MWAHA WOOSOMIYA 50
“We unhala ukhala Upeephoni wamoca ni miivano”
“Wokhweeli, kinoohimerya ilelo co: We unkookhala Upeephoni wamoca ni miivano.”—LUKA 23:43.
NCIPO 145 Deus Prometeu Um Paraíso
NINHALA WIITTHUCANI?a
1. Yesu hinaaya ukhwa, isiyani yaamwiirenlyaawe nakhirini mmoca aakhomeliye wanipottoni nkhayi nuuyova? (Nwehe Luka 23:39-43.)
YESU ni anakhirini eeli yaakhomeliye wanipottoni nkhayi nuuyova yahoona uwerya cinene ahinakhwa. (Luka 23:32, 33) Uvira waya ukati vakaani, ayo yahontarawa Yesu. Iyo itthwiiyo inthoonyera wiira ayo khayaari attharyaawe. (Mat. 27:44; Mark. 15:32) Vano nlopwana mmocooyo ahorukunusa moopuwelelwaawe. Uyo aheera: “Yesu uhikiliyale wakelaka vale muumweneni waa.” Yesu ahaakhula: “We unkookhala Upeephoni wamoca ni miivano.” (Nsome Luka 23:39-43.b) Khiivo itthu inthoonyera wiira uyo nakhirinnyuuyo ahokupali ni weettela ihapari co ‘Umwene wa Nluku’ caalalyeeraawe Yesu ukati waaryaawe va watuninyani va. Ni khuuvo ukati Yesu weeralyaawe wiira ule nlopwanoole naahala ukela muumweneni wo wiirimu. (Mat. 4:17) Khweeliini, Yesu aaca ipeephoni inhala ukhala wahoolo va watuninyani va. Nincuwela cani iyo itthwiiyo?
Nakhirini aamuulumanne Yesu nakhomeliye wanipottoni aari tipani ni isiyani yaacuwelaawe? (Nwehe iparaagarafu 2-3)
2. Isiyani inthoonyera wiira nakhirini aattharuwile aari nyuuta?
2 Nakhirini aattharuwale atthunaka aari nyuuta. Uyo ahomwiirela nakhirini nkiinooyo co: “We khummoova Nluku, hataa uttarusiyaka toko uyo cittarusiyaawe?” (Luka 23:40) Ayuuta yanswalela Nluku mmoca paahi, masi atthu akhwaawe yahaari ayuuta yaanawaaswalela anluku enci. (Nkw. 20:2, 3; 1 Akor. 8:5, 6) Unari wiira ule nlopwanoole khaari nyuuta, uyo aahala wiira co: “We khunwoova anluku?” Itthu ikhwaawe inthoonyera wiira uyo nlopwanooyo khaari nyuuta ukhalaka wiira Yesu khaaveleelihiye wiira aakavihere atthu olapo cikhwaawe, masi wiira akavihere “ikhontwaa coorimela co nloko no Isarayeli.” (Mat. 15:24) Khampa nyuuta, uyo nlopwanooyo ancuwela wiira Nluku ahaakhuluveliha asarayeli wiira anhala uwunweleliha atthu ookhwa. Mananna uyo nlopwanooyo caamulumannyaawe Yesu anawoonihera wiira uyo ancuwela wiira Yehova anhala umunweleliha Yesu wiira akhale Mwene o Umwene wa Nluku. Atthunaka uyo nlopwanooyo ahaana niweherero wiira uyova ciicammo anhala wunwelelihiya ni Nluku.
3. Isiyani atthunaka nakhirini yoopuwenlyaawe ukati waamwiiwilyaawe Yesu oolumaka ipeephoni? (Nwehe Uphattuwaca 2:15.)
3 Ukhala wiira ule nakhirinnyuule aari nyuuta, ancuwela ihantisi ya Atamu ni Hawa ni ipeephoni Yehova yaavahilyaawe. Ukati weewilyaawe moolumo a Yesu, uyo nlopwanooyo ahoopuwela ipeephoni yooreera cinene va watuninyani va.—Nsome Uphattuwaca 2:15.c
