MWAHA WOOSOMIYA 43
NCIPO 41 Xontte Mwiiwe Ovekela Waka
Nhihiyerere waalompela akhwiinyu
“ Nlompelane . . . Ulompa wa ntthu neettela isariya unaaphwanyiha ikuru.”—TIYA. 5:16.
ITTHU INHALEEHU WIITTHUCA
Wiitthuca waalompela akhwiihu ni woona miruku comananna ninlamuliyeehu upanka.
1. Nincuwela cani wiira ulompa wihu Yehova naavaha ifayita?
Ulompa ikhanle itthuvo yomaana cinene. Mweemele ni muupuwele: Yehova hovahacera malayikha mirintti cikhwaaawe. (Isaa. 91:11) Uyo ciicammo honvahacera mirintti cuulupale mwanawe. (Mat. 28:18) Masi niireke wiira Uyo honvahacera ntthu wiira eewelele ulompa waatthu? Mena. Yehova khanle “Namwiiwelela ulompa.” (Isaa. 65:2) Uyo naakumiha ukati wiira aviriyane ulompa wihu!
2. Kontha isiyani Paulu khanlyaawe ntakihero nomaana nhina waalompela akhunanihu?
2 Hiiva pooti ukumiha ukati wiira ninhimeerye Yehova citthu cotheene cinnihela isukuli. Masi, nihaana waalompela akhwiihu ciicammo. Paulu khanle ntakihero nomaana nhina waalompela akhwiihu. Uyo ahantikhela nloko no Efesu: “Akinhiyerera wuulompelani.” (Efesu 1:16) Paulu ciicammo aanonhimya ntthu anlompelaawe. Wootakihera, Uyo ahomwiirela Timotiyu: “Kinansukhuru Nluku . . . akinhiya uwuupuwela ukati unlompaaka, uhiyu ni uthana.” (2 Tim. 1:3) Mananna Paulu caakhaawe muukunini wawe yaari oorika; aanaanana masakha menci, ni uyo anlompa wiira akhitiri waanana. (2 Akor. 11:23; 12:7, 8) Uhookhalaru commo, uyo ankumiha ukati wiira anlompele akhunanawe.
3. Isiyani yaahala unirikarikihela waalompela akhunanihu?
3 Ikhwaha ikhwaawe pooti wanliyaleehu waalompela akhunanihu. Kontha isiyani? Anuunu amoca aneehaniya Sabrinaa ahohimyaca itthu imoca inniirannyeela. Ayo yinree: “Nihaana citthu cinci coovara ula ulumwenkuula. Pooti wanweheeheehu paahi citthu cinnirannyeela, mpaka wiilompela mwaaneeneehu paahi ni niiwasiwaasi cihu.” Nyuuva inaawiirannyeelakani iyo itthwiiyo? Wakhala wiira inaawiirannyeelakani, ula mwahoola unaahala wuukaviherani (1) wiitthuca nlattuni ikhanlyaaya itthu yofayita waalompela akhwiihu ni (2) wiitthuca miruku cinhala unikavihera woona manannani ninlamuliyeehu upanka iyo itthwiiyo.
NLATTUNI NINLAMULIYEEHU WAALOMPELA AKHWIIHU?
4-5. Manannani waalompela akhunanihu “umpwanyihaaya ikuru?” (Tiyaku 5:16)
4 Waalompela akhwiihu “uhaana ikhuru yuulupale.” (Nsome Tiyaku 5:16.) Niireke ulompa wihu pooti umwiirannyeehela itthu ntthu nkhwaawe? Iyee. Yesu ancuwela iyo itthwiiyo. Ukhala wiira Yesu ancuwela wiira apoostolu Peturu anhala unkhotta, uyo ahomwiirela co: “Kinaalompaka kilepelaka isontte, wiira waamini waa uhilolovace.” (Luka 22:32) Paulu ciicammo ancuwela wiira ulompa uhaana ikuru. Ukati waatthukeliyaawe u Rooma, uyo ahomwantikhela Filemoni: “Nlattu woolompa winyu, kinaakupali wiira kinaahala utthukuliya wiira kituruwele ukhala nkhayi ninyuuva.” Ni iyo phiitthu yeerannyeele. Uvira waya ukati vakaani, Paulu ahotthukuliya ni ahoturuwela ulalyeera.
