolumwaayo anawoonihera mananna uyo ceecoonaawe. Natthukeliyaka nlattu wo waamini wihu awula nawerennyaka iretta ihinnikhitiriha ukhuma wapuwani, hiiva pooti wiicoona khampa uyo nlevitooyo. Masi itthu yooreera upanka ukhanle unlompa Yehova nanhimeeryaka mananna anecooneehu. Iyo pooti unikavihera ucuwela sana-saana moopuwelelweehu ni urukunuwa citthunnyo. Wootakihera, uyo nlevitooyo ahonanela wiira ahaana-tho mananna makhwaawe onswalela Yehova. (Isaa. 42:5) Uyo ciicammo aahokumiha ukati wiira oopuwele mananna Yehova canwaceraawe. (Isaa. 42:8) Ulompa Yehova ninrimeehu wotheene, pooti unikavihera ucuwelela saana moopuwelelweehu, ukhala saana ni ukhalana ikuru wiira nivilele.
Nlevita antikhile Isaalimu 42 ahonlompa Yehova ninrimaawe wotheene. Nanlompaka Yehova nanhimeeryaka citthu cinniira, pooti citthunnyo urukunuwa. (Nwehe iparaagarafu 16.)
17. a) Isiyani inlamuliyeehu wiitthuca ni nivekelo apankilyaawe porofeeta Jonas? (Jonas 2:1, 2) b) Manannani moolumo amphwanyannya nhina Isaalimu anhalaaya unikavihera naananaka itafaawuti? (Nwehe niwehero.)
17 Nsome Jonas 2:1, 2.h Porofeeta Jonas ahonlompa Yehova nari mmirimani wo hopa yuulupale. Uyo khaamwiiwelenle Yehova. Masi hataa ukhalaka commo, uyo ankupali wiira Nluku anhala uviriyana ulompa wawe. Nhina nno nivekelonno, naavarela nteko moolumo menci nimphwanyeehu Nsaalimuni.i Iyo maanaaya wiira uyo aalamuliya ucuwela saana ayo moolumwaayo. Wuupuwela ayo moolumwaayo, yahomwiiriha ukhuluvela wiira Yehova anhala unkavihera. Inanna imocaaru, ikhanle itthu yomaana, ulipelela nrima iveerusu cikhwaawe co mbiibiliyani. Naayo manannaayo, nalompaka nhina citthu coorika cinnikhumelela, pooti wanoopuweleehu nnyo iveerusunnyo ni unimaaliha.
NHIHIYERERE ULOMPA WIIRA MUMPATTHANANE YEHOVA
18-19. Nikhuluvelihoni nirineehu nimphwanyannya nhina Arooma 8:26, 27? Nhimye ntakihero.
18 Nsome Arooma 8:26, 27. Ikwaha cikhwaawe, hiiva ninaakhalaka niiwasiwaasi ni mpaka uhikhitiri unhimerya Yehova itthu inniira. Masi hataa ukhala commo, Yehova khanhiya unikavihera. Nalompaka, nnepa wowaarya wa Nluku unaakhala wamoca nihiiva. Manannani? Yehova ahovarela nnepaawe wowaarya wiira aakavihere anamantikha Ibiibiliya wantikha mavekelo menci. Naahikhitiriki wuuluma sana-saana mananna cineecooneehu ukati unlompeehu, Yehova pooti uwehera miphantte cikhwaawe co Nnuulumoni wawe cantikhiye mavekelo khampa citthu cinonlepeleehu. Ni uyo pooti waakhula ayo mavekelwaayo khampa pihii nilompile.
19 Ucuwela iyo itthwiiyo, uhaakavihera anuunu amoca o Russia aneehaniya Yelena. Ayo yahotthukiya nlattu woolompa ni woosoma Ibiibiliya. Anuunu Yelena, yahoriipiya nrima ni yoopuwela wiira khayaahala ukhitiri ulompa. Ayo anaahimya yeeraka: “Mi kihoopuwela wiira, kakhalaka nimasukhuli ni kihicuwelaka itthu yowuuluma, Yehova pooti uviriyana mavekelwaaka . . . aswalyaawe okhalayi khampa aawaka. Iyo ihokilipiha cinene ula ukati woorikoola.”