4. Itthu Yesu yanhimenryaawe nakhirini inaaniiriha wuupuwela isiyani?
4 Itthu Yesu yaamuulumenlyaawe nakhirini ihaana inikurumicaka wuupuwela mananna cinhalaaya ukhala ipeephoni. Itthu inhala unikavihera ukhanle wuupuwela umwene wa Salomau. Kontha isiyani? Kontha Ibiiblya ineera wiira Yesu khanle muulupale unvikana mwene Salomau. Phimaana, hiiva pooti wanweherereehu wiira Mweneehu Yesu Kristu wamoca ni makristau oothanliya 144.000 anaahala upanka citthu cooreera cinene va watuninyani va. (Mat. 12:42) Khweeliini, “ikhontwaa cikiina,” ale arina niweherero nookhalana ukumi woohimala watuninyani, anaapheela ucuwela isiyani inlamuliyaaya upanka wiira yakhale upeephoni.—Joau 10:16.
UKUMI UNHALA UKHALA CANI UPEEPHONI?
5. Nyuuva nnaakhitiri wuupuwela mananna cinhalaaya ukhala ukumi upeephoni?
5 Nnaakhitiri wuupuwela mananna ukumi cinhalaaya ukhala upeephoni? Atthunaka nyuuva nnoopuwela wiira ninhala ukhala nipuro nomaana, toko caaryaaya ijardim yo Eeteni. (Upha. 2:7-9) Atthunaka nnawuupuwela moolumo a Mikeya: “Khula ntthu nokowunkoma vathiwaya mwiryaawe wo uva ni vathiwaya mwiryaawe wofiiku.” (Mik. 4:3, 4) Pooti ukhalaka wiira nnawuupuwela iveerusu co mbiiblyani cikiina cinhimya wiira uhoolo inaahala ukhala iyoolya yinci. (Isaa. 72:16; Isai. 65:21, 22) Vano, atthunaka nyuuva nnawuupuwela nnari nipuro nooreera nnonkomale wameecani ni cineesiye icoolya cinci coociva. Ni nnawiicuupuwela nviraka iphyoo comaana wantthuucini noocivaciva. Ni ciicammo nyuuva nnaathyaa wamoca naasimuciinyu, asipatthaniinyu ni nkhayi naale anhala wunwelelihiya—nthukaka ni moopaka mwaha. Khweeliini, citthu cotheenennyo cinaahala wiirannya va watuninyani va. Uhiya commo, upeephoni ninhala ukhala nipuro nomaana ninhala ureera uvara nteko saana.
Hi ninaahala uvara nteko wofayita: waasomiha atthu anhala wunwelelihiya (Nwehe iparaagarafu 6)
6. Ntekoni unhaleehu ukhalana upeephoni? (Nwehe ilatarato.)
6 Yehova numpale wiira nikhitiri uvara nteko ni wiira unitteele nrima nlattu wo nteko unvareehu. (Ekles. 2:24) Ukati wo myaakha 1.000 Yesu unhalaawe ulamulela, ninaahala uvara miteko cinci. Atthu otheene anhala woopwa ukati wo masakha moolupale ni atthu akhwaawe enci anhala wunwelelihiya anaahala upheela ikuwo coowara, iyoolya ni nipuro nookhala. Iyo itthwiiyo inthoonyera wiira ninaahala uvara nteko cinene. Uyo ntekooyo unaahala unitteeliha nrima. Yehova ahomwiirela Atamu ni Hawa wiira awacere ni yuncerere ijardim yo Eeteni. Inanna imocaaru, hi ninaahala ukhalana nteko wookhaliha ituninya yotheene ipeephoni. Muupuwele mananna cinhaleehu ukhala ootteeliya cinene ukati unhaleehu waasomiha atthu anhala wunwelelihiya ni waacuweliha makhalelo a Yehova ni citthu cilakenlyaawe upanka. Muupuwele mananna cinhalaaya ureera uwuulumana aswali ookhuluvelya a Nluku okhalayi ni waahimyeera citthu cotheene ciirannyaale ayova anakhwaale.
