Makoho Aanamasoma

Kontha isiyani nhina 2 Samuweli 21:7-9 uneeriya wiira Davidi “ahomoonela uthunku Mefiposeti” masi mphantte nkiinooyo uneeriya wiira Davidi ahoruma wiiviya Mefiposeti?

Nasomaka wowaakuvyaaca nnyo iveerusunnyo, atthunaka ninaahala wiikoha commo. Masi nnyo iveerusunnyo cinwuuluma alopwana eeli oovirikana yaarina ncina nimocaaru: Mefiposeti. Ni itthu yeerannyeele inaaniitthuciha ikano yofayita.

Mwene Sawuli ahaana asaana saapa alopwana ni asaana eeli asithiyana. Mwanawe oopacera eehaniya Jonataa. Wahoolo, mwene Sawuli ahonnyara mwaana nkhwaawe eehaniya Mefiposeti. Uyo aari mwaana Sawuli aayarannyaawe athiyana yeehaniya Rispa. Masi Jonataa ciicammo ahaana mwaana eehaniya Mefiposeti. Phimaana, mwene Sawuli ahaana mwanawe eehaniya Mefiposeti, ni ciicammo ahaana mwanculawe eehaniya Mefiposeti.

Mwene Sawuli ahomananiha uwiivakaca magibeonita otheene yaakhala wamoca naasarayeli. Ni unkhala toko ahowiivakaca magibeonita enci. Masi iyo yaari itthu yahaalamuliyaawe upanka. Kontha isiyani? Kontha ukati wa Josuwe, mahumu o Isarayeli yahaapankanana nleehano magibeonita ni yaholapha wiira khayaahala uwiivakaca.—Jos. 9:3-27.

Nno nleehanonno nanlelo naanaweetteliya ukati wa Sawuli. Masi waahookhalaru commo, Sawuli kheettenle nno nleehanonno ni ahomananiha uwiivakaca magibeonita. Phimaana, Sawuli ni nloko nawe notheene ‘yahottheka nlattu woomwaarusa iphome.’ (2 Sam. 21:1) Nuuwakatyaaya, Davidi ahokhala mwene ni magibeonita yaheevakaciye yahonhimyeera itthu yaapankilyaawe Sawuli. Davidi ahoona wiira ayo yahaana yalivaciyaka wiira Yehova acaalihe ilapo yo Isarayeli. Phimaana ahaakoha magibeonita isiyani yaapheelaaya uliviya nlattu wokhirini yaapankiyaaya ni Sawuli. Masi magibeonita khayaalepenle uliviya nsurukhu. Ayo yaalepenle uvahiya asaana saapa a nlopwana aarumale wiivakaciya magibeonita wiira naayo awiivakace. (Manu. 35:30, 31) Ni mwene Davidi ahopanka itthu yaalepenlyaaya.—2 Sam. 21:2-6.

Ule ukatyuule, Sawuli ni Jonataa yahokhwa. Masi mwaana a Jonataa eehaniya Mefiposeti nanlelo ahaavo. Uyo ahontakya meetto nlattu wo itthu yankhumelenle nari mwanhima. Ni unawoonannya wiira uyo khaakavihenre ataataawe uwiivakaca magibeonita. Mwene Davidi ahaana upatthani woolipa ni Jonataa; phimaana, ahompankanana nleehano Jonataa naasaanaawe otheene woohinhiya uttuli mwaana a Jonataa eehaniya Mefiposeti. (1 Sam. 18:1; 20:42) Ibiiblya ineera co: “Mwene Davidi ahomoonela uthunku Mefiposeti, mwaana a Jonataa, mwaana a Sawuli nlattu wo itthu yanlaphenlyaawe Jonataa mwaana a Sawuli uhoolo wa Yehova.”—2 Sam. 21:7.

Hataa ukhalaka commo, Davidi ahopanka itthu yaalepenlyaaya magibeonita ni ahaavaha magibeonita asaana eeli a Sawuli, mmocooyo eehaniya Mefiposeti. Ni ahaavaha asiculawe Sawuli athanu. (2 Sam. 21:8, 9) Davidi upanka wawe commo, nahomala nikoosi naasarayeli nlattu woomwaarusa iphome yaatthu oohittheka.

Iyo ihantisiiyo inaaniitthuciha ikano yofayita. Nlamulo na Nluku naanaahimya itthu yaalamuliya weetteliya. Nno neera co: “Asaana khanlamuliya wiiviya nlattu wo citthu cipankilyaaya asithumwanaya.” (Deut. 24:16) Unari wiira asaana eeli a Sawuli ni asiculawe athanu khiivo itthu yootakhala yaapankilyaaya, Yehova khaahala waahiya yiiviyaka. Nno nlamulonno ciicammo neera: “Ntthu haana eeviyaka paahi nlattu wotampi ipankilyaawe mwaneennyaawe.” Phimaana, unkhala toko asaana eeli a Sawuli ni asiculawe athanu yahokavihera wiivakaciya magibeonita. Ni nlattu wo iyo itthwiiyo, ayo ciicammo yahaana yiivakaciyaka.

Ila ihantisiila inthoonyera wiira ntthu khanlamuliya upanka itthu yootakhala nlattu wookhala wiira noorumiya. Ahaavo moolumo o mbiiblyani aneera: “Wookole nttala unviraaya metto caa, Ni iphiro caa cotheene cinaahala ukhala co nnema.”—Miru. 4:24-27; Efesu 5:15.