20. Nakhalaka niiwasiwaasi, ninhala utthenkaca cani moopuwelelweehu wiira nilompe?
20 Nakhalaka niiwasiwaasi ni napheelaka ulompa, pooti uhinkhitiriihu wuuluma saana. Wiira niitthenkace ni nuulume saana ukati woolompa, ninlamuliya wiiwelela audiyu o Isaalimu cikhwaawe. Ciicammo pooti ummananiheehu wantikha citthu cotheene cimpheeleehu uhimya khampa Davidi. (Isaa. 18, 34, 142 muru) Khweeliini, khaavo mananna o wiitthenkaca wiira nilompe saana. (Isaa. 141:2) Vano, mmananihe woonenela isiyani ikhanle yomaana para nyuuva.
21. Kontha isiyani ninlamuliyeehu unlompa Yehova ninrimeehu wotheene?
21 Ikhanle itthu yoolipiha ucuwela wiira Yehova naacuwela mananna anecooneehu hataa nihinaaya unhimerya itthu. (Isaa. 139:4) Hataa ukhalaka commo, uyo naaviriyana ulompa wihu nooniheraka wiira ninankhuluvela. Vano, nhoove waalompa Apaapa o wiirimu. Nvarele nteko mavekelo yantikhiye mbiibiliyani ni nlompe ninrimeenyu wotheene. Munhimeerye utteeliya winyu ni masukhuliinyu. Yehova khanle mpatthani omaana; uyo khanhala wuuhiyani!
NCIPO 45 Muupuwelo wa Murima Aka
a Isaalimu 119:145 Kinaalompa ninrimaaka wootheene. Nkaakhule, oo Yehova. Kinaahala utthara malamulweenyu.
b Nwehe “Algumas das qualidades mais notáveis de Jeová”, cihimiye nlivuruni Vida Cristã–Textos Bíbilicos Útes, mphantte unwa “Jeová”.
c Ikwaha cinci, mavekelo ampankiya wanlokoni ankhala owaakuvyaaca.
d 1 Samuweli 1:10 Ana wahonriipa nrima cinene, ni ahancera unlepela Yehova onlakoono. 11 Vano uyo aholakela eeraka: “Oo Yehova anakhotto, wakuupuwelaka ni waahikiliyaleke nkivahaka mwaana mwanlopwana, miiva kinaahala unvahenra wa Yehova wiira anvarele nteko muukumini wawe motheene ni ikharari cawe khacinhala umettiya.”
e Ukati waalompaawe, Ana ahovarela nteko moolumo oolikanaca naayo antikhilyaawe Moceesi. Vano, uyo ahokumiha ukati wiira uupuwele Cowantikhiya Cowaarya. (Deut. 4:35; 8:18; 32:4, 39; 1 Sam. 2:2, 6, 7) Uvira waya myaakha cinci, Maria anumwaane Yesu, yahovarela nteko moolumo onttitthimiho anlikanaca ni nuulumo amphwanyannya nhina nivekelo aapankilyaawe Ana.— Luka 1:46-55.
f Jeremiya 12:1 Weeva ukhanle nasariya oo Yehova, kuuhimeryaka citthu cinkiira, kawuulumanaka citthu co isariya. Masi kontha isiyani atthu ootakhala ankhalaaya saana muukumini waya? Ni kontha isiyani atthu oohikhuluvelya ankhalaaya woohiwasiwaasi?
g Isaalimu 42:1 Khampa Nacoro nokhalaawe niiwasiwaasi nlattu woohona maaci, ni miiva kinaakhala niiwasiwaasi ni nyuuva, oo Nluku. 2 Kinaapheela umoonanna Nluku, Nluku nkumi. Kinhala urwaa umoonanana Yaakhani. 3 Kinlya miithori uthana ni uhiyu. Mahuku otheene atthu anaakitarawaca akikohaka: “Nlukwooyo rivayi?” 4 Mi kinawuupuwela nnya citthunnya ni kinaalompa ninrimaaka wootheene, kontha mi keetta nkhayi naatthu. Keetta vakaani-vakaani mpaka unupani ya Nluku, iriyari yaatthu otteeliya ni osukhuru ni iriyari yaatthu yaapanka isukuhuulu yowuupuwelela.
h Jonas 2:1 Vano, Jonas nari mmirimani wohopa, ahonlompa Yehova Nlukwaawe, 2 eeraka: “Mmasakhani waka, kihonkhuwela Yehova ni uyo hokaakhula. Mmahiyeni kihokhuwela kilepelaka ukaviheriya. Ni weeva uheewa ncu naka.
i Nivekelo naapankilyaawe porofeeta Jonas 2:3-9, moone mananna Jonas varenlyaawe nteko nuulumo amphwanyannya nhina Isaalimu cikhwaawe: Isaa. 69:1; 16:10; 30:3; 142:2, 3; 143:4, 5; 18:6; e 3:8.