7. Isiyani inlamuliyeehu ukupali ni kontha isiyani?
7 Hiiva pooti wankupaliihu wiira ukumi upeephoni unhala ukhala wo nnema ninci, woothotokanihiya ratta ni ninaahala ukhalana citthu cotheene cimpheeleehu. Ninkupali iyo itthwiiyo kontha niinanna caaryaaya umwene wa Salomau Yehova honithoonyera makhalelo cinhalaaya ukhala ukati unhalaawe ulamulela Mwanawe.
UMWENE WA SALOMAU —NTHOONYERO NO IPEEPHONI
8. Moolumo amphwanyannya nhina Isaalimu 37:10, 11, 29 yiirannyaale cani khalayi? (Nwehe “Makoho Aanamasoma” nhina yeela irevisteela.)
8 Yehova ahonruma mwene Davidi wantikha mananna caahalaaya ukhala ukumi alamulelaka mwene oocuwelaca ni ookhuluvelya. (Nsome Isaalimu 37:10, 11, 29.d) Hiiva ninaasomaka Isaalimu 37:11 nawoopanaka mwaha atthu naahimyeeraka mananna cinhalaaya ukhala ukumi upeephoni. Iyo itthwiiyo ikhanle yokhweeli kontha Yesu ahooluma ayo moolumwaayo ukati waataphulelaawe mwahaawe muulupale wo umwaakoni, athoonyeraka wiira Yehova naahala wiirannyeeha wahoolo. (Mat. 5:5) Masi moolumo a Davidi ciicammo anaathoonyera mananna caahalaaya ukhala ukumi uwakati waahalaawe ulamulela mwene Salomau. Ukati Salomau waaryaawe mwene o Isarayeli, apoovu a Nluku yaakhala ninnema ni nimpuha. Ilapo yaakhalaaya yaari ilapo ‘yoocarana ileeti ni urawo.’ Ni Nluku aheera co: “Mwaahihiyeke utthara malamulwaaka, ni wiiwelela marumwaaka, ni weettela . . . , nyuuva nnaahala urupa woohikhala ntthu oowoopopihacani.” (Lev. 20:24; 26:3, 6) Uwakati waalamulelaawe mwene Salomau iyo phi itthu yeerannyaale. (1 Ikor. 22:9; 29:26-28) Ciicammo, Yehova aheera wiira ale yaahala waaswalela anluku akhwaawe ‘khayaahala ukhala-tho.’ (Isaa. 37:10) Phimaana, moolumo amphwanyannya nhina Isaalimu 37:10, 11, 29 yaheerannya ule ukatyuule, masi ciicammo anaahala wiirannya uhoolo.
9. Isiyani apwiyamwene o Sabá yuulumalyaaya yaacaka ulamulela wa mwene Salomau?
9 Apwiyamwene o Sabá yahocuwela wiira umwene wa Salomau wahaawaanela nnema ninci ni mpuha apoovu o Isarayeli. Apwiyamwene o Sabá yaholakela urwaa u Yerusalemu wiira yacuwele ni yooneehe nimeethwaaya. (1 Mam. 10:1) Umaliha waya uthotola iyo ilapweeyo, ayo yaheera co: “Citthu coonalyaaka khacimphiyera nuusu naya citthu caahimeriyaaka . . . Ahoreeriya alopwaneenyu, ni ahoreeriya ananteko ari uhoolweenyu pwiiya, yiiwelelaka ucuwelaca winyu!” (1 Mam. 10:6-8) Masi umwene wa Salomau ninkhanle nthoonyero nankaani ninoonihera itthu Yehova inhalaawe unipankela mwanawe, Yesu Kristu, anceraka ulamulela ituninya.
10. Manannani Yesu khanlyaawe muulupale umpwaha mwene Salomau?
10 Yesu khanle muulupale unvikana mwene Salomau nhina citthu cotheene. Salomau aari nlopwana oopahuwa ni ahovara matampi. Ni iyo itthwiiyo wahoolo waya yahaawaanela masakha menci apoovu a Nluku. Masi Yesu khanle nhooleli oohipahuwa, ni khanhala uvara matampi. (Luka 1:32; Mabere. 4:14, 15) Yesu khaahiile unkhuluvela Yehova hataa Sotwani apankaka yotheene yaakhitinryaawe wiira anhapuse. Yesu hoonihera wiira uyo khanhala uvara matampi awula upanka itthu yootakhala inhala uniwaanela masakha. Khweeliini, uyo khanle mwene oohilikananiya nohala unihoolela.