5 Masi iyo khintaphulela wiira ulompa wihu unankhanyereriha Yehova upanka itthu ihimpheelaawe. Yehova naaviriyana ulompa waaswalyaawe ni, ikwaha ikhwaawe, naalakela upanka itthu inlepelaaya. Ucuwela iyo itthwiiyo, pooti unikavihera uhihiyerera napheelaka wiira anikavihere ni unkhuluvela, nihiyaka citthu cotheene mmatatani wawe.—Isaa. 37:5; 2 Akor. 1:11.
6. Manannani waalompela akhunanihu unhalaaya unikavihera waawehera saana? (1 Peturu 3:8)
6 Waalompela akhunanihu unaaniiriha ukhala atthu “oowoonela uthunku akhunanihu.” (Nsome 1 Peturu 3:8.) Ntthu nowoonela uthunku akunanawe, nawoona uhuva waakhunanawe ni naapheela upanka itthu wiira aakavihere. (Mark. 1:40, 41) Waalompela akhwiihu uhaana ifayita cinene. Wootakihera, humu mmoca neehaniya Michael neera: “Khaalompelaka akhunanaka wiira akhitiri impheelaaya, miiva kinaakhitiri woona saana itthu inaananaaya ni iyo itthwiiyo inaakikavihera utepa waafenta, hataa ukhalaka wiira khancuwela.” Humu nkhwaawe neehaniya Richard, neera: “Nanlompelaka ntthu, ninaapheela upanka itthu wiira ninkavihere. Ni nankaviheraka, hiiva ninaapanka mphantte nhina waakhuliya nwo ulompanwo.”
7. Manannani waalompela akhunanihu unnikaviheraaya uhiweheeha masakheehu paahi? (Afilipo 2:3, 4) (Nwehe ciicammo ilatarato.)
7 Waalompela akhwiihu unaanikavihera uwehera saana citthu cinaananeehu. (Nsome Afilipo 2:3, 4.) Hiiva ninkhala ituniya inhooleliya ni Sotwani, phimaana otheene cihu ninawaanana marikariko. (1 Jo. 5:19; Apoka. 12:12) Waalompela akwiihu woohihiyerera unaanuupuseera wiira “[mayamunneehu] ntuniyani motheene anawaanana marikariko mamocaaru.” (1 Pet. 5:9) Piyoneera mmoca neehaniya Katherine, neera: “Waalompela akhunanaka unaakuupusera wiira akinakhala veekha kinaanana marikariko. Iyo inaakikavihera uhitepa wuupuwela marikariko anaananaaka.”
Waalompela akhunanihu unaanikavihera uwehera saana marikariko anaananeehu. (Moone iparaagarafu 7)d
AYO ANAAPHEELA ULOMPA WIHU
8. Nvahe matakihero aatthu oohala waalompela.
8 Tipani ninlamuliyeehu unlompela? Pooti wanaalompeleehu atthu enci. Wootakihera, ale anaanana iretta, amirawo anlupatthiya ucikolani nlattu wonswalela Yehova awula owuuluvala. Mayamunneehu enci anaalupatthiya naamucyaaya awula niikovernu. (Mat. 10:18, 36; Mite. 12:5) Mapuro makhwaawe naakhumelelaka nanrokottole awula ikhotto nlattu waanasiyaasa. Ayo mapurwaayo, mayamunneehu anaatthawa ni anaahiya inupa caya. Akhwaawe cinawaakhumelela ihasara nlattu waasikoloni. Hiiva pooti uhipaca uwoona ayo mayamunnaayo wiira naacuwele. Masi, naalompelaka, ninawoonihera wiira ninawiiwelela nlamulo na Yesu ‘noofentana.’—Joau 13:34.
