Mayamunna owuuluvala—Nyuuva nhaana ifayita cinene wanlokoni

Atthunaka nyuuva ciicammo khamunkhitiri upanka citthunnyo khampa caapankeenyu khalayi. Hataa ukhalaka wiira nhoviriha myaakha cinci munswalelaka Yehova, mwanceraka ulattaniha mananna mwanvareleenyu nteko Yehova khalayi ni nna co watthunaka nnaakhala oriipiya nrima. Isiyani inhala wuukaviherani ukhala ootteeliya?

ISIYANI YEHOVA IMPHEELAAWE WIIRA MPANKE?

Mwiikohe co: Isiyani Yehova impheelaawe wiira kipanke? Moolumo amphwanyannya nhina Deuteronomiyu 6:5 anaahala wuulipihani, ayo aneera: “Unfente Yehova, Nlukwaa, ninrimaa wotheene, nuukumyaa wotheene, ni niikuru caa cotheene.”

Khampa cinooniheraaya iyo iveeruswiiyo Yehova nopheela wiira munswalele ninrimeenyu wootheene niikuru cinyu cootheene. Iyo ikhweeliiyo inaahala wuukaviherani uhiilattaniha naatthu akhwaawe.

Muupuwele co: Ukati mwaariinyu mmirawo, isiyani mwampankeleenyu Yehova? Watthunaka mwanampankela Yehova ile mwaakhitiriinyu. Masi nna va makhalelweenyu arukunuwilyaaya, nnawiikurumica upanka inkhitiriinyu wiira munvarele nteko Yehova. Muupuwelaka ayo manannaayo nnaahala woonelela wiira nnawiikurumica unvarela nteko Yehova khampa khalayi. Khalayi mwaneekurumica upanka inkhitiriinyu wiira munvarele nteko Yehova ni nna co ciicammo nnawiikurumica upanka inkhitiriinyu wiira munvarele nteko Yehova.

POOTI UNAAKAVIHEREENYU AKHWIINYU NI CITTHU MUNCUWELEENYU

Uhiya wuupuwela citthu cihinkhitiriinyu upanka, muupuwele inanna cinhaleenyu waakavihera akhwiinyu. Woohitikhinaca, nna va cihaavo citthu cinkhitiriinyu upanka cahaakhitiriinyu upanka nnari mmirawo. Wootakihera, nyuuva pooti upanka citthu toko:

Waahimeerya akhunaninyu citthu ciitthucileenyu khalayi. Moone itthu inhimyaaya Ibiibiliya nhina iveerusu cinttharanaca:

Mwene Davidi: “Kihotoko ukhala mmirawo ni nna co kihooluvala, masi akinatoko umoona ntthu neettela isariya nanyanyaliye ni hataa asaanaawe yaavyaaka iyoolya”—Isaa. 37:25.

Josuwe: “Vano, mi kinhala vakaani ukhwa, ni nyuuva nnaacuwela sana-saana ninrimeenyu wotheene ni niiroohweenyu yotheene, wiira nhina citthu comaana cotheene caakhuluvelihilyaawe Yehova, Nlukweenyu, khanivo nanka nuulumo nimoca nihiirannyeele. Citthu cotheene cihowiirannyeelani. Khiivo nanka itthu ihiirannyeele.”—Jos. 23:14.

Atthunaka nyuuva nhopaca wuuluma moolumo mamocaaru ukati mwaariinyu nhinooluvala. Citthu Davidi ni Josuwe cuulumilyaaya caahotepa ukhalana ifayita kontha caari citthu caawiirannyenle. Ayo aswali ookhuluvelyaayo yuulumile citthu coonilyaaya ni ciiwilyaaya muukumini waya motheene, phimaana muulumwaaya yahaana ifayita.

Wakhala wiira nyuuva nhoviriha myaakha cinci munswalelaka Yehova, pooti unaalipiheenyu akhunaninyu mwaahimeryaka ifayita urinaaya unswalela. Nyuuva nnawuupuwela ukati Yehova waakavihenryaawe aswalyaawe? Wakhala wiira nnaakhula iyee, mwaahimerye akhunaninyu iyo ittwiiyo. Nyuuva pooti unaalipiheenyu mayamunna mwaahimeeryaka citthu ciwiirannyeenleni.—Aroo. 1:11, 12.