11. Phaapani anhala unkavihera Yesu?
11 Yesu naahala ukhala nkhayi ni makristau oothanliya 144.000 wiira aakavihere apinaatamu ni akhitiri wiirannyeeha itthu Yehova impheelaawe unipankela va watuninyani va. (Apoka. 14:1-3) Ayo makristau oothanliyaayo anaacuwela sana-saana uhuva isiyani, kontha akhanle alopwana ni athiyana apacenre ukhala va watuninyani va ahinaaya urwaa wiirimu. Phimaana, ayo anaahala ucuweleeha citthu cinniira. Masi ntekoni unhalaaya uvara makristau oothanliya 144.000?
NTEKONI UNHALAAYA UVARA MAKRISTAU OOTHANLIYA?
12. Ntekoni womaana Yehova waavahacenryaawe makristau oothanliya 144.000?
12 Yesu ni makristau oothanliya 144.000 anaahala ukhalana nteko muulupale uvikana nteko waarinaawe mwene Salomau. Mwene Salomau ahaawacera atthu enci, masi olapo imoca paahi. Vano makristau oothanliya 144.000 anhala waawacera atthu ibiliau cene amphwanyannya ntuninyani motheene. Yehova haavahacera makristau oothanliya nteko woohilikananiya!
13. Ntekoni nkhwaawe wofayita unhalaaya ukhalana makristau oothanliya 144.000?
13 Yesu ni makristau oothanliya 144.000 anhala ukhala mamwene ni anankuttho. (Apoka. 5:10) Malamulo a Moceesi yaahimya wiira anankuttho yahaana yaakhikiceraka apoovu nhina makhalelwaaya o mwiirutthuni ni nhina mminepani; maanaaya wiira yahaana yaakaviheraka ukhalana ukumi womaana ni ciicammo upatthani womaana ni Yehova. Nlamulo naari paahi “irunku yo citthu comaana caahala uwa.” Phimaana, pooti wankupaliihu wiira makristau oothanliya 144.000 anaahala waakavihera apoovu a Nluku ukhalana ukumi womaana ni upatthani woolipa ni Nluku. (Mabere. 10:1) Mpaka nna va, hi khaninaaya ucuwela manannani ayo anankuttho ni mamwennyaayo cinhalaaya unuulumana va watuninyani va. Masi ninaacuwela wiira Yehova naahala waavya mananna wiira atthu otheene upeephoni avahiye malakihero ampheelaaya.—Apoka. 21:3, 4.
ISIYANI INLAMULIYAAYA UPANKA ATTHU OKHURUPU YO “IKHONTWAA CIKIINA” WIIRA YAKHALE UPEEPHONI?
14. Ikhurupu yo “nikhotto nankaani” ni yo “ikhontwaa cikiina” isiyani impankaaya nkhayi?
14 Yesu ahowiihana “nikhotto nankaani” atthu anhalaawe waalamulelana wiirimu. (Luka 12:32) Uyo ciicammo aheera wiira ihaavo ikhurupu yonayeeli. Atthu o iyo ikhurupwiiyo Yesu aawiihanale “ikhontwaa cikiina.” Nnyo ikhurupu piilinnyo cimpanka mphantte nhina nikhoto nimoca paahi. (Joau 10:16) Ilelo, atthu ampanka mphantte wo nnyo ikhurupu piilinnyo anvara nteko nkhayi va watuninyani va, ni upeephoni khanhala uhiya uvara nteko nkhayi. Uyo ukatyuuyo, atthu okhurupu ineehaniya “nikhotto nakaani” anhala ukhala wiirimu ni atthu okhurupu ineehaniya “ikhontwaa cikiina” anweherera ukhala va watuninyani va mpaka. Masi atthu okhurupu yo “ikhontwaa cikiina” wiira yakhale upeephoni cihaavo citthu cinlamuliyaaya upanka nenna co.