9. Nlattuni ninlamuliyeehu waalompela ale anhoolela mumphwinkoni wa Yehova wamoca nasaaraya?
9 Ciicammo pooti wanaalompeleehu ale anhoolela mphwinko wa Yehova, toko mayamunna ampanka mphantte wo Mahumu Unhoolela, anamakaviheraaya, anhoolela u Peteli, mamootoli osirikwiitu, mahumu ni anamakavihera owanlokoni. Ayo mayamunnaayo anaavara nteko mwinci wiira aniwacere ni, uhiya commo, ayo ahaana yaananaka iwasiwaasi caya. (2 Akor. 12:15) Wootakihera, mootoli osirikwiitu mmoca neehaniya Mark naahimya: “Itthu intepa ukirikela ukhanle waahiya asipaapaaka uttayi. Ayo ahooluvala ni aanawerennya. Mi kinaacuwela wiira anuunu ni naakunyaatu anawaawacera saana. Masi unaakiwerya nrima nlattu woohaakavihera venci asipaapaaka.” Ikwaha cinci hi khanincuwela citthu cinaanaaya ayo mayamunnaayo. Masi ikhanle itthu yomaana waalompela. (1 Atesal. 5:12, 13) Ciicammo pooti wanaalompeleehu asimwaaraya ayo mayamunnaayo, ukhala wiira anawaakavihera wiira ahihiyerere uvara ntekwaaya.
10-11. Ntaphulele nlattuni waalompela mayamunna ni mayanuunu otheene ikhanlyaaya itthu yooncivela Yehova.
10 Toko noonileehu, iyo ikhanle itthu nimpakeseehu waalompela mayamunna ni mayanuunu. Wootakihera, hataa nihimuupuwelaka ntthu, ikwaha cikhwaawe ninanlepela Yehova wiira aakavihere mayamunna atthukeliye nlattu wo waamini waya awula atthu akhweliye. Humu mmoca neehaniya Donald, heera: “Nihaana mayamunna enci anhuva-huva, mpaka ikwaha cikhwaawe ninaalompa naalepelelaka wiira akaviheriye atthu otheene ntuniyani.”
11 Niireke ayo mavekelwaayo anancivela Yehova? Iyee! Kontha hiiva khanincuwela itthu mayamunna ampheelaaya, phimaana khinakhala itthu yootakhala waalompela mayamunna otheene, niromola wo khula ikhurupu yo mayamunna. (Joau 17:20; Efesu 6:18) Ayo mananna oolompaayo anawoonihera wiira ‘ninawaafenta mayamunna ntuniyani motheene.’—1 Pet. 2:17.
MUNLOMPELE NTTHU NNOMUUPUWELEENYU
12. Manannani uweheeha unhalaaya unikavihera ucuwela citthu coohala uromola ukati woohala ulompa?
12 Nweheehe wiira ncuwele wo khula ntthu itthu impheelaawe. Uhiya paahi waalompela mayamunna otheene, ciicammo nhaana unlompela ntthu nnomuupuweleenyu. Haavo ntthu wanlokoni winyu rina iretta yoohivoniya? Haavo mmirawo lolovacile, atthunaka nlattu wootarawaciya ucikolani awula ulupatthiya? Ahaavo amunna awula anuunu awunnuwiha aasaanaaya veekha, “yaalakaka ni yawiitthucihaka ikano ca Yehova?” (Efesu 6:4) Mwakhalaka ntthu ooweheeha, nyuuva nnaahala ukhitiri uwoonela uthunku akhunaninyu, ni iyo inaahala wuukaviherani uwuupuwela wiira mwaalompele.b—Aroo. 12:15.
13. Ninhala waalompela cani ale ahinaacuweleehu?
13 Munlompele munna, nromolaka ncina nawe. Pooti wanaalompeleehu hataa ukhalaka wiira khaninatoko uwoona. Wootakihera, mayamunna o Cingapura, o Crimeia, o Eritreia ni o Rússia akhwaawe ahotthukeliya nkhattya. Nsayitini jw.org, ninaaphwanya macinaaya ayo mayamunnaayo.c Mootoli osirikwiitu mmoca neehaniya Brian, neera: “Kihoona wiira wantikha ncina na munna mmoca tthukeliye ni uromola kikumiheraka ncuu naka vate, unaakikavihera umuupuwela ni unromola ukati unlompaaka.”
14-15. Manannani ninhaleehu ulompa woohikhuwakhuwa?
14 Nlepele itthu impheeleenyu woohikhuwakhuwa. Munna Michael, romoliye wiipaceroni, naavaha nruku mmoca: “Kasomaka nsayitini jw.org ihantisi comayamunna atthukeliye, kinaamananihaka wuupuwela wiira, kinari miiva, kaahala wiicoona cani. Khweeliini, miiva kanhala ukhala niiwasiwaasi kiwuupuwelaka amwaaraka ni umwaavya ntthu wiira aakhikicere. Iyo inaakikavihera unhimeerya Yehova itthu impheelaaka wiira aakavihere mayamunna atthukeliye.”—Mabere. 13:3.