Inanna ikhwaawe yowaalipiha mayamunna ukhanle urwaa umikutthaanoni co wanlokoni. Nwo nnaahala ukhala olipihiya ni nnaahala waalipiha mayamunneenyu. Connie himiye wiipaceroni, neera: “Urwaa umikutthaanoni unaakiiriha uhikhala oriipiya nrima. Akinkhala oriipiya nrima kontha kinawiicoona ufentiya ni mayamunna. Kinaamananihaka woonihera usukhuru waka kaavahaaka citthu cooyeva-yevaca. Ni kinawiikurumica wiira kavarane nteko nkhayi mayamunna ni nuunu.”

YEHOVA NAAVAHA IFAYITA WIIKURUMICA WINYU

Ahaavo atthu enci anuulumiya mbiibiliyani yaafentiya ni Yehova hataa ukhalaka wiira khayaakhitiri umpankela Yehova citthu cuulupale. Mmuupuwele Simeau, nsarayeli mmoca owuuluvala akhanle ukati wa Yesu. Ukati waarwaawe wootola utempulu uyo atthunaka anaawoonaka amirawo yavaraka miteko cuulupale ni cofayita cinene. Atthunaka Simeau anawiicoona uhikhalana ifayita nlattu wohinvarela nteko Yehova khampa ale amirawaale. Masi Yehova anwehera nimananna makhwaawe. Uyo anaamoona Simeau ukhala oweettela isariya ni okhuluvelyaa. Phimaana ahonvaha iparakha yoomoona Yesu nari mwaana. Mpaka Yehova ahonvarela nteko wiira apanke inatiri o citthu caahalaawe upanka ni umwiiraneela wahoolo. (Luka 2:25-35) Unawoonannya wiira Yehova khaaweheehile irutthu yowuuluvala ya Simeau, masi ahomoona ukhala nlopwana rina waamini woolipa ni nnepa wo waaryaa waari nuuyo.

Nyuuva ciicammo pooti unkupaliinyu wiira Yehova naavaha ifayita nteko unvareenyu hataa ukhalaka wiira khannokhitiri uvara cinene. Uhoolo wawe, wiikurumica winyu unaancivela cinene kontha ‘uyo nopheela wiira nivaheke ile hiivano inkhitiriihu uvaha, kahi ihinkhitiriihu.’—2 Akor. 8:12.

Vano mwiikurumice uvara ile inkhitiriinyu. Nyuuva pooti unwehaweheenyu mananna oohirikarika oohala ulalyeera. Uhiya commo nyuuva pooti unaalipiheenyu mayamunna ni mayanuunu owanlokoniwinyu. Ayo anaakhala olipihiya yamoonaka ntthu nonswalela Yehova ikhumelo yo khalayi toko nyuuva.

Mayamunna makhwaawe khaneecoorya nlattu woopahuwa. Moone itthu yiirannyeele mphantte unkhuma ncuwa wo Afrika nhina ikwaaturu ineera “Anuunu amoca yahovarela nteko Ibiibiliya wiira yoopole ukumi wantthu.”

Nkupali wiira wiikurumica winyu unvarela nteko Yehova unaahala waakavihera atthu akhwaawe ni nyuuva nkhanle ntthu ooreera utakihiya ciicammo pooti unkupaleelenyu wiira “Nluku khanakhala ootakhala nrima wiira aliyale miteko cinyu ni inanna cifentaleenyu ncina nawe, waakavihera winyu ale akhanle owaarya ni uhihiyerera winyu waakavihera.”—Mabere. 6:10.

MWIIKURUMICE WAAKAVIHERA AKHUNANINYU

Anamasoma anaahimya wiira atthu owuuluvala aneekurumica waakavihera akhwaaya, ahaana ukumi womaana, anawuupuwela saana ni anaakhala mahuku menci.

Khweeliini, upanka citthu comaana khunhala uwiirihani uhiya uviriha itafaawuti nlattu wo wuuluvala. Umwene wa Nluku paahi phinhala umalamaliha wuuluvala ni ukhwa uwile nlattu wo itampi.—Aroo. 5:12.

Mahukwaala, nteko unonvareleenyu Yehova unhela nhina waakavihera akhwiinyu, unawuukaviherani ukhalana niweherero noolipa ni ukumi womaana. Mayamunna owuuluvala, nhiliyale wiira Yehova naavaha ifayita nteko unonvareleenyu ni mayamunna o wanlokoni ciicammo anaavaha ifayita ntakihero ni ninoonihera waamini woolipa urineenyu.