Ezaya

20 Mu mwaka uno Umwene Saligoni uwa ku Asilya watumile Tatani* uku Asyidodi, walwisizye umusumba wa Asyidodi nu kuupoka. 2 Pa nsita iiya Yeova wanenyile Ezaya mwana Amozi ati: “Pitanga, kazuule icakuzwala ca kulangilamo ulanda kumwi ni ndyatu.” Nawe wacisile vivyo kwene, atandika nu kupita tupu* nupya ni ngazo sile.

3 Lyene Yeova walanzile ati: “Wakwe vino Ezaya umuomvi wane wapita tupu nupya ni ngazo sile pa myaka itatu wa cimanyililo nupya ica kucelula Aina Ijipti na Ina Etiopia pali vino vilayacitikila, 4 avino umwene wa ku Asilya alacita uku Ina Ijipti na Ina Etiopia yano yasenda umu uzya, kuli kuti alumendo na akote, yalapita tupu nupya ni ngazo ala na matako yakuloleka. I cumi kwene Ijipti alazewana. 5 Nupya yaluvwa intete nu kuzewana pa Ina Etiopia yano yataile na pa Ina Ijipti yano yayuvwilangapo. 6 Mu wanda uuwa, antu aakaikala umu mbali yii yakwe yemba yalalanda yati, ‘Lolini ivyativicitikila wino twataile, wino twayangako umu kulenga uwazwilizyo kuti atupususye uku mwene wa ku Asilya! Uzye tumapusuka tutuuli lyene?’”