Ninlamuliya wiitthenkaca nenna co wiira nirwee nakhale upeephoni (Nwehe iparaagarafu 15)e
15. a) Manannani “ikhontwaa cikiina” cinaakaviheraaya mayamunnaawe Kristu? b) Toko cinthoonyeraaya ilatarato, nyuuva nnohala untakiha cani munna ri ufarmácia? (Nwehe ilatarato.)
15 Nakhirini aakhomeliye wanipottoni nkhayi ni Yesu khwile hinaaya uthoonyera wiira ansukhuru woopoliya wawe ni Yesu. Masi ilelo, atthu okhurupu yo “ikhontwaa cikiina” ahaana uwakati woothoonyihera wiira ananfenta Yesu. Wootakihera, hiiva ninthoonyihera wiira ninanfenta Yesu naawaceraka ratta mayamunnaawe oothanliya. Mwaneene Yesu heera wiira naahala uhukhumu ikhontwaa awehaceraka mananna cinhalaaya waawacera makristau oothanliya. (Mat. 25:31-40) Hiiva ninaawacera saana mayamunnaawe Kristu naakaviheraka uvara nteko wo waapanka eetthuci. (Mat. 28:18-20) Inanna imoca yoopanka iyo itthwiiyo ukhanle uvarela nteko ilivuru Mphwanye Utteeliya Uhimmala!. Wakhala wiira nyuuva khanrina ntthu nonsomiheenyu Ibiiblya, nnoonela cani wiihelela mpika wowaalattula atthu enci wiira mwaasomihe Ibiiblya?
16. Isiyani inlamuliyeehu upanka nenna co inhala unikavihera wiitthenkaca wiira nakhale upeephoni?
16 Hiiva khaninlamuliya uweherera ukela upeephoni wiira niikurumice urukunusa makhalelweehu. Nenna co, nihaana niikurumicaka wiira nikhale atthu ookhuluvelya nhina citthu cotheene cimpankeehu ni cinoolumeehu ni ucuwela wiiphimela ratta citthu co muukumini wihu. Ciicammo, nihaana ninvaresesaka Yehova, amwaarihu awula awannyihu ni mayamunneehu. Namwiiwelelaka Yehova nenna co, nhina ila ituninya yoohinamaaneela, khunhala unirika umwiiwelela upeephoni. Phimaana, niikurumice ukhalana makhalelo anhala uthoonyera wiira niheetthenkaca wiira nikhale mpeephoni. Nwehe mwaha uneera “Nyuuva nheetthenkaca wiira ‘nvahiye ituninya’ inwa?” nhina yeela irevisteela.
17. Kontha isiyani khaninlamuliya ukhala nicukulacaka nlattu wo matampi avaraleehu khalayi?
17 Ciicammo, ikhanle itthu yofayita wiikurumica uhitepa wuupuwela matampi avanreehu khalayi. Masi khaninlamuliya ulakela uvara matampi ‘imweeni’ nlattu Yesu wowiivaherera wiira anoopole. (Mabere. 10:26-31) Khweeliini, wakhala wiira nihottharuwa matampi avanreehu, nantothaka Yehova ni mahumu wiira anikavihere ni nahiyaka upanka iyo itampiiyo, pooti wankupaliihu wiira Yehova honilevelela. (Isai. 55:7; Mite. 3:19) Nhiliyale itthu yuulumalyaawe Yesu awaacaka mafarisewu: “Mi akaawenle anasariya, masi kaawenle anamatampi.” (Mat. 9:13) Woopoliya wihu ni Yesu uhaana ifayita cinene, phimaana unaakhitiri uniiriha uleveleliya matampiihu otheene.