15 Umananiha wuupuwela mananna mayamunna atthukeliye cineecoonaaya wo khula nihuku unaahala unikavihera waalompela nihimyaka itthu impheeleehu wiira Yehova aapankele. Wootakihera, pooti wanlepeleehu wiira makwaartaayo yaawacere saana mayamunna ni ikuvernu yaahiye unswalela Yehova anari ootaphuwa. (1 Tim. 2:1, 2) Ciicammo pooti wanaalompeleehu wiira ntakihero naya ayo mayamunna ookhuluvelyaayo naalipihe mayamunna owanlokoni naya, ni atthu ahinonswalela Yehova yoone meettelwaaya omaana ni naayo alakele wiiwelela itthu inlalyeeraaya mayamunna. (1 Pet. 2:12) Masi ciicammo pooti wanaalompeleehu mayamunna anaanana marikariko makhwaawe, toko cinhimyaaya nnya mirukunnya. Nakhalaka ntthu ooweheeha, ninaaromola ncina na munna ni ninaalepela itthu impheeleehu wiira akaviheriye ni ninawoonihera wiira wanrimani wihu nicanre nifento nomayamunna.—1 Atesal. 3:12.
NWEHERE SAANA ULOMPA WINYU
16. Manannani ninhaleehu uweha saana ulompa wihu?(Matewus 6:8)
16 Toko noonileehu, ulompa wihu pooti umwiirannyeehela itthu ntthu nkhwaawe. Masi nihaana niweheraka saana ulompa wihu. Nalompaka, khunakhala wiira ninonhimeerya Yehova itthu ihincuwelaawe. Ni uyo khampheela ikano cihu wiira apanke itthu nimananna omaana. Hataa ntthu hinacuwela itthu impheelaawe—awula hiiva nihinacuwela—Yehova naacuwela itthu impheelaawe. (Nsome Matewus 6:8.) Vano, nlattuni ninaalompeleehu akhwiihu? Uhiya citthu niitthucileehu, waalompela akhwiihu ukhanle woonihera nifento. Ni Yehova unantteela nrima awoonaka aswalyaawe yooniheraka nifento toko uyova.
17-18. Nvahe ntakihero ninaaca mavekelo ninaapankeleehu mayamunneehu ni mayanuunwiihu?
17 Ikwaha cikhwaawe pooti wankhalaaya toko ulompa wihu khiivo inkaviheraaya. Uhookhalaru commo, unawoonihera waafenta wihu mayamunna, ni Yehova unantteela nrima. Muupuwele nna nlattaniheronna: Nyari naasaanaawe eeli ooyevaca, mwanthiyana ni mwanlopwana. Mwanlopwanooyo naawerennya. Vano mwanthiyanooyo nawaalepela isontte athumwaane: “Sontte paapa, munkavihere nyeenyooyo wiira avone. Uyo naawerennya!” Athumwannyaayo anaacuwela ni aneera yanwaceraka saana, kontha ananfenta. Masi muupuwele inanna ayo cinhalaaya ukhala ootteeliya nlattu woomoona mwanaya ankhalelaka iwasiwaasi nyeenyaawe, mpaka waalepela athumwaane isontte.
18 Iyo phiitthu Yehova inniirelaawe wiira nihaana upanka.—Uyo nopheela wiira nikhalelaneke iwasiwaasi ni nilompelaneke. Napankaka commo, ninawoonihera wiira khanineecuupuwela veekha, masi ninawaafenta mayamunneehu ninrima wotheene. Ni Yehova nawoona. (2 Atesal. 1:3; Mabere. 6:10) Ni ciicammo toko niitthucileehu, ikwaha cikhwaawe ulompa wihu pooti umwiirannyeehela itthu ntthu nkhwaawe. Phimaana, khanimpheela uhiyerera waalompela akhunanihu.
NCIPO 101 Itthu Sinniiriha Ohakalala
a Macina makhwaawe ahaakakhanihiya.
b Nwehe nsayitini jw.org ividiyu Takeshi Shimizu: Yehova khanle “Namwiiwelela ulompa.”
c Wiira mphwanye macina o mayamunna atthukeliye, mwantikhe nsayitini jw.org “Testemunhas de Jeová presas por causa de sua fé—por região.”
d ILATAROTO: Mayamunna ni mayanuunu anaanana marikariko anawaalompela akhunanaya.