NYUUVA POOTI UKHALA UPEEPHONI MPAKA
18. Isiyani inhaleenyu upheela unkoha nlopwana aakhomeliye nkhayi ni Yesu?
18 Mwiicuupuwele nyuuva nnari upeephoni mmoopanaka mwaha nakhirini aakhomeliye wanipottoni nkhayi ni Yesu. Khweeliini, ooyeeli cinyu nnaahala woopela mwaha inanna cinsukhurweeleenyu nlattu wo woopoliya winyu ni Yesu. Nyuuva atthunaka nnaahala upheela unkoha mananna ciicoonalyaawe ule ukatyuule ni mananna caakhanlyaawe ukati weereliyaawe ni Yesu wiira anhala ukhala upeephoni. Ni atthunaka uyo naahala wuukohani mananna caaryaaya makhalelo o watuninyani ukati wo mahuku ookhicera. Inhala ukhala iparakha yuulupale waasomiha Nuulumo na Nluku atthu oolikanaca nuuyo nlopwanooyo!—Efesu 4:22-24.
Ukati wo myaakha 1.000, munna mmoca unantteela nrima nlattu woopanka itthu yaawehereraawe cinene wiitthuca upanka (Nwehe iparaagarafu 19)
19. Kontha isiyani hi khaninhala woocya ukhala upeephoni? (Nwehe ilatarato yo wakaapani.)
19 Ukumi upeephoni khunhala unooceeha, kontha ninaahala ukhalana nteko mwinci woovara ni ukati wowaacuwela atthu akhwaawe. Ni itthu yootepa ureera ukhalaka wiira khula nihuku ninaahala utepa waacuwela Apaapeehu owiirimu, Yehova, ni ninaahala ulawa citthu comaana cotheene cinitthenkacenryaaya. Hi khaninhala uhiya woonelela citthu cinci ca Yehova ni wiitthucera citthu cumpilyaawe. Unhalaaya utepa uvira ukati nikhalaka upeephoni, ciicammo ninaahala uvira nitepaka unfenta Yehova. Khweeliini, hi ninansukhuru venci Yehova ni Yesu nlattu woonivaha niweherero noohala ukhala upeephoni mpaka!
NCIPO 22 “Venha o Teu Reino!”
a Nyuuva nnawuupuwelaka mananna cinhalaaya ukhala ukumi upeephoni. Wakhala wiira nnawuupuwelaka, nnaapanka saana. Hiiva noopuwelaka iparakha Yehova cinnitthenkaceraawe wahoolo, ninaahala utepa ukhala ootteeliya ukati wowaahimyeera atthu akhwaawe citthu cinhala wiirannya upeephoni. Ula mwahoola unaahala unikavihera ulipihaca waamini wihu ipeephoni Yesu ikhuluvelihilyaawe va watuninyani va.
b Luka 23:39 Vano, nakhirini mmoca aakhomeliye nne nipuronne, ahancera unveehaca Yesu, eeraka: “We khunakhala Kristu we? Paahi, wiicoopole ni unoopole hiiva ciicammo!” 40 Woomwaakhula, nlopwana nkiinooyo ahonvaanyiha eeraka: “We khummoova Nluku, hataa uttarusiyaka toko uyo cittarusiyaawe? 41 Hiivano, ninhukhumwiya niisariya, kontha ninaakhela itthu inniphwanela nlattu wo citthu cipankileehu. Masi ula nlopwanoola khiivo ipankilyaawe yootakhala.” 42 Vano, uyo aheera: “Yesu uhikiliyale wakelaka vale muumweneni waa.” 43 Ni uyo ahomwiirela coo: “Wokhweeli, kinoohimerya ilelo co: ‘We unkookhala Upeephoni wamoca ni miivano.’”
c Uphattuwaca 2:15 Yehova Nluku ahoncisa nlopwana ni ahomweesa ujardim yo Eeteni, wiira alime ni atafiti.
d Isaalimu 37:10 Unhaleela vakaani paahi, atthu oohiloka khanhala ukhala-tho; unhala uthurumela wakhalakaaya, masi khunhala uwoona-tho. 11 Masi atthu aneettela isariya phinhala ukhala watuniyani ni anhala ukhala ootteeliya cineene ninnema noohimala. 29 Ale aneettela isariya phinhala ukhala watuninyani ni ankookhala mpaka.
e ILATARATO: Amunna owuuluvala yalalyeeraka. Ayo ahaana niweherero noorwa waalalyeera atthu anhala wunwelelihiya ni aheetthenkaca wiira arwee waalalyeera.